Photo: Mapulehu Coast
Kaʻohele trained on the beach in Kainalu along Molokai’s south shore, not far from here, to earn the honor of representing his ahupuaʻa in the Makahiki competition. - Photo: Mikiʻala Pescaia

Read this article in English

Hanohano Kainalu i ke kūkini koke, ka ʻeu loa o Molokai.

I kēlā me kēia ahiahi, ʻākoakoa mai nā kāne ʻōpio i ka heihei wāwae, i hōʻike ʻia ka ʻeleu loa o ka ʻāina, ka e lilo i moho kūkini ma ka hoʻokūkū Makahiki ma Nāʻiwa i kēia kau. ʻO Hulu ke aliʻi, kahi aliʻi o ka lanakila o ia kūkini ala i kona wā ʻōpio a pēlā nā kāne a pau o ka ʻohana, ʻo ka ʻoi loa nō naʻe i ka holo wikiwiki mai kapa a kapa o Molokai, a piʻi aʻela nō ʻo Kainalu i ka hano i ia wikiwiki lā.

Eia lā, ʻaʻohe ʻōpio ʻeleu hoʻi i ʻōʻili maila i mau makahiki ihola, a ua lilo nō ka lei o ka lanakila iā haʻi, no laila, huli nā kupa o Kainalu i nā heihei ahiahi kahi e ʻike ʻia ana ke kūkini hou o ka ʻāina.

Hoʻokahi wale nō keiki a Hulu ke aliʻi, he keiki kāne ʻo Kaʻohele, ka i hānau ʻia ma ka pō Māhealani o ka mākole piʻo lua lani. Ua hōʻike ʻia ke kūlana kamahaʻo o kēia keiki ma nō ʻouli kupaianaha o ka lani, a ʻo ke kilo nō ia a ka lehulehu i ua keiki nei.

Ua akamai ʻo Kaʻohele i ka nohona makaʻāinana, ʻo ka lawaiʻa ʻoe, ʻo ka mahiʻai ʻoe, ʻo nā ʻano pono a pau i mākaukau kona noho aliʻi ʻana mai. ʻOiai he keiki akahai, paʻahana a ʻoluʻolu ʻo ia, a ua ʻeleu ma nā ʻano a pau o ka nohona, ʻaʻole i ʻeleu ʻo ia ma ka holo ʻana, a ua waiho wale ʻia ʻo ia i hope o ka puʻulu ma ka heihei i kēlā me kēia ahiahi me ka waha ʻai lepo pōpolo.

ʻO ka hoʻohenehene mau nō ia a nā makua o kauhale iā Hulu aliʻi i ka hemahema o ua keiki la, ʻokoʻa paha ka makua o kahi keiki lohi wale. Noʻonoʻo ihola ʻo Hulu e hoʻouna aku iā Kaʻohele e noho me ka ʻohana ma Maui, i pākele aku i kēia pepehi a ka ʻōlelo.

Makemake nui ʻo Kaʻohele e hoʻohanohano i kona mau makua ma kēia ʻano o ka ʻeu hoʻi, a ua ʻike kona makuahine i kēia kaumaha a kāna keiki. ʻAʻole i makemake ʻo ia i kāna keiki e hoʻouna ʻia aku, no laila, e kōkua ana ʻo ia iā ia.

I ke kulu aumoe, hōʻala ʻo ia i kāna keiki aloha a lawe iā ia i kapa kai i ke one. Ma laila nō ʻo ia i aʻo aku ai iā ia i ka holo ʻana. Kau ka mahina Māhealani, a i kēlā me kēia pō, iho mai ka māʻamaʻama a ka mahina, a pēlā i hele a maʻa ka wāwae o ua keiki nei i kahi o kēlā me kēia pōhaku me koʻa, nā lua o ka pāpaʻi, a akamai nō hoʻi i ka holo makapō ʻana. Mālie ka hanu, ikaika ka wāwae, lōʻihi ke kapuaʻi, ua mākaukau.

I ke ahiahi aʻe, ua kani ka pū, a ua hele a komo ʻo Kaʻohele i ka heihei. Pūʻiwa ʻo Hulu e ʻike i kāna keiki aloha a ma mua o kona kauoha ʻana aku iā ia e hoʻi mai, hoʻokū kāna wahine iā ia me ka ʻōlelo e hoʻokuʻu iā ia i ka heihei.

Me ka ʻemo ʻole, ua kani ka pū a pohā wale aku ua meʻe ala o kēia moʻolelo, kuehu ka lepo, a waiho ʻia nā kāne a pau me ka waha ʻai pōpolo o Kainalu! Hūlō nā leo kiliwehi aku i ka lanakila! Kū i ke kāhāhā wale ʻo Hulu, a kūkala maila ʻo Kaʻohele, “ʻAkahi oʻu ʻoi hā! Nou e ka makua, ka lei lanakila o ka lā.”

Lilo ʻo Kaʻohele i meʻe kūkini kaulana wiwoʻole o Molokai, ma ke kahua pāʻani Makahiki a me ke kahua kaua, i kona palekana ʻana i ka ʻāina, nā heiau a me ka poʻe o ka moku. Nui nā moʻolelo o nā wahi pana pili i nā hana kupaianaha a Kaʻohele me kona akamai, ʻeleu a hana nui ma naʻe o Molokai.

ʻO Kaʻohele ʻoi hā!