Ke Kumu Wai Aloha – He Kaʻau Makahiki o ka Papahana ʻIke Hawaiʻi

0
151

Read this article in English

Na Kaʻohiʻakūimaunaloa

Photo: Fifth grade students from Kalihi Waena Elementary visited Ho‘oulu ‘Āina
Fifth grade students from Kalihi Waena Elementary visited Ho‘oulu ‘Āina (before the pandemic) and learned to connect with wahi pana in meaningful ways, to include the protocol of acknowledging this mo‘o as they walked through the forest from one ‘ili ‘āina to the next. – Photos: Courtesy of Office of Hawaiian Education

Mai ka nuʻu kapu ʻo Maunakea, ka i ʻohi aʻe i ke aokū o ka lewa lani, a i ka ilina wai o ke ao uli o Kanaloa, waipunalau ke aloha. Wahi a kūpuna, ʻo ka wai a Kāne he huewai ola. A i ke au nei ma ka wao hoʻonaʻauao, kū mau ko mākou manaʻo, ʻo ke Keʻena Hoʻonaʻauao Hawaiʻi (OHE), ʻo ka wai e ola ai haumāna o Hawaiʻi nei, ʻo ka ʻike Hawaiʻi a me ka ʻōlelo Hawaiʻi nō ia.

Me ia manaʻo nō, e ka mea heluhelu, na ka ua Waʻahila o Kou e honi māʻū ai i ka makani nāna e hiʻi aku i nei leo kūkala e kuʻi nō i ka lono no ka piha ʻana o ke kaʻau makahiki o ka Papahana ʻIke Hawaiʻi no ka pono o ka ʻOihana Hoʻonaʻauao!

I ka makahiki 1980, ua kū mai ka Papahana ʻIke Hawaiʻi i mea e kō ai ka Pākuʻi Hoʻololi o ke Kumukānāwai Aupuni Hawaiʻi e koi ana i ke aʻo a me ka mālama ʻia o ka ʻike Hawaiʻi, ka moʻolelo Hawaiʻi, a me ka ʻōlelo Hawaiʻi. Mai kinohi mai o ia Papahana a i ke au nei, kono ʻia ka noho ʻana o nā kūpuna a me nā kahu ma nā kula kamaliʻi a me nā kula waena o ka pae ʻāina, na lākou ka mālama ʻana i ka ʻike Hawaiʻi ma ka papa.

Photo: Kimo and Kanani Auwai
Anakala Kimo Auwai, a current kupuna in the Küpuna Component with his mother, ʻAnakē Kanani Auwai, one of the first kupuna in the program at Haleʻiwa school.

He mau makahiki ma hope mai, kūpaʻa ko OHE i ka mau ʻana o ka manaʻo, “ʻO Hawaiʻi ke kahua o ka hoʻonaʻauao,” i mea e māpunapuna mau ai ka wai mānalo, ka ʻike kūpuna hoʻi, e puapuaʻi ana ma nā kula o ka ʻOihana Hoʻonaʻauao ma o ka holomua ʻana o ka Papahana ʻIke Hawaiʻi. Me ia manaʻo, ua hoʻomōhala ʻia maila ka papahana ʻĀina Aloha ma lalo o ka malu kou o ke keʻena OHE–he papahana nō e kākoʻo ana i nā kula e aʻo ʻia ai ka ʻike Hawaiʻi ma nā pae papa a me nā papa māʻiʻo a pau.

I ka makahiki kula aku nei, ua kaheāwai akula ka ʻike kūpuna ma o ka papahana ʻĀina Aloha mai ʻō a ʻō o ka pae ʻāina nei. He 11 kāuna kula ka i komo i ke aʻo mai ka mokupuni ʻo Hawaiʻi, ʻo Maui, ʻo Oʻahu, a ʻo Kauaʻi hoʻi, he ʻekolu kaʻau kānaka, mai loko mai o nā kālana he 14 o nā 15 kālana o ka ʻOihana Hoʻonaʻauao. Ma ʻō aku o ka ʻike kūpuna wale nō, ʻo ke kūkulu pilina, ka paʻa moʻolelo, a me ka hoʻoikaika kaiāulu ka hana e waiwai ai ke aʻo ma lalo o ka papahana ʻĀina Aloha. I kēia makahiki, i loko nō o ka ʻeha o nēia makahiki hulihia i hoʻopaʻakikī ai ka holomua o ke aʻo ma nā kula, mālama ʻia nō hoʻi he mau hālāwai aʻoaʻo no ka ʻike ʻĀina Aloha, a he mau haneli kānaka e ʻike nei i ke koʻikoʻi o ka ʻike kūpuna ma ka lumi papa.

I ka ʻauī ʻana o ke kaʻau makahiki i hala a me ka huli hou ʻana o ke alo i kahikina, mau nō ke kū ʻana ʻo OHE me he ʻōhiʻa lā i ola ai ka ʻāina i ka wai. He kuleana ko ka ʻOihana a me nā kula nō hoʻi i ke kūkulu ʻana i ke aʻo kū Hawaiʻi. ʻO ka Mahele Kūpuna paha ʻoe, ʻo ka Papahana ʻĀina Aloha nō paha hoʻi, ʻo ka hoʻomōhala ʻia maila o kekahi ʻano aʻo e pono ai ko Hawaiʻi pae ʻāina nō paha ia, aia nō i ke kula. Akā, ke hōʻea ka wā o ke kūpuna ʻana mai o nā moʻopuna o ke au nei, e waipuna e kīkī aʻe ana lākou, ka puapuaʻi ʻana aʻe hoʻi nō kā ia o ke kumu wai aloha o nei ʻāina. Ola nui kākou i ka wai aloha o nā kūpuna!!!