Kahoʻiwai Teacher Education Program

0
125

Read this article in English

Na Noekeonaona Kirby, Kahoʻiwai Academic Dean

Photo: Nā Kai ʻEwalu cohort at Waipiʻo,
Nā Kai ʻEwalu cohort at Waipiʻo, Hawaiʻi. – Photos: Courtesy Kahoʻiwai Teacher Education Program

Lauaʻe ke aloha no ka Hawaiʻi
Ā hoʻi (i) ka wai manomano
He manaʻo hāliʻa mānowai hūʻena
Hāʻale a ka wai (o) Laukapalili
ʻO Hāloanaka kai aloha ʻia
E hoʻi i ka wai, mimilo ke aloha ē.

Ua haku ʻia kēia oli ʻo Lauaʻe Ke Aloha e nā haumāna o Kahoʻiwai e hōʻike aku i ko lākou aloha a kuleana no ke aʻo ʻana i nā haumāna.

Ke kahe ka wai i ka loʻi kalo, kahe ka ʻike i nā haumāna. Ke kahe ka wai i ke kaiāulu, hele pū nā haumāna i ke kaiāulu e kaʻanalike i ka ʻike. Ke hoʻi ka wai i ka ʻāina, hoʻi hou ʻia ka ʻikena a ka Hawaiʻi i ka lāhui kanaka.

Pēnei hoʻi kākou e kākoʻo ai i ke ola o ke kaiāulu. Me kēia manaʻo e hōʻike ʻia ai ke kuleana luaʻole o nā kumu o Hawaiʻi nei i ka lāhui.

He polokalamu aʻo kumu ʻo Kahoʻiwai i laikini ʻia e HTSB (Hawaii Teacher Standards Board) a i ʻāpono ʻia e WINHEC (World Indigenous Nations Higher Education Consortium). Ma ia polokalamu nei, kakoʻo mākou i nā kumu i hoihoi i ke aʻo ʻana i nā haumāna kula haʻahaʻa (K-6) a me nā kumu i hoihoi i ke aʻo ʻana i nā haumāna kula waena a kiʻekiʻe (6-12) ma nā kumuhana makemakika, ʻepekema, ʻike Hawaiʻi, pilikanaka a me ka Pelekānia.

Ua hiki ke hoʻokō ʻia nā kuleana o ka palapala aʻo kumu ma loko o 15 a 21 mahina. Aia ka nui o ke kuleana ma ō ka pūnaewele puni honu, akā naʻe, hui nā kumu no ʻekolu lā i kēlā me kēia kau e hoʻomoana a hoʻokaʻaʻike i nā kuleana aloha ʻāina a me nā kuleana ʻoihana kumu.

He waiwai nō ke aʻo ʻana i nā kuleana o ka ʻoihana kumu a pēlā hoʻi ka waiwai o ke aʻo ʻana i nā loina a manaʻo Hawaiʻi.

Ma Kahoʻiwai, o ke aʻo a mālama ʻana i nā haumāna ʻo Hawaiʻi pae ʻāina he kuleana i hoʻohanohano nui ʻia. He kuleana ko kākou e hoʻomau i ke ea o ka ʻāina ma o ke aloha, ka mālama, ke kōkua, ka mahalo, ke kūlia, a me ka pono.

Ke hoʻokō ʻia kēia mau manaʻo a ke ʻike pono nā kumu i ka waiwai o ia mau manaʻo no ka pono o ka lāhui, e holomua nō ana ka lāhui.

Kahoʻiwai Teacher Education Program

For more information visit: kahoiwai.kalo.org, or call: (808) 339-7795
PO Box 6511 Kamuela, HI 96743