Photo: Kuahu atop Mauna Kea
The juxtaposition of a kuahu (altar) atop Mauna Kea stands in stark contrast to the row of telescopes visible in the background. - Photo: Galyna Andruskhko/AdobeStock

Read this article in English

Na Ed Kalama | Unuhi ʻia e Keʻala Neumann

Ma ka lā 17 o Ianuali 2024, ua waiho ke Keʻena Kuleana Hawaiʻi (OHA) i kahi hoʻopiʻi i mua o ka ʻAha Kaʻapuni e kūʻē ana i ka pono kānāwai o Kānāwai 255 nāna i hoʻokumu i ka Mauna Kea Stewardship and Oversight Authority (Authority). Ua hoʻoholo ʻia ke Kānāwai 255 e ka ʻAhaʻōlelo o ka Mokuʻāina ʻo Hawaiʻi a ua kau inoa ʻia i kānāwai e ke kiaʻāina ʻo David Ige i ka makahiki 2022.

Ua hoʻokuleana ke Kānāwai 255 i ka Authority e lilo i ʻoihana mokuʻāina nui nona ke kuleana ʻo ka mālama ʻana i nā ʻāina Mauna Kea, he mahele o nā ʻāina lei aliʻi. Ma ka hoʻokumu ʻana i ka Authority, ua hoʻokumu ʻo Act 255 i hui kahu hou, e hoʻokuʻu ana i ka mokuʻāina mai nā kuleana a pau e pili ana i ka mālama ʻana iā Mauna Kea e like me ka mea i koi ʻia ma ko ka mokuʻāina palapala hoʻolimalima ma waena o ka Papa Kumuwaiwai ʻĀina a me ke Kulanui o Hawaiʻi (UH) i komo i ka lā 21 o Iune, 1968.

He 11 mau lālā, ua hoʻomaka ka Authority e hui ma Iune o 2023 me ka manaʻo e lilo ka mana o ka mālama ʻana i kēia mau ʻāina mai ka UH a me ka ʻOihana Kumuwaiwai ʻĀina i loko o ʻehā makahiki. ʻAʻohe ʻelele o OHA ma ka Authority.

Ma ka Kānāwai 255, mālama ʻia kahi noho ma ka Authority no ka ʻelele no nā ʻohenānā ma Mauna Kea. Lilo kēia i hihia pili makemake i hiki ai i kēlā ʻelele ke koho i nā hana e pono ai lākou. He ʻaʻe ʻaelike kēia a he ʻaʻe kuleana pili kānāwai pū kekahi.

Eia hou, hemahema ke ʻano o ka Authority i hoʻokumu ʻia e ke Kānāwai 255 a e ʻimi ana i ka mālama ʻokoʻa ʻana i nā ʻāina o Mauna Kea no ka pono o ka papahana kilo hōkū UH wale nō a he hoʻopōʻino i nā kumu waiwai noho kahu ʻē aʻe a pēlā pū i nā hoʻoilina o ka waiwai noho kahu ʻāina lei aliʻi.

“He wahi kapu ʻo Mauna Kea no ka poʻe Hawaiʻi. No OHA ke kuleana ʻo ke kākoʻo ʻana i nā ʻōiwi Hawaiʻi a me ka hoʻomalu ʻana i nā kumuwaiwai Hawaiʻi,” wahi a Carmen “Hulu” Lindsey, ka Luna Hoʻomalu o ka Papa Kahu Waiwai o OHA. “Ma ka nui, ʻo kā mākou pahuhopu ka noa ʻana mai o ka mauna a e ʻoi aku ka pale ʻana i nā hana ʻino o nā makahiki he 50 a ʻoi i hala iho nei.”

ʻO ka hoʻopiʻi o OHA i ka makahiki 2017, i pili i ka hoʻokele hewa ʻia ʻana o nā ʻāina o Mauna Kea, ua ola i loko nō o ka hoʻāʻo ʻana o ka mokuʻāina a me ko UH e hōʻike i ka makehewa o kā OHA. Ke ʻimi nei ʻo OHA e hoʻopau i ka Authority a hōʻoia ʻia ka pono o ka hoʻopiʻi OHA o ka makahiki 2017 i ka ʻaha hoʻokolokolo.

“Ua hoʻolālā ʻia kēia hoʻopiʻi hou ʻana no ka pale ʻana i nā pono o ka poʻe Hawaiʻi ʻo ia kekahi o nā hoʻoilina o nā ʻāina o Mauna Kea a i loaʻa ʻole ka pōmaikaʻi mai ka mokuʻāina, he ʻokoʻa loa i nā pono he nui o ke Kulanui o Hawaiʻi a me nā pono kilo hōkū i loaʻa mai no nā makahiki he nui,” wahi a Robert Klein, ka ʻōlelo aʻoaʻo o ka Papa Kahu Waiwai o OHA.

No ka ʻike hou aku e kele iā www.oha.org/maunakea.