“ʻAʻohe Hana Nui ke Alu ʻia.” E Alu Kākou i ke Kikokiko i nā Leo Mānaleo Hawaiʻi

0
394

Read this article in English

Na Bruce Torres Fischer, Kaʻawaloa Kauaʻula, a me Larry Kimura

Wahi a kahiko, “ʻAʻohe hana nui ke alu ʻia.” Ma ke kaha pūnaewele ʻo Ulukau e waiho ʻia nei he ʻohina pūnaewele i kapa ʻia kona inoa ʻo Kaniʻāina: Voices of the Land, kahi hoʻi e mālama ʻia nei nā leo a wikiō nona ka ʻike a moʻolelo o ko Hawaiʻi mau mānaleo ʻōlelo Hawaiʻi hope loa. ʻO ka pahu hopu nui a Kaniʻāina, ʻo ia hoʻi kēia: He hoʻolaha a hoʻolako aku i ua mau leo a wikiō nei no ka lehulehu e moni aku i ia ʻike a nā kūpuna i hoʻopāhola maila i mua o kākou, i kahua hoʻi no ka ʻōlelo Hawaiʻi, nā ʻohana, nā haumāna, a me nā kumu o nei pae ʻāina e noke nei e hōʻeuʻeu i ke ola o ka ʻōlelo o ka ʻāina.

ʻO ka polokalamu lēkiō ʻo Ka Leo Hawaiʻi kekahi ʻohina nui loa o Kaniʻāina i piha i ka 500 a ʻoi hola o nā nīnauele mānaleo a me nā mea kelepona o ua polokolamu lēkiō nei, i hoʻolele ʻia hoʻi ma KCCN mai ka 1972 a i ka 1988. Eia ke hoʻolaha aku nei ʻo Kaniʻāina i kekahi māhele hou na ka lehulehu o kekahi mau pae mākau ʻōlelo Hawaiʻi e hoʻohana aku ma www.ulukau.org/kaniaina, i kōkua hoʻi paha ʻoukou ma ka hoʻolohe a palapala ʻana aku i ka leo mānaleo Hawaiʻi ma nā polokalamu ʻo Ka Leo Hawaiʻi, ma ua hana nei hoʻi he alu kikoleo. Ma o ke alu ʻana ma nei hana e kākoʻo a e hōʻeleu aʻe ai i ka noiʻi nowelo ʻike waiwai e hoʻopōmaikaʻi ʻia ai hoʻi ko kākou mākau lohe a palapala leo ʻana aku i nā ʻōlelo makamae mānaleo.

E alu mai! E komo like kā-kou i ke kikokiko ʻana i ka leo mānaleo! E nā hoa makeʻe ʻōlelo Hawaiʻi, nā haumāna, a me nā kumu, e komo like kākou ma ia hana he alu kikoleo. He hana none nō paha ia, ʻo ka hoʻoikaika like ʻana naʻe i kā kākou ʻōlelo Hawaiʻi ka hua e hoʻomanawanui aʻe ai kākou!

Ua hoʻopaʻa palapala a wikiō ʻia nā ʻōkuhi no ke alu kikoleo ʻana ma www.ulukau.org/kaniaina ke kipa aku i ka paena pūnaewele nona nā polokolamu Ka Leo Hawaiʻi. E lilo ʻo ʻoe he mea palapala leo!