Awaiāulu: ʻO ka ʻIke ka Mea Nui

0
211

Read this article in English

Unuhi ʻia e Manakō Tanaka

Ua ao Hawaiʻi ke ʻōlino nei, ua mālamalama hoʻi i loko o nā makahiki he 50 i kaʻa hope aku nei ma muli o nā hana kupaianaha like ʻole.

Pili hoʻi kēia moʻolelo i ʻelua mau malihini i manaʻolana aʻela no ka laha maikaʻi o ka ʻike Hawaiʻi kuʻuna i mua o ka lehulehu ma o ka ʻōlelo Hawaiʻi. ʻAʻole hoʻi ua mau malihini nei he mau ʻōiwi, a ʻaʻohe hoʻi ʻike o lāua nei no nā mea Hawaiʻi ma mua o ka hiki ʻana mai i Hawaiʻi nei.

Photo: Puakea Nogelmeier
Puakea Nogelmeier – Courtesy Photos

I hiki mua maila ʻo Marvin Puakea Nogelmeier i Honolulu nei i ka mahina ʻo Mei i ka makahiki 1972 no St. Paul, Minnesota mai, ma kona wā 18 makahiki, me ka manaʻo e kipa wale mai no kekahi mau lā ma mua o ka hoʻomau ʻana aku i Iāpana. Ua nalowale naʻe ko ia nei ʻeke kālā, a pilikia auaneʻi. Hala kekahi mau lā, a lilo nā lā i mau pule; hala kekahi mau mahina, a lilo i mau makahiki a ua noho paʻa, ʻaʻole i haʻalele aku.

ʻO ke komo pū ʻana o Nogelmeier i ka hālau hula kāne me ʻeono mau hoa, he huliau nō. “Me ko mākou kumu, ʻo Mililani Allen hoʻi, koi ʻia ka unuhi i nā mele, ka hoʻopaʻa moʻolelo, a me ka hana ʻana hoʻi i haʻawina hoʻihoʻi,” wahi āna. “Kāhāhā hoʻi?! He aupuni mōʻī ko Hawaiʻi, a he ʻōlelo hoʻi ko Hawaiʻi? Ua maopopo ihola au, he ʻike koʻu, ʻaʻohe naʻe ʻike no nā mea Hawaiʻi. Ma ia mea, he ʻumeke ʻolohaka hoʻi hā.”

Ua walewaha nā oli Hawaiʻi iā Nogelmeier, “he pīnaʻi wale nō naʻe,” wahi āna. “ʻAʻole i aʻo maoli i ka ʻōlelo. Ua makemake nō au e aʻo i ka ʻōlelo.”

I ka makahiki 1978 i hui ai ʻo ia nei me ka mea paʻi kiʻi a kālaikanaka kaulana ʻo Theodore Kelsey, he 87 ona mau makahiki ia wā, a e noho pū ana ʻo ia me kona hoa ka mea kākau ʻo June Gutmanis i Waiʻanae, a he 5 mile ma ka paikikala ka hiki ʻana mai kona hale ma Māʻili. Hānau ʻia ʻo Kelsey i Seattle, a ua neʻe honua kona ʻohana i Hilo i kona wā he 6 ona makahiki.

“I ia wā, inā ʻaʻole mākaukau ma ka ʻōlelo Hawaiʻi i Hilo, ʻaʻohe ou hoa walaʻau,” wahi a Nogelmeier. “Ua poeko ʻo Mr. Kelsey. I koʻu launa ʻana me ia, e kōkua ana ʻo ia iā June me ka unuhi ʻana i nā palapala noiʻi i kākau ʻia ma ka ʻōlelo Hawaiʻi.”

Hōʻole mua ʻo Kelsey i ke aʻo ʻana aku, akā ua ʻae aku ma hope. No nā makahiki he ʻewalu ma hope aku, a hāpauea mai ua ʻelemakule kālaiʻōlelo nei, ua hui ʻo Nogelmeier me ia no ʻelua hola ma ke emi loa i kēlā me kēia kakahiaka Pōʻalua, Pōʻahā, a me ka Lāpule.

Ma ia wā hoʻokahi, e hele ana ʻo ia i ke kulanui, a ua puka nō mai ke Kulanui o Hawaiʻi ma Mānoa i ka makahiki 1983 me nā kēkelē laepua ma ka Hulikanaka a me ka ʻōlelo Hawaiʻi. No ka paʻa o ka ʻōlelo Hawaiʻi iā ia i hai koke ʻia ai ʻo ia ma ke ʻano he kumu ʻōlelo Hawaiʻi ma ke kulanui a ua hoʻomau ma ia hana nō no nā makahiki he 35.

Photo: Duane Nakila Steele
Duane Nakila Steele

I ka makahiki 1988 i komo ai ʻo Dwayne Nakila Steele i loko o kekahi o kā Nogelmeier mau papa ʻōlelo Hawaiʻi i ka wā e piha ana iā ia he 53 mau makahiki. ʻO ia ka haumāna oʻo a ʻeleu loa i loko o kā Nogelmeier papa, a ua lilo koke lāua he mau hoa aloha.

Ua hānau ʻia ma Wichita a hānai ʻia ma Denver ʻo Steele, a ua hele ʻo ia i ke Kulanui o Kololako kahi i hui ai me kāna wahine hoʻāo no Kahuku mai. Ma hope o ka noho ʻana ma ka ʻaoʻao Komohana o ʻAmelika, ua hoʻoholo ihola lāua e lilo ʻo Oʻahu ko lāua home a kau i ka pua aneane.

Ua loaʻa iā Steele he kēkelē wilikī sivila a me ka laeoʻo pā ʻoihana no ke Kulanui o Hawaiʻi ma Mānoa. I ka makahiki 1975, kūʻai ʻo ia iā Grace Brothers, he ʻoihana hoʻomoe kimeki ʻohana liʻiliʻi hoʻi, me nā hoa ʻekolu. A hala ke kekake ua kapa hou ʻia ma ka inoa ʻo Grace Pacific, ua māhuahua ia ʻoihana ma muli o kāna hana ma ke ʻano he poʻo, a i kona likaia ʻana i ka makahiki 1989, ua lilo ia ʻoihana ʻo ia kekahi o nā pā ʻoihana kūkulu hale nui loa o ka Pākīpika.

Ua nui kona manawa kaʻawale, no laila ua hiki iā Steele ke huli i ka ʻike no ka moʻolelo a me nā loina Hawaiʻi, a ua hiki pū ke lilo i kanaka i mākaukau ma ka ʻōlelo Hawaiʻi. Ma kona ʻano haʻahaʻa, ua kōkua pū ʻo ia i nā papahana me nā pāhana e mālama ana i nā mea Hawaiʻi. I loko o ia mau pāhana ke kula kaiapuni , ka papahana lekiō ʻōlelo Hawaiʻi, a ʻo kekahi hoʻi ka papahana hoʻokikohoʻe nūpepa ʻōlelo hawaiʻi i paʻi ʻia mai ke kenekulia 19 a i ke kenekulia 20, i mea e hoʻoili ʻia aʻe ai ma luna o ka pūnaewele.

Iā ia e hana pū ana me Steele ma kekahi mau pāhana, ua loaʻa iā Nogelmeier he palapala laeoʻo o ka Haʻawina Mokupuni Pākīpika a me ka laeʻula ma ka Hulikanaka. I Kepakemapa o ka makahiki 2003, ua paʻa kāna pepa nui laeʻula e pili ana i ka nui o ka ʻike i paʻi ʻia ma ka ʻōlelo Hawaiʻi i loko o nā makahiki 1800 a me ka mua o nā makahiki 1900-kākaʻikahi nā palapala i unuhi ʻia ma ka ʻōlelo Pelekānia.

“Ua aʻo nā mikionali i nā Hawaiʻi i ke kākau a me ka heluhelu, a i loko o ʻelua hanauna, lilo ʻo Hawaiʻi ʻo ia ka ʻoi o nā aupuni mākaukau i ka palapala a puni ka honua,” wahi a Nogelmeier.

“Ua paʻi ʻia he ʻelua miliona mau ʻaoʻao ma ka ʻōlelo Hawaiʻi – ua ʻoi aku ma mua o ka huina nui o ko ka Pākīpika a pau – a hoʻohana ʻia ma kahi o ʻekolu wale nō pākēneka i ke au nei ma muli o ka mana nui o ka ʻōlelo Pelekania ʻo ia ka ʻōlelo nui ma Hawaiʻi a kākaʻikahi hoʻi nā kānaka i mākaukau ma ka ʻōlelo Hawaiʻi.

Ua heluhelu ʻo Steele i ka pepa nui a Nogelmeier i loko o hoʻokahi wale nō pō, a i ke ao ʻana aʻe nīnau akula ʻo ia lā ia iā nei, “He aha hoʻi kāu hana e hana ai?”

Iā lāua e kūkākūkā ana i nā manaʻo, hoʻomanaʻo ʻo Nogelmeier i kā Steele ʻōlelo ʻana, “ʻAʻole ʻo ka ʻōlelo ka mea nui, ʻo ka ʻike ka mea nui. He huina nui o ka ʻike Hawaiʻi e hoʻomaopopo ʻole ʻia nei, a inā kākou e paʻi a hoʻolaha hou kākou i ia ʻike ma ka ʻōlelo Hawaiʻi, ʻaʻole hiki i ka 99% o nā kānaka ke heluhelu. Pono e paʻi ʻia kēia mau ʻike ma ka ʻōlelo Pelekānia a me ka ʻōlelo Hawaiʻi.

Ma ia lā hoʻokahi i hoʻokahua ʻia ai ʻo Awaiāulu, he ʻoihana kū i ka ʻauhau ʻole (501(c)3). ʻO ka mākia a lāua i hoʻoholo ai, ʻo ia hoʻi “ka hoʻomohala ʻana i nā kumu waiwai a me nā kānaka mākaukau i hiki ke hoʻopili mai i ka ʻike Hawaiʻi mai ke au i hala i ke au nei a halihali ʻia i ke au e hiki mai ana” ma o ke aʻo ʻana i nā mea unuhi; ka hoʻomohala haʻawina Hawaiʻi, a me ka noiʻi, ka unuhi, a me ka hoʻāno hou ʻana hoʻi i nā palapala ʻōlelo Hawaiʻi mai ke au i hala no ka ʻōlelo Hawaiʻi o ke au nei, a no nā kānaka ʻōlelo Pelekānia kekahi.

Lilo ʻo Nogelmeier ʻo ia ke poʻo o Awaiāulu ma ke ʻano he hapa manawa i ka hoʻomaka ʻana, akā ua lilo i manawa piha ma hope o kona likaia ʻana mai ke kulanui o Hawaiʻi ma Mānoa i ka makahiki 2018. A hiki i ko Steele hala ʻana i ka makahiki 2006, oi noke ua “nalo meli paʻahana” lā i ka hana a me ka hoʻolako ʻana i ke kālā no ka hana o ua hui nei. I kēia manawa, ke kākoʻo ʻia nei ʻo Awaiāulu ma ka nui ma o nā makana, nā puʻu kālā, a me nā ʻaelike.

A hiki i kēia, ua unuhi a paʻi hoʻi ʻo Awaiāulu i ʻeono mau puke (https://shop.awaiaulu.org), a ke hana nei nā mea unuhi akeakamai he 14, i alakaʻi ʻia e Nogelmeier, i ka puke ʻehiku. Eia pū lākou ke hoʻomohala hou aʻe nei i nā haʻawina ma luna o ke kahua paʻa pūnaewele hoʻonaʻauao ʻo Kīpapa, he papahana pūnaewele haʻawina ʻōlelo Pelekānia a me ʻōlelo Hawaiʻi i noa i nā kānaka a pau, ʻaʻole ʻo nā kumu wale nō, ʻo nā haumāna mai ka papa mālaaʻo a ike kula kiʻekiʻe (https://awaiaulu.app).

“Inā ʻaʻole kēia hana, hapa a hunehune hoʻi ka pilina o Hawaiʻi i ke au kahiko,” wahi a Nogelmeier.

“Ua paʻa ko Awaiāulu pahuhopu ʻo ia hoʻi ke aʻo ʻana i nā akeakamai o ke au hou, no ka pono o ka waihona nui o ka ʻike Hawaiʻi i hoʻopā nui ʻole ʻia no nā kekake i hala, i mea e hoʻolaha ʻia ai a puni ka honua.”