He Wehi, He Lei, He Keaka Hawaiʻi

0
170

Read this article in English

Na Tammy Hailiʻōpua Baker

No ia manaʻo ʻo ka hana keaka Hawaiʻi, he ʻehā ona mau kūkulu – ʻo ka moʻolelo, ke kūʻauhau, ka hana noʻeau, a me ka ʻōlelo Hawaiʻi. ʻO ke kūkulu mua ka moʻolelo, ʻo ia ka paepae o ko kākou hale, ʻo ia nō hoʻi kekahi o nā mea e ʻike ai kākou i ko kākou lāhui ʻana, he Hawaiʻi, he Kanaka Maoli. ʻO ke kūkulu ʻelua ke kūʻauhau, ʻo ko kākou pilina ia i nā akua, i ko kākou poʻe kūpuna, a i ko kākou ʻāina a me nā mea ola hoʻi o ko kākou pae ʻāina. ʻO ke kolu o nā kūkulu ka hana noʻeau, nā hana nowelo a nā kūpuna e laʻa me ka hana lima, ka haku mele, ka hula, ka hoʻopāpā a pēlā wale aku. ʻO ka hā o nā kūkulu ka ʻōlelo Hawaiʻi, kā kākou ʻōlelo e minamina ai. Pūkuʻi ʻia nā kūkulu ʻehā i helu ʻia ma luna aʻe nei e kuapapa ai ka hana keaka Hawaiʻi.

Photo: Kaʻiukapu Baker and Haʻehaʻe Kaʻula Krug sing onstage
ʻAnoʻi (Kaʻiukapu Baker) and Haʻehaʻe (Kaʻula Krug) sing Kuʻu Ipo i ka Heʻe Pu‘e One as they share an impassioned encounter at Āwawamalu. Photo: Jonah Boblin

He moemoeā ka hoʻokahua ʻia ʻana o nā hana keaka Hawaiʻi i kēlā me kēia makahiki. Ua ao Hawaiʻi, ke ʻōlinolino aʻe nei ka Papahana Hana Keaka Hawaiʻi ma ke Kulanui o Hawaiʻi ma Mānoa nei. He kēkelē Masters of Fine Arts (M.F.A.) ma ka Hana Keaka Hawaiʻi ke kēkelē i loaʻa ma ke Kulanui o Hawaiʻi ma Mānoa. Ua paʻa ke kēkelē M.F.A. Hana Keaka Hawaiʻi i ʻelima mau haumāna. ʻO ka lehua o ka papahana, ʻo ia hoʻi ʻo Puakahiki Kaina. Nāna i haku i ka hana keaka ʻo Nā Kau a Hiʻiaka (2017) e pili ana i ka moʻolelo o Hiʻiakaikapoliopele. I kēlā makahiki aku nei i lei pāpahi ai ʻelua haumāna M.F.A. hou aku, ʻo ia nō ʻo Kaipulaumakaniolono lāua ʻo Ākea Kahikina. ʻO He Leo Aloha kā Kaipulaumakaniolono hana keaka a ʻo Hoʻoilina kā Ākea. I ka makahiki nei i paʻa ai ke kēkelē M.F.A. Hana Keaka Hawaiʻi i ʻelua haumāna hou aku, ʻo Lily Hiʻilani Okimura (2023) lāua ʻo Iāsona Kaper (2023). No Hiʻilani, ua koho ʻo ia ala e kālele ma ka hana keaka ʻana. Ua haku a alakaʻi ʻo Iāsona i hana keaka hou, ʻo ia hoʻi ʻo Kaisara, he unuhina ʻōlelo Hawaiʻi o ka moʻolelo a Wiliama Hoʻonaueueihe ʻo Juliusa Kaisara. I kēia Mahina ʻŌlelo Hawaiʻi e puka ai kekahi hana keaka hou loa o ka papahana, ʻo Glitter in the Paʻakai na Joshua Kamoaniʻala ʻBaba’ Tavares. ʻO kēia hana keaka ka hā o nā hana keaka i haku ʻia e nā haumāna i mea e kō ai kā lākou papahana nui a me nā koina o ka M.F.A.

Ke uluāmāhiehie aʻela ka Papahana Hana Keaka Hawaiʻi ma ke Kulanui o Hawaiʻi ma Mānoa. I ke kau aku nei i wehewehe ʻia iho ai ka Papahana Laeʻula ʻImi Noiʻi (Ph.D.) ma ka Hawaiian and Indigenous Performance ma lalo o ke keʻena hana keaka. Eia hou, i mea e kākoʻo ʻia ai ka papahana hou, ua hoʻokumu ʻia ka ʻAhahui Noiʻi Noʻeau ʻŌiwi – Research Institute of Indigenous Performance (ANNO) ma o ka puʻukālā Strategic Investment Initiative na ke keʻena o Provost Michael Bruno. Na ia papahana, na ANNO, ka ʻaha kūkā noʻeau ʻōiwi e hoʻolālā ʻia nei no Malaki, a me ka puke ʻo Noiʻi Nowelo: A Survey of Hawaiian and Indigenous Performance.