Aia kekahi hōʻikeʻike hou ma ka Hale Hōʻikeʻike ʻo Pelekania i kapa ʻia “Hawaiʻi: a kingdom crossing oceans.” No kēlā hōʻikeʻike, ua hōʻiliʻili ʻia nā mea makamae Hawaiʻi mai nā waihona ʻohina Pelekania like ʻole: nā ʻahuʻula, kapa, kāhili, mea kaua a me nā mea makamae ʻē aʻe like ʻole, kekahi ua kākaʻikahi lahaʻole. Ua hōʻiliʻili ʻia ia mau mea makamae e nā poʻe ʻEulo i kipa iā Hawaiʻi Nei e like me Kapena Kuke me Kapena Vanekouwa. ʻO nā mea makamae ʻē aʻe, ua makana ʻia e ka Mōʻī Liholiho ma kāna huakaʻi ʻimi kuʻikahi i Pelekania ma ka Makahiki 1824.
ʻO ka mea koʻikoʻi o kēia hōʻikeʻike hou, ʻaʻole nō ia ka hōʻike wale ʻana i nā mea makamae, ʻoiai kupaianaha lākou pākahi, akā aia nō ma ka lawelawe huliāmahi ʻana me nā poʻe ʻŌiwi Hawaiʻi nona ka ʻike e pili ana i kēlā me kēia mea makamae.
Eia kekahi, ua kupaianaha hoʻi ka hōʻike pū ʻana i nā hana noʻeau a nā kūpuna a me nā hana noʻeau a nā mamo Hawaiʻi e like me ka pāpale i ulana ʻie ʻia e Haunani Sing a me ka mahiole i hana ʻia e kāna kāne ʻo Kumulāʻau Sing. Eia hou, aia kekahi mau pahu liʻiliʻi, he mau lapaiki, i kālai ʻia e ka mea kālai kaulana ʻo Dennis Kanaʻe Keawe ma ka hōʻike Pelekania: ʻo Akeanaliʻi me Mr. Lapaiki nā inoa.
Inā nānā ʻoe i nā kiʻi o ka wehena i hoʻoili ʻia ma Facebook, aia kekahi leiomano i hana maiau ʻia e ʻUmi Kai. Aia hoʻi kekahi kiʻi kū o kekahi mea i noʻonoʻo ʻia he kiʻi hana keaka nō ia. Na Auliʻi Mitchell, ke kumu o ka hana kiʻi hana keaka, i kuku i kapa no ua kiʻi kū ʻO ka hope loa o nā mea makamae i hana ʻia e nā mamo o ia au ʻo ia hoʻi ke ke kiʻi kū no Kekuaokalani i kālai ʻia e ka mea kālai kaulana ʻo Rocky Jensen. He mau lima ʻami ʻoni ko ke kia a ua like ia me nā kiʻi kū ma Ahuʻena.
Mahalo nō i ka Hale Hōʻikeʻike ʻo Pelekania i kēia hōʻikeʻike hou no ka mea, hiki hou iā kākou Hawaiʻi ke ʻike aloha a hoʻopili hou me ua mau mea makamae Hawaiʻi. Eia ka mahalo hoʻi i ke kono ʻana i nā mamo Hawaiʻi, e nānā a hui a kamaʻīlio pū, i mea e moʻolelo pono ai no nā mea ma ua hōʻikeʻike la.
Mahalo hoʻi iā Alice Christophe me kāna pūʻulu hui hana i ka hōʻiliʻili ʻana i nā mea makamae a pau i loaʻa iā lākou a i hoʻopaʻa pono ʻia ma kekahi puke, Hawaiʻi: a kingdom crossing oceans. E like me ke kono ʻana i nā ʻŌiwi Hawaiʻi i makana aku i mea makamae hou, ua kono hoʻi iā Christophe i nā poʻe Hawaiʻi e kākau i mokuna no ka puke: ʻo Kauʻi Sai-Dudoit, Dennis Kanaʻe, Hina Kneubuhl, Kapulani Landgraf, Akoni Nelsen, Kalei Nuʻuhiwa, Haunani me Kumulāʻau Sing, a me Haʻaililo Solomon kekahi o nā mea kākau ʻŌiwi i ka puke.
ʻO ka hana huliāmahi ma waena o ka Hale Hōʻikeʻike Pelekania me nā poʻe hana noʻeau ʻŌiwi Hawaiʻi he ʻoni huli lua o ka hana a ka hale hōʻikeʻike ma mua. ʻAʻole lākou no ka hōʻike wale i nā mea makamae i kiahai (trophy) o ka wā ʻimi ʻāina akā he wā no ke kaukaʻi ʻana i nā poʻe ʻŌiwi no ko lākou ʻike.
