Hui Mālama O Ke Kai Foundation: Aʻo Keiki, Hoʻoikaika ʻOhana, Hoʻohui Kaiāulu

0
202

Read this article in English

Photo: Mailelauliʻi Vickery
Executive Director Mailelauliʻi Vickery at Hui Mālama O Ke Kai’s site in Waimānalo. Credit: Shalia Kamakaokalani.

He hui liʻiliʻi ʻo Hui Mālama O Ke Kai Foundation (HMKF) e hana nei i nā hana maikaʻi e kōkua ai iā Waimānalo, ke ahupuaʻa a lākou e noho nei. Ua hoʻokumu ʻia ʻo HMKF e nā kamaʻāina o Waimanālo, ʻo Nani Akeo lāua ʻo Sharon Majit-Gorion i ka makahiki 1998, ma ke ʻano he hana “na ke kaiāulu a no ke kaiāulu” i mea e hoʻolako ai i ke kaiāulu i nā papahana moʻomeheu manuahi ma hope o nā hola o ke kula a me nā papahana hoʻoikaika ʻohana. Ua kahua mai i 2002 a ua lilo i pāʻoihana kū i ka ʻauhau ʻole 501(c)(3) he ʻelua makahiki ma hope mai.

Akāka ka mākia: e hoʻomohala i ke ahona, ke alakaʻi, ka mālama ʻāina, ka haʻaheo i ka moʻomeheu, a me ka mauli Hawaiʻi ma o nā loina ʻo ke aloha (ka hōʻihi ʻana i nā mea i nui aʻe ma mua o kākou iho); ka pono (e kūlia i ka pono a e ʻimi pono); ka ʻonipaʻa (e ʻonipaʻa, e hoʻokūpaʻa, a e paʻa ke kahua); a me ka mālama (e mālama, e hoʻohanohano a e hoʻomalu).

“ʻAʻole ia he mea kūpalaka, ʻaʻole ia he mea keu, he mea hoʻokahua,” wahi a Mailelauliʻi Vickery, ke poʻo a HMKF. “Paipai mākou i nā hoa hana, e hahai i kēlā ʻōlelo a e hana i kēlā me kēia lā.”

Ma ke Keiki After School Youth Development Program no nā papa ʻelima a ʻeono a me ka ʻŌpio After School Leadership Program no nā papa ʻehiku a i ka papa ʻumikūmālua, ʻai nā keiki i ka ʻai māmā, kākoʻo ʻia ma nā haʻawina kula, a aʻo lākou e pili ana iā lākou iho a me ka moʻomeheu a moʻolelo Hawaiʻi ma o ka hana ʻana ma ka ʻāina a me ke kai nō hoʻi. ʻO ia ka ʻauʻau paipu hanu ʻana, ka hoe waʻa ʻana, ka mālama ʻana i ka loʻi kalo a me ka loko iʻa ma o ka hana pū ʻana me ʻehā mau kula a me ʻumikūmālua a ʻoi mau hui Hawaiʻi ma Koʻolau, Oʻahu.

Haʻi moʻolelo nā kumu e pili ana i nā wahi a nā keiki e kipa ai, a mālama ʻia ka lawena kuʻuna, ʻo ia nō ke oli e noi komo ai. ʻO kekahi mea nui ʻo ia nō ke kilo, ka nānā pono, i kūkulu pilina nā keiki i ke ao a puni o lākou.

“E laʻa me ko lākou kilo ʻana i nā nalu, i nā makani, i nā au o ke kai a me nā ʻōuli kai ma mua o ka iho ana i kai,” ka ʻōlelo a Vickery. “Pēlā lākou e hoʻomaopopo ai i ka wā kūpono a kūpono ʻole e komo i ke kai.”

He mea nui ke kilo i ka mālama ʻāina kekahi. Ma mua o ke komo ʻana i ka loʻi kalo, aʻo mai nā keiki i ka moʻolelo o Hāloa, ke kalo, ke kuaʻana o ka poʻe Hawaiʻi . Aʻo lākou i ka hana kūpono no ka hoʻomākaukau ʻana, ke kanu ʻana, ka hoʻoulu ʻana, ka huki ʻana, ka ihi ʻana, a me ka hoʻomoʻa ʻana i ke kalo.

“He pili wehena ʻole; ke mālama aku kākou i ke kalo, ʻo ka mālama mai nō ia,” pēlā mai ʻo Vickery. “ʻO ka ʻāina ke hānai maoli iā kākou. Hoʻohana ʻia ka moʻolelo, ka ʻōlelo Hawaiʻi, a me ka ʻōlelo noʻeau, i ʻike nā keiki i nā huaʻōlelo Hawaiʻi a me nā moʻolelo o kahi a lākou e noho nei a me ka hana a lākou.”

ʻOiai like a like ka ʻolokeʻa o nā papahana ʻelua, he kahua ka papa haʻawina Keiki a kūkulu ʻia nā hana ʻŌpio ma luna aʻe o ia kahua a aʻo ʻia nā ʻōpio i ke alakaʻi.

“Koi ʻia lākou e alakaʻi,” mea mai ʻo Vickery. “Kohu like me ka moʻolelo o Hāloa, ʻo ke kuleana o ke kuaʻana ka mālama ʻana i nā kaina.”

ʻO ko lākou pou ʻekolu ka ʻOhana and Kaiāulu Program, i hoʻonoho ʻia e hoʻoikaika i ka ʻohana a nā keiki ma ka papahana ma hope o ke kula a me ke kaiāulu holoʻokoʻa. Ua hāʻawi ke Keʻena Kuleana Hawaiʻi iā HMKF i ka haʻawina kālā no ʻelua makahiki e kākoʻo ai i ke kūmakahiki no nā pule he 10-12 o ka Papahana Kālai Papa Me Pōhaku Kuʻi ʻAi, kahi e aʻo mai ai nā mea komo i ke kālai papa kuʻi ʻai a me ka pōhaku kuʻi ʻai me ka hoʻohana ʻole ʻia o nā mea hana uila.

Hoʻohana pū hoʻi ʻo HMKF i ka haʻawina kālā a ke Keʻena Kuleana Hawaiʻi e mālama i nā papa kuʻi kalo he ʻekolu hola kona lōʻihi i kapa ʻia ʻo ka Pō Kuʻi Kalo, i mālama ʻia he ʻewalu manawa o ka makahiki ma mua o ka maʻi ahulau.

“I ka malele ʻana o ka maʻi COVID ma Malaki, aia akula mākou e mālama ana i nā papahana ʻelua,” wahi a Vickery. “Ma muli o ke kāpae ʻana i ka hui ʻana mai o nā kānaka, ua hoʻomau mākou i ke aʻo Papahana Kālai Papa Me Pōhaku Kuʻiʻai ma ka hālāwai ʻana ma Zoom, ma nā wikiō YouTube, ma nā leka uila, ma ke kelepona ʻana, a me nā kumuwaiwai a mākou i haku ai ma ka lolouila a me nā ʻenehana hou.”

No nā pule he ʻumi ma ʻApelila, Mei, a me Iune, he hanana “holona kaʻa” ka hanana Kuʻi Kalo i kēlā me kēia pule. Hele nā ʻohana i ko HMKF hale ma Waimānalo ma ka Pōʻalima e kiʻi ai i ke kalo a inā he pono, kiʻi pū ʻia nā papa a me nā pōhaku kuʻi ʻai, i hiki ke kuʻi kalo ma kauhale. Hoʻihoʻi akula lākou i nā mea hana ma ka Poʻakahi.

“Ua holo pono ia mea,” kā Vickery i ʻōlelo ai. “Ua hāʻawi aku mākou i ke kalo he ʻekolu haneli paona i kēlā me kēia pule i hoʻokahi haneli ʻohana. E kali ana mākou i ko mākou mau hui pakanā loʻi e haʻi mai ua lawa ka nui o kā lākou kalo, i hiki iā mākou ke mālama hou i kekahi papahana holona kaʻa no nā pule he ʻumi.ʻ

Ua pā pū kā lākou papahana Keiki a ʻŌpio i ka maʻi ahulau. I ka wā i kū ai nā hana alo a he alo ma Malaki, ua kōkua nā limahana ma ka hana haʻawina kula ma Zoom, ua hoʻolaha ʻia ka nūhou ma ka pāpaho launa, ua lawe ʻia nā pūʻolo haʻawina i nā hale o nā haumāna, a ua kelepona ʻia nā ʻohana i kēlā me kēia pule. I ka pau ʻana o nā papahana ma Mei e like hoʻi me ka maʻa mau, a ma kahi o ka hoʻolauleʻa ʻana he alo a he alo, aia he “hōʻike ma ke ala nui”, a ua lawe ʻia ka makana, ke oka lau a me ka meaʻai i nā hale o nā haumāna.

Ua hoʻomau ʻia nā papahana ma hope o ke kula i Nowemapa, me ke kau palena ʻia o ka hana alo a he alo i ka ʻehāwale nō keiki i mālama ʻia e hoʻokahi limahana (e loli ana nō i kū i nā lula aupuni mokuʻāina a me ke aupuni pekelala a me nā mea i ʻāpono ʻia e ka CDC).

“ʻAe, aia nō kākou ma ka wā pōpilikia, akā e hoʻolālā mākou i kā mākou hana e hoʻoikaika i ka pilina o nā keiki me ka ʻohana a me ke kaiāulu ʻo Waimānalo,” wahi a Vickery. “ʻO ko mākou manaʻolana ka lawelawe ʻana i ka nui o ka poʻe i hiki, i mea e hoʻoholomua i kā mākou hana a e loli mau no ka pono. Kūlia mākou e lilo ko mākou ʻāina he 11 ona ʻeka he kikowaena ia. ʻO ka hoʻoulu i ka lāhui ka mea nui.”