Na J. Kimo Alama Keaulana
Hoihoi ke hele mākaʻikaʻi i kēlā me kēia wahi ma Hawaiʻi nei. He nui nā wahi nani a kamahaʻo ke ʻike! Aia ma ka uka o Waiheʻe i ka mokupuni ʻo Maui he wai nani. ʻO ia hoʻi ʻo Eleile.
Ma mua o ka hele huakaʻi ʻana i Eleile, e pule i ke Akua mana loa a me nā kiaʻi. E hoʻomalu mai nā kiaʻi iā ʻoe. Ke piʻi ʻoe i ke kahawai ʻo Waiheʻe, mai ʻuā i ke ala hele — e hāmau. Noho nā akua i ka waonahele.
Ke kokoke aku i Eleile, hiki ke lohe i ka leo ʻoluʻolu o ka wailele i ka pali. Ke leha kou mau maka i luna, hōʻike ʻia ka nani o ka wailele ʻo Eleile! Ke nānā iho ʻoe i lalo, ahuwale ka luawai nani ʻo Eleile.
Mai iho wale i ka wai. Hohonu a huʻihuʻi ka wai o lalo. Pono nō ʻoe e haki i ka ʻau lāʻī. E kiloi iho i ka lāʻī i loko o ka wai o lalo.
Inā ʻāwili nā lau lāʻī a mōhalu mai i ka wai lipolipo, hiki nō ke iho a ʻauʻau i ka wai. Inā ʻāwili ka lāʻī i ka wai huʻihuʻi a ʻōpili mai, e kilo pono i ka lāʻī. Ke nalo ka lāʻī i ke ʻauwili, ua huki ʻia ka lāʻī i lalo e kekahi moʻo kupua. ʻO Eleile ka nohona o ia moʻo. Mai komo i loko o ia wai!
Eia kekahi ʻōlelo aʻo: Mai komo i lole melemele ke piʻi i uka i ke kuahiwi! ʻUme mau nā moʻo i ka melemele! E mālama pono kou kaʻahele ʻana ma Hawaiʻi!
Eia kekahi lālani mele i loko o ke mele nani ʻo Eleile, he mele no Kaʻiulani:
No ka nani lau lāʻī ke aloha
I ka hoʻihoʻi wai a ka liko,
Eia kou hoa e kohu ai
ʻO Like ka wahine o ka malu.
