Ola Mau ka ʻŌlelo Hawaiʻi, ka ʻŌlelo ʻŌiwi o ka Lāhui Hawaiʻi

0
181

Read this article in English

O Pepeluali ka Mahina ʻŌlelo Hawaiʻi. I ka makahiki 2013, ua pūlima ʻia ʻo Act 28 e ke Kiaʻāina ʻo Neil Abercrombie. ʻO ia mahina ka wā e hoʻomaikaʻi, hoʻoikaika a hoʻopaipai ai i ka ʻōlelo makuahine o Hawaiʻi a puni ka paeʻāina. ʻOiai, mau nō ka maʻi ahulau ʻo COVID-19 i kēia makahiki, ʻo ka hapanui o nā hanana o kēia mahina, aia nō ma o ka punaewele i ʻole e laha hou aʻe ai ia maʻi.

Mahalo nui i nā hui like ʻole e mālama ana i nā hanana like ʻole e like me ʻAhahui ʻŌlelo Hawaiʻi, Hawaiian Mission Houses Historic Site and Archives, Hālau ʻo Kapikohānaiāmālama, Kuini Piʻolani Hawaiian Civic Club, Hawaiʻinuiākea School of Hawaiian Knowledge, Nā Pua Noʻeau (Mānoa), Hale Hoaka, Hawaiʻi Papa o ke Ao, Papahānaumokuākea Marine National Monument a pēlā wale aku. Inā he hanana kāu a hiki iā mākou ke kōkua me ka hoʻolaha ʻana i ke kaiāulu e leka ʻuila aku iā Malia Nobrega-Olivera ma nobrega@hawaii.edu.

Pīhoihoi nō kākou i ka mālama ʻana o ka ʻAhahui ʻŌlelo Hawaiʻi i mau hanana i kēia mahina ʻoiai ʻo ka makahiki 2022 he makahiki hoʻomanaʻo a hoʻolauleʻa ana i ka piha makahiki he 50 o ia hui. I loko o nā makahiki he 50 na ka ʻAhahui ʻōlelo Hawaiʻi i hāpai aʻe i ka paipai ʻana a ka hoʻonui ʻana i ka ʻōlelo Hawaiʻi; nāna i haku a kūkulu i nā haʻawina ʻōlelo Hawaiʻi, nā pāleo, nā pā sēdē, nā wikiō a me nā mea kūʻai, nāna i hoʻopuka i kahi polokalamu lekiō ʻo Ka Leo Hawaiʻi (ma KCCN), a me ka polokalamu kīwī hoʻolele kaiāulu, ʻo ia ʻo Mānaleo (ma ʻŌlelo), a pēlā wale aku. Ma ka mahina ʻōlelo Hawaiʻi e hoʻolaha a kono ana ka ʻAhahui ʻŌlelo Hawaiʻi i ke kaiāulu e lilo i lālā o ia hui. No laila, e ka lāhui e kui lima kākou me ka papa alakaʻi hou o ka ʻAhahui ʻŌlelo Hawaiʻi a kākoʻo i nā ʻano polokalamu e paipai ana i ka ʻōlelo ʻōiwi o nei ʻāina aloha nui ʻia.

  • 1 Pepeluali (6:00 p.m.): Wehena Mahina ʻŌlelo Hawaiʻi ma kā Kanaeokana Facebook
  • Ma nā Pōʻalua a pau (4:00 p.m.) me nā Pōʻahā a pau (10:00 a.m.): Hui Kamaʻilio ma Clubhouse App
  • Ma nā Pōʻakolu a pau (12:00 p.m.): nā hanana a Hawaiian Mission Houses Historic Site and Archives
  • Ma nā Pōʻalima a pau (11:30 a.m.): nā hanana a ʻAhahui ʻŌlelo Hawaiʻi
  • 22 Pepeluali (1:00 p.m.): Huakaʻi ʻŌlelo Hawaiʻi ʻĪwā ma Hawaiian Mission Houses no Kula Kamaliʻi a Kula Kiʻekiʻe
  • 27 Pepeluali (6:00 p.m.): Panina Mahina ʻŌlelo Hawaiʻi ma kā Kanaeokana Facebook

E huli i lāliʻi o nā hanana ʻōlelo Hawaiʻi a pau me nā lou punaewele ma mahinaolelohawaii.org