Ka hanana makana, hoʻokupu, ʻauhau paha i ke aliʻi no ka hoʻohanohano
Me ka ʻike nui ʻia o Pelehonuamea ma ka lua pele ʻo Kīlauea i kēia mau lā, nūnē paha kekahi i ke ʻano “hoʻokupu” kūpono iā ia. Me ka ʻike o ka puke wehewehe no ia mea, ʻo Pele “ke aliʻi” a makemake kākou e hōʻike iā ia i ka mahalo me ka hōʻihi.
I kekahi mau makahiki aku nei, ua nīnau au iā Nālani Kanakaʻole, kaʻu kumu hula, i nā mea kūpono e hoʻokupu ai iā Pele mā, a nāna mai kēia papa helu: lūʻau, ʻawa, red fish, black pig, ʻōhelo, palapalai, liko lehua, ʻieʻie, ʻōlapa, palaʻa, lehua.
Wahi a ka poʻe Kanakaʻole, pono e hoʻokupu ma loko o ka lua pele a ma kahi paha a ka pele e kahe ana, ʻaʻole e waiho wale ʻia ma ka ʻaina.
