Na Olan Leimomi Fisher a me Kahakuhailoa Poepoe, Kuaʻāina Ulu ʻAuamo
Aia ʻelua pila e hāpai ʻia ana i kēia ʻAha Kau Kānāwai e hiki mai ana i loko o ka Hale o nā Luna Makaʻāinana o Hawaiʻi nei e ka Luna Hoʻomalu Nadine Nakamura lāua ʻo ka Pelekikena ʻAha Kenekoa Ron Kouchi, e hoʻāmana ana i ka ʻOihana Kumuwaiwai ʻĀina e komo ma nā ʻaelike hoʻomalu me nā kaiāulu.
ʻO ka manaʻolana o ia kānāwai ʻaelike hoʻomalu, e hoʻāmana ʻia aku ana ka mālama ʻāina ʻana o nā kaiaulu i ko lākou ʻāina iho nō ma Hawaiʻi nei.
ʻO ke kumu o ia pila, ʻo ia nō ka Hui Makaʻāinana o Makana (Hui), he hui ʻauhau ʻole kūloko e pūlama ana i ka ʻike kuʻuna ma o ka mālama ʻana i ka ʻāina o ka Pāka Mokuʻāina o Hāʻena, a me ko lākou noi ʻana i palapala hoʻolimalima hikiāloa no ka pāka, i hōʻole ʻia aku nei e ka Papa Kumuwaiwai ʻĀina, a ua ʻae naʻe ka Papa e komo ka Hui ma kekahi ʻaelike me ka Mokuʻāina, ʻaʻohe naʻe a lā-kou mana ma luna o ia ʻāina.
I loko nō o ka loaʻa o nā ʻaelike kaiaulu-aupuni o nā ʻano like ʻole ma ʻō a ma ʻaneʻi o ka Pae ʻĀina, ʻaʻohe kaʻina kūhelu e komo ai nā kaiaulu ma nā ʻaelike hoʻomalu me ka ʻOihana Kumuwaiwai ʻĀina, a kaupalena ʻia ka mana a nā kaiaulu, he mea ia e paʻakikī ai ka hoʻomalu pono ʻana o nā kupa ʻāina i ko lākou mau wahi.
ʻO ia ke kumu i koʻikoʻi ai ka ʻāpono ʻia ʻana o ia pila i nā ʻōiwi Hawaiʻi mālama moʻomeheu, nā mahi ʻai, nā lawaiʻa, a pēlā wale aku.
ʻIke mau ʻia ka ʻOihana Kumuwaiwai ʻĀina, he ʻoihana i hiki ʻole ke hoʻomalu hoʻokahi i nā kumuwaiwai i mālama ʻia no ka lehulehu, a ma muli o kēlā, ua makepono i nā kaiaulu, e laʻa me Hāʻena, ka ʻauamo ʻana i ka nui o nā kuleana o ka hoʻomalu ʻana i ko lākou mau wahi, me ka nele pū ʻana i ka mana ʻole e hoʻokō pono ai i ke kānāwai, e hoʻokumu ai i nā kānāwai, a e lawelawe ai i nā māhele koʻikoʻi ʻē aʻe o kā lā-kou hana o ka hoʻomalu a mālama ʻana i ko lākou mau ʻāina ponoʻī.
He mea nui ka hoʻohui pū ʻana i nā ʻōiwi Hawaiʻi, a me kā lākou mau loina o ka hoʻomalu ʻana, i ka lawelawe ʻana a ka Mokuʻāina. Pehea lā ka holomua o ia lawelawe hana hoʻomalu ke hoʻāmana ʻia nā kaiaulu e koho no ko lākou pono iho nō?
Mahalo nui loa & Aloha ʻĀina Momona Kākou!
For more information on these bills email olan@kuahawaii.org, and to sign-up for Action Alerts visit here: https://forms.gle/Sp1dkWzbVEP2D2gP8.
