Na Ben Catcho
Hānau ʻia wau ma nā lapa o Mauna Kea, kahi e hānai ʻia au e ke kumu māmane, kahi e hāpai ʻia koʻu leo ma ka makani. Ma koʻu hānau ʻana ʻo koʻu haliʻa aloha mua ʻo ia nā leo i hui pū ʻia me nā mele o ka nahele.
Ulu aʻe au a ʻike ʻia ka loli o ka mauna. Maka ʻia ka lepo i nā hehi hipa. Hoʻēmi ʻia ka nui nahele. Hōʻea nā ʻelala hou, me nā maʻi e pakele ʻole ai au. Emi maila nā leo o kēlā me kēia. Kekahi o nā kakahiaka, kāhea aku au a ʻo ka leo o ka makani wale nō kai pane mai.
A mau, koʻu lele ʻana aʻe.
ʻAʻole nō mamao, aia ā kuʻu mai ma kahi kumu hou, a loaʻa mai kahi ʻanoʻano hou, kahi e piʻi hou ai ka lā. He moʻolelo ko ka mauna ma koʻu mau hulu. Naʻu e ʻauamo i nā mea i hala a me nā me ka kupu aʻe ana.
ʻIke au i nā kānaka, no kekahi o lākou he ʻānunu a he pī, no kekahi o lākou he pono a he lokomaikaʻi, kanu lākou i nā kumu a aʻo i ko mākou inoa. Kuhikuhi aku nā keiki i ka lani a ʻī maila “E nānā aku iā Palila,” piha koʻu hauʻoli.
ʻAʻole nō au he manu wale nō.
He hoʻomapopo nō au: he pilina ko ke ola.
