I ka hui ʻana o kekahi i kekahi ma Hawaiʻi, ʻo ka nīnau maʻa mau i nīnau ʻia ʻo ia ʻo “ʻO wai kou ʻohana, kou mau mākua?” a i ʻole, “Ma ke kula hea ʻoe i hele ai?” He hōʻike kēia i ka makemake o nā kupa o Hawaiʻi e ʻimi i kekahi pilina me ke kanaka hou. ʻAʻole anei?
‘Aʻole naʻe like kēlā ʻano nīnau ‘ana aku i ke au kahiko. Ma nā moʻolelo e like me ʻAukelenuiaʻikū me Māui, “lohe” ʻia kēia, “Na wai ke kupu ʻo ʻoe.” Ma ka moʻolelo na Puaʻaloa o Māui ma Haleakalā, ua hoʻouna ʻia ʻo Māui e kona makuahine ʻo Hina e kiʻi i kaula ʻaha e paʻa ai ka Lā a e hoʻolohi i kona (ka lā) hele ʻana. Ua hāʻawi ʻē ʻia e Hina iā Māui i ʻumikūmālima ʻaha a na kona kupuna ʻo Wiliwilipuhā e hāʻawi aku iā Māui i ʻaha mana hou.
Ua noho ʻo Māui me kona ʻohana ma Kīpahulu. No laila, no ka piʻi ʻana i Haleakalā ua hele ʻo Māui i ō Kaupō, ma uka ʻo Nuʻu. Ua kuhi ʻia e Hina iā Māui e huli i kumu wiliwili. Ma laila e hui ai ʻo Māui i kona kupuna. Makapō ua kupuna ʻo Wiliwilipūhā, a i kāna hoʻomoʻa ʻana i ʻēkā maiʻa no ka Lā, ua lawe malū ʻia e Māui. Kiʻi a pūlehu ke kupuna i ʻēkā maiʻa hou a miki hou iā Māui. No laila, hanu ke kupuna i ʻō a i ʻaneʻi a nīnau aʻe me ka pūʻiwa i ka ʻaihue kupuʻeu, “Na wai ke kupu, ʻo ʻoe?”
Pane mai ʻo Māui, “Nāu nō.” Nīnau aʻe ke kupuna, “Naʻu, na wai ʻoe?” Pane mai ʻo Māui, “Nāu, na Hina.” A laila, lele ihola a noho ʻo Māui i ka ʻūhā o ke kupuna e like me ke kuhikuhi a Hina.
Nīnau iho ʻo Wiliwilipūha, “He aha ka huakaʻi o ka hiki ʻana mai?” He nīnau mēheuheu kēia ke hui ke kamaʻāina i ka malihini. ʻŌlelo iho ʻo Māui, “I kiʻi mai nei au i ka lā e make no kona wikiwiki loa, ʻaʻole e māloʻo ke kapa a Hina e kuku ai. No laila, kiʻi mai nei e make ka lā.”
Eia kekahi laʻana hou o kahi nīnau hoʻokamaʻāina. I ka huli a ʻimi ʻana a Kahaʻi i kona makuakāne ʻo Hema i Kahiki, ua nīnau ʻia ia e Kāne me Kanaloa, “He aha kāu huakaʻi nui e ʻimi mau nei?” Pane ʻo Kahaʻi, “I ʻimi mai nei i ka Hema.” I kuʻu wahi manaʻo, he maikaʻi inā hoʻohana kākou i ua mau ʻōlelo kuluma o “Na wai ke kupu ʻo ʻoe?” me “He aha kāu huakaʻi o ka hiki ʻana mai?”
Aia i loko o nā moʻolelo e like me kā Puaʻaloa, nā ʻōlelo hiwahiwa a nā kūpuna i waiho ʻia na mākou ka poʻe e aʻo nei i ka ʻōlelo Hawaiʻi. Aia hoʻi nā pono ʻōiwi e like me ka mahalo ʻana i nā kūpuna. Aia hoʻi nā laʻana o ka meʻe Hawaiʻi, ʻo ia nō, kahi kanaka e paio ana no ka pono o ʻohana. Na wai ke kupu ʻo ʻoe?
Manaʻo hou: ʻEā, ʻaʻole i make ka lā iā Māui. Ua hoʻoholo pono ʻia e lāua, ʻeono malama e hele wikiwiki ai a ʻeono malama e hele mālie ai.
