Kaulana ʻo Wahiawā i nā pōhaku – ma Kūkaniloko, ka pōhaku ʻo Oʻahunui, ka pā ʻai pōhaku a ʻAikanaka, a me nā pōhaku hoʻōla ʻo Keanianiʻulaokalani.
ʻO Wahiawā kekahi “wahi o ke kani wawā” a he ahupuaʻa ia ma ka moku ʻo Waialua ma ka wā o Māʻilikūkahi. Ua hoʻohui ʻo ia me kekahi mahele o Waiʻanaeuka ma ka makahiki 1913. Ma 1925, ua hoʻohui ʻia ka ʻili ʻo Waikakalua mai Waikele o ka moku o ʻEwa me ua Wahiawā hou nei. A laila, ma ka makahiki 1932, ua hoʻohui ʻia kekahi ʻāpana ʻāina mai ka moku o Waialua me ia, ʻo ia ke kahua pūʻali koa ʻo Scholfield.
No laila, he kalana ʻōʻā ʻo Wahiawā. Aia nā pōhaku kaulana o Wahiawā i loko o kēia kalana hou. Ua hēkau ÿia nō naʻe ʻo ia e nā pōhaku.
Kūkaniloko: Aia nā pōhaku hānau keiki aliʻi ma Kūkaniloko, he mau pōhaku i hoʻokapu ʻia na Nanakaoko lāua o Kahikiokalani no ka hānau ʻana a kā lāua pua aliʻi ʻo Kapawa. Ua hānau ʻia nā aliʻi kilakila ʻo Kūkaniloko, Kalaʻimanuia, Māʻilikūkahi, a me Kākuhihewa ma ia wahi ʻihiʻihi. Wahi a kekahi, ua ʻiʻini ʻo Kamehameha e hānau ʻo Keōpūolani iā Liholiho ma ia wahi kapu aliʻi nui. Hoihoi nō kēia, wahi a Apelahama Piʻianaiʻa, Polopeka o ka Hōʻike Honua ma ke Kula Nui ma Mānoa, he mau wēlau o nā kuahiwi mauna ia mau “pōhaku,” a ʻaʻole lākou he mau pōhaku ʻiʻo nō. ʻO ia paha ke kumu o ka mana nui o Kūkaniloko.
Nā Pōhaku Hoʻōla o Wahiawā: ʻO Keanianiʻulaokalani ka inoa o ia mau pōhaku kupaianaha ʻelua. Na kekahi mahikō i ʻike iā lāua ma ke kahawai ʻo Kaukonahua a ua lawe ʻia i ka ʻāina hānai pipi a George Galbraith kokoke iā Kūkaniloko. Ma laila i mālama ʻia ai no ka poʻe Hawaiʻi nāna i hele no ka hoʻōla ʻana i nā maʻi like ʻole. He nui nā kānaka o na lāhui like ʻole i kipa pū i ua wahi la e ʻalana lei a e waiho i makana e like me ke kalo, paka, a me ke kālā. Ma hope o ke kūʻai ʻana i ka wahi nona ua mau pōhaku la, ua hoʻoneʻe ʻia lāua i ke alanui Kaleponi ma ke kaona akā ua hāʻule ka pōhaku ʻeono kapuaʻi a nahā. Ma ke kaona i hoʻomalu ʻia ai nā pōhaku a ua kipa pinepine ʻole ʻia ā hiki i ka makahiki 1988 i ka hoʻolale ʻana i ka poʻe Hindū e hoʻomana i ua mau pōhaku hoʻōla. Manaʻoʻiʻo lākou ʻo Shiva ke akua i loko o lāua. Ma muli o ka huhū o kekahi mau kānaka i nā loina hoʻomana a ka poʻe Hindū, ua pōʻalo a unuhi ʻia aʻe nā pōhaku mai ke kïmeki a ua hūnā malū ʻia e kēlā mau kānaka.
Pā ʻai pōhaku a ʻAikanaka: ʻAʻole kēia ʻAikanaka ke kupuna o Kalākaua akā he aliʻi ʻē ia i hele mai i Wahiawā mai ka ʻāina ʻē mai i o Kauaʻi me kāna lāhui. ʻO Kalōʻaikanaka ka inoa piha o ko lākou aliʻi. ʻOkoʻa ko lākou ʻōlelo, a he ʻili pāʻele ko lākou. ʻO kā lākou hana weliweli loa ka ʻai ʻana i ka ʻiʻo kanaka no ka ʻahaʻaina hoʻomana akua. ʻO ka pā ʻai he pā pōhaku. Ma hope o ke kïpaku ʻana mai Kauaʻi ua neʻepapa a noho lākou i Helemano ma Wahiawā.
Pōhaku Oʻahunui: ʻO Oʻahunui ke aliʻi nāna i hoʻokipa i ua ʻAikanaka nei i Halemano. Ma muli o ka launa ʻana me ia mau poʻe ʻaikanaka, ua lilo ʻo ia i ʻaikanaka a ua pepehi a ʻai ʻo ia i kāna poʻe ʻohana keikikāne, nā kama a kāna kaikuahine ʻo Kilikiliʻula. A laila, ua hiki mai ka makuakāne o nā keiki, ke kaikōʻeke o Oʻahunui, a ua luku ʻia ʻo Oʻahunui mā. Ua lilo ā pōhaku ko Oʻahunui kino. Wahi a ke kupuna ʻo Tom Lenchanko, aia ʻo Oʻahunui ma ke kahawai ʻo Waikakalaua. ʻÖlelo ʻia e nā kahiko, “Inā ʻaʻole ʻoe i ʻike iā Oʻahunui ʻaʻole ʻoe i ʻike iā Oʻahu.” Akā naʻe, inā ʻaʻole ʻoe i ʻike iā Kūkaniloko, ʻaʻole hoʻi ʻoe i ʻike iā Oʻahu!” Ua ʻikea nā pōhaku kaulana o Wahiawā.
