Photo: Reverend George Haina, his wife Kaluahine, their son and four daughters
Reverend George Haina, his wife Kaluahine, their son and four daughters. - Photo: A. A. Montano, 1878 (HMCS Collection)

Read this article in English

Nota: Eia ka mua o ʻekolu moʻolelo e pili ana i ka poʻe o ka Pākīpika e hele ana i Hawaiʻi no ka Festival of Pacific Arts (FestPAC) ma Iune o kēia makahiki. E hoʻohana ʻia ka hua ʻōlelo Kanaka no nā kanaka ʻŌiwi Hawaiʻi.

Ua kamaʻāina kākou i ka pilina nui o ka Polynesian Voyaging Society me Mau Piailug no Satawal, ke kāʻeʻaʻeʻa o nā hoʻokele waʻa a me ke kilo hōkū. Aia ʻo Satawal ma Yap, kekahi mokuʻāilāna i ke aupuni o Nā Mokuʻāina Hui Pū ʻIa ʻo Mikolonekia (Federated States of Micronesia, FSM). I kēia au, ua neʻekau i Hawaiʻi nā poʻe he nui no FSM me ka hapanui o lākou mai ka mokuʻāina o Chuuk. ʻAʻole naʻe kēia neʻekau kānaka no FSM ka mua mai Mikolonekia mai.

Ma ka makahiki 1877, ma ka noho aliʻi o Kalākaua, ua hōʻea mai 55 mau limahana mai Kilipaki (Kiribati, Gilberts) mai. Mai 1878 ā i ka 1887, ma kahi o 2,000 mau kānaka Kilipaki i hele mai e hana ma nā mahi kō, mahi laiki, a ma nā kīhāpai kope. ʻO lākou Kilipaki a pau he mau kānaka i bapetizo ʻia e nā mikioneli Kanaka Hawaiʻi mai nā hale pule Kalawina i kōkua a hana pū me Hailama Binamu II. ʻO Bennet Namakeha a me Kapiʻolani kekahi o nā mikioneli kaulana i hana ma waena o nā ʻōiwi o Kilipaki. Aia ma kahi o 19 mau Kanaka i hele a noho ma Abaiang ma Kilipaki ʻĀkau e like me J.W. Kanoa (1857-1864), Joel Mahoe (1857-1868), D.P. Aumai (1858-1868), a me W.B. Kapu (1863-1868). Ua luku hoʻopapau ʻia ka mikiona mua ma Abaiang e kekahi pūʻulu koa mai ka moku kuaʻau ʻo Tarawa akā ua kūkulu hou ʻia e kekahi mau Kanaka hou, ʻo ia ʻo J.D. Ahia (1871-1872), George Lelo (1876-1884), S.K. Maunaloa (1880-1881), Luther Marin (1887-1890), a me David Kaʻai (1892-1895).

Ma ka moku kuaʻau o Tarawa, kaulana no ke Kaua Honua II, ua kūkulu ʻia ka mikiona e George Haina (E nānā i ke kiʻi).ʻO Robert Maka (1865-1894) lāua ʻo J.W. Kanoa (1865-1886) nā mikioneli no Butaritari (Pūtalitali) a laila mai ʻo John Nua (1892-1895) a me Louis Mitchell (1895-1896).

Ma nā moku kuaʻau o Kilipaki Hema, ua hoʻokumu ʻia ka mikiona Kalawina ma Tabiteuea e George Lelema mua o kona hele ʻana e hana ma Abaiang. Na W.B. Kapu (1868-1893) lāua ʻo H.B. Nalimu (1872-1882) i hoʻomau ma Tabiteuea. ʻOiai ua nui nā kānaka i bapetizo ʻia, ua kaua nā Kalikiano hou me nā kānaka o Tabiteuea Hema a lilo ia i mea hoʻohilahila i ka poʻe Kalawina.

A hoʻi mai nā mikioneli Kanaka i Hawaiʻi, ua hoʻomau ʻia ke kōkua ʻana i nā Kilipaki i hele mai e hana ma ka mahi kō, ʻo ia nō ʻo Mahoe, Maka, Lono, me Kanoho. Ua haʻalele nā Kilipaki he nui mai ka hana ʻino o ka mahi kō a ua hūnā ʻia e nā Hawaiʻi. ʻO kekahi, ua male lākou i nā kānaka Hawaiʻi a ua mālama ʻia ka inoa Kilipaki ma waena o lākou ā hiki i kēia lā. ʻO ka pale waiū ʻapu niu a me ka pāʻū hula mauʻu maloʻo o nā Kilipaki kekahi o nā waiwai i lawe a mālama ʻia e nā Hawaiʻi.