Aloha e nā makamaka heluhelu i neia kolamu nūpepa. I kēlā pukana aku nei, ua nānā kākou i ka noʻeau me ka mākau heona o nā kūpuna ma ka hana ʻie me ka ʻieʻie koe ka mahiole. No laila, eia kākou ke nānā nei i ka mahiole. Ma waena o nā hoahānau Polenekia, ʻo ka Hawaiʻi wale nō i hana i ka mahiole, he pale poʻo a he hōʻailona ia no nā aliʻi.
Ua hōʻomoʻomo ʻia ke kino o ka mahiole ma ke poʻo me nā aʻa o ka ʻieʻie, kekahi mea kanu o ka waonahele. Aia kekahi mau kino o ka mahiole: 1) ka mahiole me ka haka haʻahaʻa; 2) ka mahiole me ka haka keikei; 3) ka mahiole me ka haka keikei a me nā koʻo; 4) ka mahiole lauoho; me ka 5) ka mahiole me nā pōheoheo ma kahi o ka haka – ʻaʻole i hoʻohulu ʻia kēia ʻano mahiole.
Aia ʻelua kiʻina hana no ka hoʻohulu ʻana i ka mahiole. ʻO ka hana maʻa mau ʻo ia ka ʻuo ʻana i nā ʻuo hulu ma ka nae. A laila, ua humuhumu ʻia ka nae i hoʻohulu ʻia ma ke kino o ka mahiole. ʻO kekahi kiʻina hana i ʻike ʻole ʻia e aʻu, ʻo ia nō ka wili ʻana i nā ʻuo hulu ma kekahi ʻaoʻao o ke kaula mānoanoa e like me ka ʻaha a laila ua humuhumu ʻia nā ʻaha hulu ma ke kino o ka mahiole (nānā i ke kiʻi no ka mahiole Kauaʻi). Kupaianaha nō hoʻi ka noʻeau a me ka ʻike kōliuliu o nā kūpuna.
E like me kaʻu i wehewehe ai i kēlā pukana aku nei, aia ʻelua kumu ke aʻo nei i ka hana ʻoaina ʻieʻie, ʻo ia ʻo Kumulāʻau lāua ʻo Haunani Sing. Aia lāua ke aʻo nei i nā haumāna i ka hoʻokikino ʻana i nā mahiole like ʻole. Inā hoihoi ʻoe i kēia hana noʻeau poʻokela e nāna iā kekumuhawaii.com.
