Kaleleonālani ma Mauna Kea

0
145

Read this article in English

ʻO Kaleleonālani ka inoa o ka mōʻī wahine kane make ʻo Emma a he inoa hoʻomanaʻo nō ia no kāna keiki aloha i make ma ka makahiki 1862 a me kāna kāne i make ma ka makahiki 1863.

Ma muli o ko Kaleleonālani kaumaha nui, ua hoʻouna kāna kaikunāne male, ʻo Kamehameha V, iā ia i ʻEulopa (1865-1866) e hoʻolana i kona kūmākena. Ua hoʻi mai ʻo Kaleleonālani me hoʻokahi miliona kālā (ka waiwai o kēia au) no ke kūkulu ʻana i ka hale pule hou ʻo Kana ʻAnalū akā ʻaʻole i nā kona luʻuluʻu. No laila, ua hāpai manaʻo ʻo Lot (Kamehameha V) i kāna kaikuahine male ʻo Kaleleonālani e hele i Kauaʻi a e piʻi iā Waiʻaleʻale e like me kāna i hana ai ma mua.

ʻO kēia ka huakaʻi i hoʻokaulana ʻia ai ʻo Kaleleonālani ma muli o kona wiwoʻole e noho a ao ka pō i loko o ka ʻāina ʻolokele kawaū o Alakaʻi a ua ʻike maka kāna poʻe hoa hele i kona ikaika e hoʻomau i ka huakaʻi ā hiki i Kilohana ma luna o Wainiha. Ua kapa ʻia ʻo Kaleleonālani, ʻo ia nō “Ke aliʻi piʻi mauna” a i ʻole “Ke aliʻi aʻe kuahiwi.”

Ma ka makahiki 1882, ua huakaʻi ʻo Queen Emma Kaleleonālani i Kohala a noho me James Kaʻai, J. Kekipi, a me Kamauoha ʻŌpio. A pau ʻekolu lā, ua kāmoe ʻo Kaleleonālani mā i Waimea. Ma Waimea, ua noho ʻo Kaleleonālani ma ka hale o J. Paleka. Ua noi ʻo Kaleleonālani iā Paleka e piʻi mauna, piʻi iā Mauna Kea, a e ʻike iā Waiʻau (ka puana o ko Waimea kini), kekahi pūnāwai loko ma luna o Mauna Kea. A laila, ua noi ʻo Paleka iā Wiliama Lindsey e alakaʻi iā Kaleleonālani mā i luna aʻe o Mauna Kea. He paniola helu ʻekahi ʻ Lindsey a kamaʻāina ʻo ia i ka piʻina i Mauna Kea.

Ua hoʻomaha ʻo Kaleleonālani ma Mānā me kona mau lēdē huapala ma mua o ka piʻina mauna. ʻO kekahi o nā lēdē me ka mōʻī wahine kane make ʻo ia ʻo ke kamaliʻi wahine Likelike.

Ua piʻi lākou ma luna o nā lio a ua maʻa a mākaukau “ke aliʻi piʻi mauna” e piʻi i ua mauna keikei ma Hawaiʻi. I ko lākou hiki ʻana i ka piko o ka honua, ua hāʻawe kua kekahi kupa o Kawaihae, ʻo Waiʻau Lima kona inoa, he hoahānau no Lindsey, iā Kaleleonālani mai kēlā ʻaoʻao a i kēia ʻaoʻao o Waiʻau. Ua manaʻoʻiʻo ʻia, he wai hoʻōla kēia mau wai. E ola mau ʻo Kaleleonālani.