Na J. Kimo Alama Keaulana
ʻO lepau ka inoa o kekahi aliʻi o Maui i ke au kahiko. I kekahi lā, makemake nui ʻo ia e ʻai i ka ʻuaʻu. Ua kāhea aku ʻo ia i kekahi kahuna i noho i Kaukini, he mauna i uka o Kahakuloa. ʻO Lunahoʻomoe ka inoa o ua kahuna nei.
He ʻelua keiki kāne a Lunahoʻomoe. Kaulana lāua i ka uʻi. ʻAʻole o kana mai ka nohea o ua mau keiki kāne āna. Mākaukau nō ʻo Lunahoʻomoe i ka hei manu. Kauoha ʻo ʻOlepau iā Lunahoʻomoe e hei i ka ʻuaʻu nāna.
ʻĪ aku ʻo Lunahoʻomoe iā ʻOlepau, “ʻAʻohe ʻuaʻu o uka; ʻaʻole kēia ʻo ke kau hoʻopūnana.” Ua lohe ʻia kēia ʻōlelo ʻana e kekahi mau kānaka ʻē aʻe a hele aku lākou i mua o ke aliʻi. I ke alo o ke aliʻi, ʻī aku lākou penei, “Ua hoʻopunipuni mai nei ʻo Lunahoʻomoe iā ʻoe, e ka lani ē. Aia nō ka ʻuaʻu e hei ai.”
Ua iho kēia mau kānaka i kai a hei lākou i ka ʻuaʻu na ke aliʻi. Eia nō naʻe, ua uaua ka ʻiʻo o nā manu makua. Noho ka ʻino i loko o kēia mau kānaka. Huhū ʻo ʻOlepau iā Lunahoʻomoe! Kauoha aku ke aliʻi e pau ke kahuna i ke ahi!
Eia kā, ʻo ua mau ʻuaʻu nei, uaua ke nau ʻia! ʻAʻohe ʻono! Nui hoʻi ke aloha ʻo Lunahoʻomoe me kāna mau keiki kāne iā ʻOlepau. Ua lawelawe pono nō lākou i ko lākou aliʻi. Penei ke mele oli i haku ʻia e nā keiki kāne a Lunahoʻomoe:
ʻIke iā Kaukini he lawaiʻa manu
He ʻupena kuʻu i ka noe o ko Pōkahi
Ua hoʻopulu ʻia i ka ʻohu kā kīkepa
Ke naʻi ala i luna o Kaʻauana
Ka uahi i ke kāpeku e hei ai ka
manu o Pūoaliʻi
ʻO ke aliʻi wale nō kaʻu makemake
ʻO ka luhi o māua me ia nei
Eia ʻike a. . . haʻo e. . .
ʻO ka lālani mele ʻalua, ʻo ia ka hana maʻalea. ʻO ka lālani mele ʻakolu, ʻo ia ka ʻike ʻole o ke aliʻi i ka hana ʻino. ʻO ka lālani ʻahā, ʻo ia ka hana ʻino a nā kānaka maʻalea. ʻO ka lālani ʻalima, ʻo ia ka hana punihei i ke aliʻi. ʻO ka lālani ʻaono, ʻo ia ke aloha nui a ke kahuna no kona aliʻi. ʻO ka lālani ʻahiku, ʻo ia nā keiki kāne a ke kahuna.
Auē ka noʻeau o ka poʻe haku mele o ka wā kahiko.
