Hoʻokumu ʻia ʻo Awaiaulu i ka makahiki 2003 e aʻo i ke ʻano e unuhi ai i nā mea like ʻole o loko o ka waihona ʻōlelo Hawaiʻi o ke au i hala. ʻElua makahiki ke kau aʻo o kēia hana, a he iwakālua ka helu o nā haumāna i hoʻokō i ke kau hoʻokahi, ʻelua a ʻoi o kēia aʻo ʻana. Aia kekahi ma ka ʻalima a ʻaono hoʻi o nā kau.
I ka makahiki 2017 i hoʻokomo ʻia ai ka pūʻulu hope no ke kau aʻo, a mau nō ka nui o lākou a me kā lākou poʻe kaʻi unuhi ma kēia ʻoihana aʻo a hiki i kēia lā. He hoa unuhi, kaʻi unuhi, kilo unuhi, a kumu unuhi nā kūlana i hiki aku ai.
ʻO ka manaʻo hoʻokele o Awaiaulu, ʻo ia ka huaʻi ʻana i ka waihona ʻōlelo Hawaiʻi o mua aku nei no ka hoʻolako a ʻānoni hou ʻana maila i ka ʻike Hawaiʻi o ke au i hala me ko ke ao nei. Ma kēia ʻoihana, hana ʻia nā pono ʻike no nā kānaka like ʻole, a hoʻoikaika ʻia ka mākaukau o kahi pūʻulu kanaka me ka hiki ke hana a hoʻomau i ia hana manamana no kēia hanauna a ia hanauna aku.
ʻOiai hiki i nā polokalamu “ʻike mikini” ke unuhi i ka ʻōlelo Hawaʻi i kēia manawa, he hiki pāpaʻu nō ia, a ʻoi loa aʻe kona pololei me nā mea maʻalahi. Hūhewa a ʻōkupe ia “ʻike mikini” ma ka mea pohihihi a hihia paha, e laʻa me nā mea o ke au i hala. ʻO ke kanaka akamai ka mea nāna ia hana paʻakikī.
Penei ka hana ma ke kau aʻo, kahi e hoʻohiki ʻia ai nā hola ʻumi o ka pule pākahi no ʻelua makahiki. No nā pule mua, hālāwai mau nā haumāna hou a pau me ke kumu a me nā kaʻi unuhi like ʻole no ka launa ʻana i ke ʻano o ka hana a no ka hoʻokamaʻāina ʻana iā lākou iho, ka pūʻulu.
Noho laeʻula auaneʻi kēlā me kēia haumana ma lalo o kekahi kaʻi unuhi nāna e alakaʻi i ke kaʻina hana, a nāna e paka, aʻo, a hoʻoponopono i ka hana noiʻi, ka hana kikokikona, a ka hana unuhi a kāna haumana. Hālāwai lāua i kēlā me kēia pule e aʻo pū, a hoʻokō ʻia nā māhele hana i ʻae ʻia no ko ka haumana mau hola hana o ia pule.
Ma nā pule pālua a pākolu paha (koe aku ia) hālāwai lāua ʻelua me ke kumu e kiʻei a hālō pū i ka holomua ʻana o ka hana aʻo. Lilo ka ʻumi hola o ka pule o kēia ʻano kūlana ma ka noiʻi, ke kikokiko a me ka unuhi ʻana i nā mea like ʻole o ka waihona ʻōlelo Hawaiʻi, ʻo ia hoʻi nā nūpepa, palapala, a puke paha o ka wā Aupuni Mōʻī a Panalāʻau o Hawaiʻi nei.
Manaʻolana ʻo Awaiaulu e wehe i mau kūlana aʻo hou i kēia makahiki, a hoʻolale ʻia ka mea hoihoi e waiho mai i kāna palapala moho ma mua o ka lā 1 o ʻApelila, 2026.
ʻImi ʻia ka poʻe moho me ka ʻōlelo poeko, ka hoihoi e komo i kēia ʻoihana, ka manaʻo e hoʻoulu i ka pono o ka lehulehu,a me ka hiki ke hoʻokaʻawale i ka manawa e hiki ai ke hoʻokō i nā kuleana. Inā hoihoi i ke kū ʻana i moho no ke kūlana aʻo ma Awaiaulu, e hoʻouna mai i nā koina moho o lalo nei:
- Ka ʻIke Pili: Inoa, kahi noho, helu wahi, helu kelepona, lekauila, me kāu i hana ai ma ka ʻōlelo Hawaiʻi (kula,ʻoihana, papahana a pēlā aku).
- Ka Leka Hoihoi: Hoʻokahi ʻaoʻao me ke kumu e hoihoi ai i ia kūlana aʻo.
- Kahi Unuhina: Hoʻokahi ʻaoʻao Hawaiʻi me kāu unuhina Pelekane.
Ma ka lekauila, iā: info@awaiaulu.org, a hiki nō ke lawe leka ʻia mai iā: Awaiaulu, 2667 ʻAnuʻu Place, Honolulu, Hawaiʻi 96819.
