He moʻolelo pōkole kēia no kā mākou huakaʻi ʻana i Landana i Ianuali aku nei. Ua kono ʻia au e ka Hale Hōʻikeʻike o Beretania no kekahi wehena no ka exhibit ʻo “Hawaiʻi: a kingdom crossing oceans.” Ua huakaʻi pū au me kaʻu mau kaikamahine ʻelua. Ua pīhoihoi nō mākou e ʻike maka i nā mea hoʻoilina Hawaiʻi.
I ka pae ʻana ma ke kāhua mokulele ʻo Heathrow, ālai koʻu mau maka i kekahi pelaha hoʻolaha me nā hulu hoʻoheno o ko mākou wao nāhele aloha ma kekahi ʻahuʻula kahiko loa. Hāloʻiloʻi koʻu mau maka a hiolo wale i luna o koʻu mau papalina ma muli o ka nani kamahaʻo o ua ʻahuʻula ala a i ka noho kaʻawale ʻana mai Hawaiʻi aku.
Iā mākou e holo ʻana mai ke kāhua mokulele a hiki akula i kō mākou hōkele, ua ʻike pinepine mākou o ua kiʻi ala. Aia kēlā pelaha ma ke “Tube,” ma kekahi paia i ke kaona, ma kēlā me kēia holowē like ʻole a ma nuna o nā taxi e hoʻolaha ana i nā lā e kipa aku ai i ka hōʻike.
Ma ke ahiahi o ka wehena, ua piha pono ka papahele mua o ka Hale Hōʻikeʻike o Beretania me nā kānaka like ʻole i hoʻonaninani ʻia mai ko lākou poʻo a ka hiʻu me nā lole fancy. Komo ʻia kekahi kānaka i ka pāʻū Scotland, ʻo kekahi me ka pāpala silika, a kekahi Kānaka ʻŌiwi me nā lole ʻōiwi like ʻole no ka hoʻohano- hano ʻana i nā mea Hawaiʻi o ka hōʻike. Wahi a ka lohe, ua kono ʻia he hoʻokahi kaukani mau kānaka mai nā aupuni like ʻole o ka honua e ʻike maka i ka wehena o ka hōʻike.
Ua hoʻomaka pono ke ahiahi me kekahi mau oli, hula, a kūkaʻōlelo. Ua holo pono nā mea a pau. Inā hiki, e hele ʻoe a ʻike maka o ua mea waiwai Hawaiʻi ala.
