Photo: ‘Anianiau
The exposed featherless areas around birds’ eyes, bill, and legs are susceptible to mosquito bites. Here a brightly colored male is ready for the breeding season. - Photo: Bret Nainoa Mossman

Read this article in English

Unuhi ʻia e Paige Okamura

ʻO ke ʻanianiau (Magumma parvus), ʻo ia hoʻi, the lesser Kauaʻi ʻamakihi, he ʻamakihi Hawaiʻi ʻuʻuku ia. He 10 kenimika (ma lalo iho o 4 ʻīniha) ka lōʻihi o nā ʻanianiau oʻo, a ma kahi o 10 kalame (ma lalo iho o kahi hapa ʻauneki) wale nō ka nui o kona kaumaha.

He manu ʻāpaʻakuma ia no Kauaʻi mai. Noho ka ʻanianiau i uka ma nā wao kele o Kaua’i komohana, akā, ua ʻike ʻia ka ʻanianiau ma nā wao kele i wāwahi ʻia kekahi, he manu i hiki ke ola ma waho o kona wahi noho maʻamau. Ua hoʻomaka akula ka hānai ʻana i kekahi mau ʻanianiau e nā kānaka, ʻoiai ke emi koke nei ka nui o nā ʻanianiu ma muli o ka wāwahi ʻia ʻana o ko lākou wahi noho a me nā maʻi e laha nei ma o nā lāhui manu.

He manu mūkīkī wai lehua, wai ʻōhelo, a wai alani nō ia, a ʻai nō ʻo ia i nā mū ke loaʻa. He alelo ʻōwili kona no ka ʻomo ʻana i ka wai pua. Ma hope o kona wā punua e ulu aʻe ai kona alelo, ka wā hoʻi i mākaukau ʻo ia e haʻalele ai i ka pūnana.

Hele ā melemele a ʻōmaʻo ʻoliwa nā waihoʻoluʻu o nā hulu o nā kāne ke mākaukau lākou e hoʻoulu lāhui a no laila, kuhihewa ʻia ʻo ia no ka ʻamakihi Kauaʻi. Kaulana ka ʻanianiau i kona leo kapalili, a he leo kū kahi nō kona mai nā manu ʻē aʻe a no laila, maʻalahi nō ka ʻike ʻana he ʻanianiau i ka lohe ʻana i kona leo kapalili. Me he mea lā, e kani ana ka ʻanianiau iā “weesee” ke lohe aku.