ʻO ke akekeʻe (Loxops caeruleirostris) kekahi o ʻelua mau manu mūkīkī ʻane pau halapohe ʻino ma Kauaʻi o Manokalanipō, ʻo ka ʻakikiki kekahi, a ke lele ʻāhiu nei ua manu nei i ka nahele ʻo Kōkeʻe ma ka ʻaoʻao hikina o Alakaʻi. He 150 mau makahiki i hala aku nei, ua ʻaʻa wiwoʻole ke Kuini Emma ma ia mau pali lihilihi a me ka naele kupaianaha o Kōkeʻe, a he huakaʻi ia i kaulana ai ka nani a me ka like ʻole o ke ao kūlohelohe ma ia ʻāina, a puni ka honua.
He loea peʻe ua manu akekeʻe nei, ʻaʻole ʻike a lohe ʻia hoʻi e nā kānaka kilo manu. Ma ke emi ʻana o nā manu, aia ke loli nei nā kani o ua mau manu mūkīkī Kauaʻi nei i ʻano kū like kekahi me kekahi. I kapa ʻia paha ke akekeʻe no ke keʻe hoʻi o kona nuku, a he hana maʻamau i ia manu ka huli ʻana i ka ʻai ma nā poʻo kumu lāʻau. Me ke ā kekeʻe, me he lāʻau Kepanī lā hoʻi, e kaha ai ua manu nei i nā puʻu lau a nā uku kau lāʻau. I loko nō o ka pilina o ke akekeʻe i ka manu ʻākepa, pūnana ka manu ʻākepa i nā poho kumu koa, a pūnana naʻe hoʻi ke akekeʻe i ka limu ʻāina, a alu like hoʻi ka paʻa akekeʻe i ke kūkulu ʻana kā lāua pūnana iho.
