Ka Hana Hoʻopili Honua

0
34

Read this article in English

Unuhi ‘ia e Paige M.K. Okamura

He hana lapaʻau kahiko ka hoʻopili honua, ʻo ia hoʻi, ka “earthing” a i ʻole ka “grounding”, a ke hana hou ʻia nei i kēia wā. Ua hoʻokumu ʻia kēia hana e ka poʻe ʻōiwi o ka wā kahiko loa, e laʻa me ka poʻe ʻIlikini, a ua piliwi lākou i ka mana hoʻōla ke hoʻopili ʻoe i ka mana o ka honua.

Pono e hoʻopili a hoʻopā maoli i kekahi māhele o ka honua – ka mauʻu, ka lepo, ke one, ka ʻauʻau kai ʻana, ka hele ʻana i kahawai, a pēlā wale aku. Ma kēia hoʻopā ʻana i ka honua, pili mai ke kino i nā huna ʻine o ka honua, a na ia mau huna ʻine e hoʻomānalo i nā free radical, e like me ka hana a nā antioxidant.

Ua mālama ka poʻe Hawaiʻi i ko lākou ʻano hoʻopili honua ponoʻī, a he mau hana koʻikoʻi ia no ke ola kino maikaʻi. ʻO ka hiʻuwai ka hoʻomaʻemaʻe ʻana i loko o ke kai, ke hoʻoluʻu ʻia ke kino holoʻokoʻa e hoʻomaʻemaʻe i ke kino, ka noʻonoʻo, a me ka ʻuhane.

ʻImi akula ko kākou mau kūpuna i wahi – ka nāhelehele, ke kuahiwi, a i ʻole ke kai – ma nā wahi pana no ka nanalu iho ʻana, ka pule ʻana, a me ka hoʻōla ʻana. ʻO ka hana ʻana ma ka loʻi, ka lawaiʻa ʻana, ka ʻohi lāʻau ʻana, ʻo ia kekahi mau hana koʻikoʻi no ka nohona maikaʻi a me ke ola kino maikaʻi.

Ua ʻike ʻia nā hopena maikaʻi o ka hoʻopili honua ʻana ma ka noiʻi. ʻO kekahi pepa noiʻi, ua ʻemi mai ka pehu o ke kino a me ka ʻeha o ka poʻe pilikia i nā maʻi kuluma. Ua loaʻa pū ma kekahi noiʻi ʻē aʻe, ua hoʻomaikaʻi aʻe ka hiamoe ʻana a ua ʻemi mai ka nui o ke cortisol, a he mea e hoʻoikaika ai i ke kūpalehia me ka pūnao, hōʻemi i ka maʻi, a hoʻoponopono i ka mīkā koko me ka monakō koko.

E hoʻopili honua ʻoe kēlā me kēia lā – e hele wāwae ma ka pā hale me ke kāmaʻa ʻole, e kanu i ka māla, a i ʻole e hele aku a ʻauʻau kai. ʻO nā mea maʻalahi wale nō – ka noho ʻana ma kekahi wahi mālie ke pā kou wāwae i ka honua, a i ʻole pā i ke kai, he mau hana hoʻōla ia.