Mai ka puka ʻana o ka lā i Haʻehaʻe, a i kona welona i Lehua––ola Hawaiʻi i ka ʻōlelo makuahine o ka ʻāina. A ola hou nō hoʻi ia ʻōlelo ma kēlā me kēia mahina ʻo Pepeluali: ʻo ka Mahina ʻŌlelo Hawaiʻi ia. He mahina nō hoʻi kēia e ʻōlelo ai, e lohe ai, a e noʻonoʻo ai ma ka ʻōlelo Hawaiʻi. Eia nō naʻe, aʻole nō lā i lawa he hoʻokahi wale nō mahina e wali ai ka ʻōlelo ma ko kākou kaiāulu––ma nā hale kūʻai, nā hale ʻaina, a ma hea lā hou aku. I ola maoli ka ʻōlelo i kona ʻōlelo mau ʻia ʻana e kānaka, e kamaʻāina. No ka Native Hawaiian Hospitality Association (NaHHA), koʻikoʻi ke ola ʻana o ka ʻōlelo Hawaiʻi no ka ʻoihana hoʻokipa malihini.
Ke paipai nei ʻo NaHHA i nā alakaʻi, nā limahana, nā malihini nō hoʻi, e kau nā maka ma nahha.com/olelo-hawaii, kahi e loaʻa ai he kumu waiwai no ke aʻo ʻana i ka ʻōlelo Hawaiʻi. E aʻo ʻia mai ʻo ka Pīʻapa ma o nā Hakalama Drills. E hoʻoikaika pū ʻia nō hoʻi ka ʻōlelo Hawaiʻi ma nā papa ʻōlelo Hawaiʻi e mālama ʻia i kēla me kēia mahina. E ʻike ʻia nō hoʻi nā loina hoʻokipa malihini ma ka Maʻemaʻe Toolkit.
Oiai he ʻōlelo ola ka ʻōlelo Hawaiʻi, he kuleana ko kākou a pau e mālama ai i ka ʻōlelo Hawaiʻi, i ola mau ka ʻōlelo Hawaiʻi. Pehea e kū ai ka poʻe malihini i nā mea a kākou e noʻonoʻo ana he waiwai inā ʻaʻole kākou ʻōlelo i kā kākou ʻōlelo? ʻO ko kākou leo heahea e hoʻokipa ana i ka malihini, he leo aloha nō ia. A he leo ia e ʻōlelo ana i ka ʻōlelo Hawaiʻi.
