Ko Hinakeahi mau Hoʻopōmaikaʻi ia Hilo

0
109

Read this article in English

Na Keaukulukele

Aia ʻo Puʻu Hālaʻi ma uka iki o ka pā ilina ʻo Homelani, ma ke kūlanakauhale ʻo Hilo. Ua emi mai kona nui i kēia au ma muli o ka lawe lilo loa o ka lepo a me ka pōhaku e ka poʻe no ke kūkulu hale ʻana. Mau nō naʻe kona kaulana i waena o ko Hilo a hiki loa i kēia, a ʻo ia wale nō ka puʻu e kū haʻaheo nei o nā puʻu kaulana ʻekolu o ke ahupuaʻa ʻo Punahoa.

Ma uka pono o laila ʻo Puʻu Honu, ʻo ia ka lua o nā puʻu. Ua kokoke pau loa kēia puʻu i ka lawe ʻia o kona lepo a me kona pōhaku ma ke kenekulia iwākalua. He wahi ʻāpana iki naʻe i koe e kū lanalana nei ma uka pono o ke alanui ʻo Komohana.

Ma uka pono o laila ʻo Puʻu ʻŌpeʻapeʻa, ke kolu ia o nā puʻu. Ua pau loa kēia puʻu he mau kekeke aku nei. He mau inoa hou aʻe ko kēia puʻu. ʻO Puʻu Aliʻi, no ko Keʻelikōlani noho ʻana i laila i ka makahiki 1881, a ʻo Puʻu Kamaliʻi kekahi inoa kaulana no ka heʻe hōlua nui o nā keiki i laila i ka wā kahiko.

Ma ke au kikilo e noho ana ke akua ʻo Hina ma Hilo me kona ʻohana nui, he mau kamaliʻi kāne a he mau kamaliʻi wahine. ʻO Hinakeahi, ʻo Hinakuluʻīua a ʻo Waiānuenue kekahi o kāna mau kaikamāhine. ʻO Hinakeahi, he mau inoa kona, ʻo Hinaikeahi, ʻo Hinaʻauʻauwai, a ʻo Hinaikawai kekahi. Ua pili ia mau inoa i kēia moʻolelo. ʻO Hinakuluʻīua, he inoa hou kona kekahi, ʻo Hinaikaua.

Ua hoʻokuleana ʻo Hinaakalana iā Hinakeahi i ka puʻu ʻo Hālaʻi a me ko laila poʻe makaʻāinana. A laila ua ili ʻo Puʻu Honu iā Hinakuluʻīua. ʻO Waiānuenue, ua hoʻokuleana ʻia ʻo ia i ke ānuenue.

I kekahi wā, ua pōpilikia nui ko Hilo poʻe i ka wī loa. Kaniʻuhū mau nā kānaka i ka ʻehaʻeha o ka maka pehu iʻa. Ua mae wale ka ʻuala, ke kalo, a pēlā wale aku i ka hainā o ka lā a me ke nele i ka wai ʻole.

No laila, hoʻākoakoa maila ʻo Hinakeahi i kona poʻe ma luna o Hālaʻi, a kauoha aʻela e ʻeli ʻia he lua imu nui ma luna o ia puʻu.

ʻAe akula nō ka poʻe i kāna kauoha. Ua lilo kekahi mau lā i ka hoʻomākaukau ʻana i ka imu, no ka mea, he hana nui ia a he nāwaliwali wale ka poʻe.

A pau kēlā hoʻomākaukau imu ʻana, kēnā akula ʻo Hinakeahi i nā kānaka, “He imu kēia no ka mōhai e pau ai kēia wā wī, a ʻo au nō ka mōhai. ʻAʻohe mōhai kūpono ma waena o ʻoukou, ʻo ka mōhai aliʻi ke kūpono. E komo au a e uhi ʻoukou i ka imu. A hala ʻekolu mau lā, e nānā iā kai. Na ke aliʻi wahine e kauoha mai e huʻe i ka imu i ia wā.”

ʻO ke komo nō ia o Hinakeahi i loko o nā uahi puapuaʻi o ka imu, a nalo akula mai ko lākou ʻike.

He mana ko Hinakeahi ma luna o ke ahi, no laila ʻaʻole ʻo ia i make. Ua ʻeliʻeli ʻo ia i loko o ka honua, a puka aʻela ma kekahi wahi me ka puapuaʻi pū ʻana o ka wai mai loko mai o ka honua. ʻO Pūʻou ka inoa o ia wai hou, a ua mau nō ia pūnāwai a hiki i kēia manawa, ma kekahi ʻaoʻao o ke alanui ʻo Waiānuenue mai ka Hale Paʻahao o Hilo.

Iho hou ʻo Hinakeahi i loko o ka honua, a piʻi aʻela ma kekahi wahi. Puapuaʻi ka wai ma kahi ona, a ua kapa ʻia ia wai ʻo Pōpōʻalaea. I ka wā kahiko, ʻo kahi i puka mai ai ʻo Pōpōʻalaea, aia ma uka iki o kahi o ke alanui ʻo Komohana, ma ka ʻaoʻao komohana hoʻi o ka Hale Paʻahao o Hilo. I kēia wā, ke mau nei nō kona puapuaʻi ma kai iki o ke alanui ʻo Komohana.

Komo hou ʻo Hinakeahi i ka honua, a puka ma kahi kokoke i ka Hilo Hotel i kēia manawa, a me ka East Hawaiʻi Cultural Center. ʻO Moewaʻa ka inoa o kēlā pūnāwai. Ua pau ʻo Moewaʻa ma ke kenekulia ʻumikūmāiwa i ka hoʻopihapiha ʻia i ka lepo.

Hoʻokahi hou manawa o kona komo ʻana i ka honua, a puka ʻo ia ma ka lihi kai, ma kahi e hoʻomaka nei ke alanui ʻo Haili. He ʻae one ia wahi i ia manawa. Kiʻi akula ʻoia i ka papa heʻenalu, a ʻau ʻo ia i ke kai e hālāwai ai me kahi kaikaina ona, ʻo Hinaʻōpūhalakoʻa ka inoa. Pau ia hālāwai o lāua, heʻenalu maila ʻoia a pae i uka. Waiho ihola ʻo ia i ka papa heʻenalu ma laila, a ua lilo kēlā i pōhaku. A laila, ʻauʻau ʻo Hinakeahi ma kēlā pūnāwai hou, a no ia hana i kapa ʻia ai ia wai ʻo Hinaʻauʻauwai. Ua pau kēlā pūnāwai i nā ōlaʻi o ka makahiki 1868. Aia ke alaloa ma laila i kēia manawa.

A pau kēia mau hana kupanaha a Hinakeahi, ua hala ʻē nā lā ʻekolu mai kona komo ʻana i loko o ka imu. E kali ana nō kona poʻe makaʻāinana ma luna o Hālaʻi. Kāhāhā nui lākou i ka ʻike maka ʻana i ko ke aliʻi aloha hoʻi ola ʻana mai! Kauoha ʻo ia e huʻe ʻia ka imu, a laila kāhāhā hou ka poʻe, ʻaʻole hoʻi he lua i like ai me ka nui o ka ʻai a me ka iʻa moʻa o loko!

Ua hālaʻi ia puʻu i kā Hinakeahi mau hana kupanaha i ia wā, a no laila i kapa ʻia ai ka puʻu ʻo Hālaʻi. Wahi hoʻi a ka poʻe kahiko, ua waiho hāmama ʻo Hinakeahi mā i ka imu o luna o Hālaʻi, he lua ia, a ua kapa ʻia kēlā ʻo Kaimuohina a hiki loa i kēia lā.

Pīpī holo kaʻao.