Ke kōkua nei ʻo Pat Rice, he kumu no ka manawa lōʻihi, a me kekahi mau puʻu kālā no OHA mai i Ke Kula Waena Hoʻāmana Aupuni i ka hoʻomohala ʻana i nā papahana kākoʻo haumāna.
He nui nā kānaka e kākoʻo ana i nā haumāna o Ke Kula Waena ʻo Waimea, akā he keu ke kōkua o ia kumu mākaukau loa ʻo Pat Rice.
Aia ʻo Rice ma ia kula mai ka makahiki 1975. He kumu ʻo ia i kīnohi, a laila he kumu aʻo, a laila he hope poʻo kumu, a he poʻo kumu hoʻi ʻo ia i ʻehā mau manawa. Ua līkaia ʻo ia i ʻelua manawa, akā ʻo ia mau nō kāna kākoʻo iā lākou. I kēia manawa he laekahi holomua nona ke kuleana o ka noi kālā no ka pono o ke kula, a me ka hoʻokō ʻana i nā kuleana o ka noi kālā ʻana.
“Hohonu loa koʻu aloha i ke kaiāulu ʻo Waimea,” wahi āna. “ʻOiai ua hana pū me nā kūpuna, nā mākua, a me nā ʻohana hou aʻe o ko mākou mau haumāna, he mahalo koʻu i ka pilina i ulu aʻela i loko o nā makahiki i hala, a ʻo kēia mau pilina ke kumu o koʻu noke mau ʻana i ka hana.”
A ke kōkua mau nei nō ʻo Rice. I ka hoʻi ʻana o nā haumāna i ke kahua kula ma ke emi ʻana mai o ka maʻi COVID-19, ua hoʻomaopopo koke ʻo Rice i ke ʻano ʻokoʻa o nā haumāna, a me ke ʻano ʻē o kā lākou mau lawena. Pēlā i hoʻomaka ai ʻo Rice i kāna noiʻi e pili ana i ke kākau noi kālā ʻana a paʻa maila he puʻu kālā Mālama i Nā ʻŌpio o ka huina he $60,000.
“Me ka puʻu kālā ʻo Mālama I Nā ʻŌpio i hai ai mākou i kekahi kumu pāheona/kumu aʻoaʻo i mākaukau i ke aʻoaʻo pōʻino. Ua hoʻomaopopo ihola mākou i ka hoʻi ʻana mai o nā haumāna ma hope o ka wā maʻi ahulau, e pilikia ana lākou i ka launa kanaka,a he pono nā mākua e mākaukau i ke kōkua i ia mau keiki pōpilikia loʻohia ʻoiai lākou e hoʻi hou ana i ke kahua kula,” wahi a Rice.
“ʻO ka hopena helu ʻekahi o nā papahana i loaʻa mai ma o kēia puʻu kālā, ʻo ia ka hiki i nā haumāna kānalua ke hōʻike aku i ko lākou naʻau ma o ka pāheona, ma kahi o ka kamaʻilio ʻana. Pēlā i alu like mai ai ke kumu aʻoaʻo a me nā limahana ʻē aʻe ma ke kula, a pēlā pū nā ʻohana haumāna i mea e hoʻolālā ai i ala e hoʻoponopono ai.”
“ʻO Ke Kula Waena o Waimea kekahi o ʻekolu mau kula hoʻāmana aupuni, ʻo Kamaile Academy o Oʻahu a me nā kula kamaliʻi a me kula haʻahaʻa o Kualapuʻu ma Molokaʻi kekahi nā kula o ka Hoʻokākoʻo Corporation. Hoʻokumu ʻia i ka makahiki 2002, he ʻoihana kū i ka ʻauhau ʻole ʻo Hoʻokākoʻo e mohala maila i mea e makaʻala a e hoʻololi aku i nā papahana hoʻonaʻauao ma nā kula ʻekolu. Mai loko mai o ia pūʻulu kula aia nō he 15% o nā haumāna kula hoʻāmana o ke aupuni. He mau Hawaiʻi ka hapalua a ʻoi o nā haumāna ma ke Kula Waena O Waimea.”
ʻOiai ʻo Hoʻokākoʻo ka mea kākoʻo kālā no ko Waimea puʻu kālā ʻo Mālama I Nā ʻŌpio, ua kākau ʻo David Gibson, ke Poʻo Kuhina o Hoʻokākoʻo, ʻo Lydia Trinidad, ke Poʻo Kumu o Kualapuʻu, a me Rice i ka puʻu kālā ʻelua mai OHA, a ua lilo nō.
Hana mai ana ʻo Hoʻokākoʻo i ka papahana ʻo Ke Awa Hoʻomalu ma Ke Kula Waena o Waimea a me Ke Kula ʻo Kualapuʻu ma ka Puʻu Kālā Kaiāulu maiā OHA o ka huina he $220,000. I waena o ʻelua makahiki o ia puʻu kālā e hoʻopiʻi ʻia ana ka hoʻonaʻauao ʻōiwi i kū ma ka ʻāina, a me nā papahana hou aku no ka pono noʻonoʻo o nā keiki Hawaiʻi a me ko lākou mau ʻohana ma nā kula a ʻelua.
“I loko nō o ko mākou manaʻolana nui, nele Ke Kula Waena ʻo Waimea i nā lako ʻole e kākoʻo ai ma ke ʻano kaiāulu a kula hoʻi i nā haumāna a me nā ʻohana, i hiki ai hoʻi ke hoʻoholomua i ka hoʻonaʻauao a me ka pono noʻonoʻo o ke aʻo ʻana. ʻO ke kanaka hoʻopili ʻohana i hoʻolako ʻia e ka puʻu kālā ʻo Ke Awa Hoʻomalu ka mea nāna e alu like ana me nā haumāna, a ma ko lākou mau ʻohana iho, i mea e hoʻolālā ai i nā papahana pilikino me ka manaʻo e hoʻopili aku iā lākou nei i nā papahana kula a me nā papahana kaiāulu a nā ʻohana i ʻike ʻole ai ma mua, no ka pono o nā keiki pākahi “ wahi a Rice.
“‘Oiai he kula hoʻāmana kālele Hawaiʻi mākou, hoʻohana mākou i nā pono e ʻhoʻoikaik i ko nā haumāna mākau, waiwai, a ʻike Hawaiʻi hoʻi i hiki ai ke hoʻokele aku i ke kula kiʻekiʻe a mau loa aku,’ a he mahele ia o ko lākou mākia ma Waimea. Mea nui ke kākoʻo o OHA i ka hoʻomohala ʻana i nā papahana no nā haumāna a me nā ʻohana.
