Waipunalei Album Cover

Read this article in English

Na Kainaniokalihiwai Kahaunaele

E oʻu mau kini makamaka mai ka lā hiki i Kumukahi aʻi kona welo ʻana i ke kai kāʻili lā o Lehua, waipunalei ke aloha!

I kēlā Nowemapa aku nei i hoʻolaulaha ʻia ai kaʻu pā sēdē hou ʻo Waipunalei. He 10 mau mele i pili i nā wahi pana ma Hawaiʻi nei a ma waho. He 20 a ʻoi hoa hoʻokani i komo pū i loko o kēia hana koʻikoʻi me aʻu a paʻa maila he pūʻulu mele Hawaiʻi maoli nō i mea e hoʻohialaʻai ʻia ai ka lehulehu. ʻO kekahi mea e ʻokoʻa ai paha ʻo Waipunalei, ʻo ia hoʻi ke komo ʻana mai o ka puolo no waho, ʻo ia hoʻi ka holu, he jazz hoʻi, a me ke konikonilua, he RnB hoʻi.

ʻAʻole nōhe mea hou ke komo ʻana o ka puolo no waho i loko o nā mele Hawaiʻi. He hoʻomau nō hoʻi kēia mai ka wā kahiko i lohe ai nā kānaka i puolo hou i pā ai ko lākou naʻau i ake ai hoʻi ʻo loko e lohe hou, hoʻopili, a hoʻopuka hou aku. No ia mea he holu, kuʻi maila ka lono a laha ma Hawaiʻi nei. ʻO Richard Kauhi kekahi mea nāna i hoʻokani holu i ke mele ʻo Lei Kaʻahumanu me Kona Kai ʻŌpua. Nahenahe wale kona hīmeni i ke mele kuʻuna me ka mikioi o kona lima ma ka piano. Pēia pū koʻu manaʻo ke hoʻolohe aku i ka hīmeni holu ʻana mai o Cindy Combs iā Maile Swing me ka ʻāwili ʻana i ke kī hōʻalu me ka holu.

ʻO Kaulana Versae kaʻu mele no ka ʻāina e kū kilakila maila ʻo ʻAifela i kapakapa ʻia ai kona inoa ʻo “Kauleopalisa” e aʻu nei. Haku ʻia maila ia mele me ka manaʻo e kūkulu ʻia ka puolo holu i loko ona,ʻo ia hoʻi ka puolo kaulana o Palisa. ʻOliʻoli ʻo loko i ka ʻae ʻana mai o nā loea holu o Hawaiʻi e hoʻokani mai i kaʻu mele. Ua pili nō ia mele a launa maikaʻi nō me ka holu, a hīmeni akula au a kohu ma nā ʻaoʻao ʻelua.

No ia mea ʻo ke konikonilua, kākaʻikahi kona loaʻa i loko o nā mele Hawaiʻi. Ua haku au iā He Lei Aloha No Mī Nei me ka manaʻo he mele konikonilua nō ia. Hiki ke ʻike ʻia ka launa maikaʻi o ka pōʻaiapili o ka ʻaoʻao mele me ka ʻaoʻao konikonilua. Ua hīmeni au e like me ka mau a pohā akula he mau hiʻohiʻona leo konikonilua, ʻaʻole naʻe nui. ʻO ka mea nui, launa maikaʻi nā pōʻaiapili a hīmeni ʻia me ka puana maʻemaʻe.

ʻO wau nō ka luaahi o kaʻu mele. E nanea mai!


He haku mele, he kumu ʻōlelo Hawaiʻi, a he makuahine ʻo Kainani Kahaunaele. No Anahola, Kauaʻi mai ʻo ia a noho ʻo ia i Hilo, Hawaʻi me kāna ʻohana.