Na Tyler Iokepa Gomes me N. Haʻalilio Solomon
Hoʻonui ʻia nā koho kelekaʻaʻike hikiwawe no ka poʻe e noho ʻāina hoʻopulapula nei ma o ka noa ʻana o kekahi kānāwai hōʻāmana pilikahi kahiko, i ʻae ʻia ai hoʻokahi wale nō pāʻoihana hoʻolako huahana kelekaʻaʻike. Ma o kekahi kānāwai pekelala i holo iho nei, pēlā me nā koho hou i hoʻonui ʻia aʻela, e loaʻa ai i ka poʻe kūʻai mai o luna o nā ʻāina hoʻopulapula ʻo nā lawelawe kelekaʻaʻike mai ka pāʻoihana hoʻolako a lākou i koho ponoʻī ai.
No nā makahiki lōʻihi he nui, ʻo Sandwich Isle Communications, Inc. (SIC) ka pāʻoihana hoʻolako lawelawe kelekaʻaʻike hoʻokahi ma lalo o ka Laikini 372. Hāʻawi ʻia ʻo Laikini 372 i ka hui he makua no SIC, iā Waimana Enterprises, Inc. hoʻi, i ka lā 9 o Mei i ka 1995.
Ma ka lā 30 o Iune i 2017, ua lawelawe ʻia aʻe e ke keʻena o Federal Communications Commission he Kauoha, nāna e kuhikuhi mai nei, ʻo nā koi hōʻāmana pilikahi a pau i hua mai nei no loko mai o ka Laikini 372, ke hoʻokāpae ʻia nei e ke kānāwai pekelala a no laila, he mea hiki ʻole ke hoʻokō ʻia.
I ka lā 31 o ʻAukake mai, i ka 2021, ua pau pono i ke kūʻai ʻia mai e Hawaiian Telcom nā waiwai ʻōnaepuni piliʻāina a aho lawelawe kelekaʻaʻike waiho papakū i kūʻai ʻia e ke kahu waiwai panakalupa o Paniolo Cable Company, he pāʻoihana hoʻi i kaʻa akula ma loko o ka ʻohana pāʻoihana ʻo Waimana Enterprises, Inc. ʻAʻole i kaʻa ma loko o kā HT kūʻai ʻana i kā Paniolo Cable Company mau waiwai kekahi palapala ʻaelike ʻoihana kālepa i ʻae mua ʻia me SIC. ʻO ka lā 31 o Malaki i ka 2022 ka palena e pau ai ka hoʻohana ʻia ʻana o ka ʻōnaepuni piliʻāina a aho lawelawe kelekaʻaʻike waiho papakū e SIC no ka hoʻolako lawelawe no nā ʻāina hoʻopulapula, inā ʻaʻole e hoʻonā ʻia e kekahi ʻaelike hou.
Ma muli o ko ka Federal Communications Commission Kauoha o ka 2017, a ma muli pū o kā Hawaiian Telcom kūʻai ʻana i nā waiwai ʻōnaepuni lawelawe kelekaʻaʻike ma nā ʻāina hoʻopulapula, hoʻolaulā ʻia nā koho e wae ʻia ai nā ʻano lawelawe kelekaʻaʻike like ʻole e ka poʻe hoʻolimalima, hoaʻāina, a mea ʻae ʻia hoʻi. Eia hoʻi kekahi, ma muli o kekahi palapala ʻaelike i hana ʻia ma waena o SIC me Charter Communications no ka hoʻohana ʻana i ko SIC ʻauwai paʻa, pēlā e loaʻa ai nā lawelawe he keu aku. He ʻoihana ʻo Charter Communications e kapa ʻia nei hoʻi ma ka inoa ʻo Spectrum ma Hawaiʻi nei. ʻO ka poʻe kūʻai iā ia nā lawelawe kelekaʻaʻike a SIC, aia iā lākou iho ke koho ʻana i ka hoʻomau i ka lawelawe ma lalo o SIC, a i ʻole, ma lalo o kekahi pāʻoihana hoʻolako lawelawe kelekaʻaʻike ʻē aʻe, ʻo Hawaiian Telcom, ʻo Spectrum, ʻo mea hou aku nāna ia e hoʻolako.
