Na Pililuaikekaiohilo Keala, Ed.D.
I kēlā me kēia mahina ʻo Pepeluali, ka mahina ʻōlelo Hawaiʻi, mālama ʻia nā hanana e hoʻokuluma ai i ka ʻōlelo Hawaiʻi ma o ka hoʻolauleʻa a hoʻonaʻauao ʻana i ke kaiāulu.
He wā paʻahana maoli nō kēia no nā kula kaiapuni, nā papahana hoʻonaʻauao ʻōlelo Hawaiʻi, a me kekahi wahine kūpaʻa mau i ka hoʻoulu ʻōlelo Hawaiʻi ʻana, ʻo Ekela Kaniaupio-Crozier.
Mai nā ʻaha Lā Kūkahekahe, i nā ʻaha mele Hoʻomau, i ka papahana kīwī ʻo Kulāiwi, ā i nā hanana Ola Ka ʻĪ o kēia mau lā, aia nō ʻo ʻAnakē Ekela e ʻauamo ana i ke kuleana nui o ka hoʻōla ʻana i ka ʻōlelo Hawaiʻi a me ka hōʻike ʻana i ke aloha i loko o ia ʻōlelo hiwahiwa nei.
He wahi leo mahalo a hoʻohanohano kēia iā ʻoe, e ʻAnakē Ekela, no ka nui o nā makahiki o kou aʻo, paipai, a hoʻoulu ʻana i ka ʻōlelo Hawaiʻi.
ʻO ka pahuhopu o Ola Ka ʻĪ ka hoʻokuluma ʻana i ka ʻōlelo Hawaiʻi ma o nā pāʻani, nā mele, nā hanana aʻo ʻōlelo, a me nā hoʻokūkū haʻiʻōlelo no nā haumāna kula haʻahaʻa a i ke kula kiʻekiʻe.
