Na Kanaeokana
Hoʻomaka ka Mahina ʻōlelo Hawaiʻi i ka lā 1 o Pepeluali. Na ke kaiaulu o Koʻolau e hoʻolauleʻa i ia mahina me kekahi hanana ʻōlelo Hawaiʻi ma ke Kikowaena Kūʻai ʻo Windward Mall ma ka lā ʻekahi o Pepeluali mai ka hola ʻumi kakahiaka a i ka hola ʻekolu o ka ʻauinala. He hanana manuahi na ka lehulehu.
Ua haku ʻia ka inoa o ia hanana e kekahi makuahine o ke Kula Kaiapuni ʻo S.M. Kamakau ma o ka hoʻokūkū kapa inoa. Ma kahi o ʻiwakāluakūmālima mau inoa i hāpai ʻia e nā haumāna o Kūlaniākea me Kamakau. Ua paʻakikī ke koho ʻana i hoʻokahi wale nō inoa. Puka lanakila ʻo Ola ka ʻĪ no kona ʻano nani i ka pepeiao a me ka ikaika o ka manaʻo.
Kono ʻia nō ka lehulehu e kipa i ke Kikowaena Kūʻāi ʻo Windward e noho a puni i ka ʻōlelo makuahine me nā ʻohana a me nā pāʻoihana kālepa nona ke alakaʻi ʻana i ka hoʻokuluma ʻana i ka ʻōlelo ma Koʻolau nei. Nui nā hanana manuahi i ia lā: he kiʻi ʻoniʻoni pōkole ʻo Hae Hawaiʻi, he wahi kūʻono e kāpili ʻia ai nā pālule-T me ke kiʻi haku noʻeau ʻia ʻo ka hae Hawaiʻi, he mele hoʻokipa a haʻi ʻōlelo ma ke kahua ʻāmui nui, me nā makana like ʻole e paipai ana i ke aʻo ʻōlelo Hawaiʻi ʻana. Aia ana kekahi mau kanaka akamai i ka ʻenehana i laila e kōkua aku i nā kipa e hoʻoili i nā polokolamu pāʻani a aʻo ʻōlelo Hawaiʻi i ke kelepona akamai. Eia kekahi, e hui mai ana nā kānaka kīnai ahi ʻōlelo Hawaiʻi o ka Hale Kīnai Ahi ʻo Kāneʻohe e hōʻike aku i ka hana hoʻopākele ola o ke kīnai ahi.
ʻO nā mea kākoʻo o ia hanana Ola ka ʻĪ, ʻo ia nō nā kula ʻo Kamakau me Kūlaniākea, Windward Mall, Kanaeokana a me ke komo pū ʻana mai ʻo nā kula kaiapuni mai ka ipu kukui o Makapuʻu a i ka lae o Kahuku lā.
E hoʻopili: Manuwai Peters, advocacy@kanaeokana.net or 808-534-8435
