Noelani Arista me Kuali‘i Lum ma Bloomingdale’s ma Ala Moana. - Ki‘i

Inā ua heluhelu ʻoe i kā Lee Cataluna puke, “Folks You Meet In Longs,” e minoʻaka ana ʻoe i kēia moʻolelo liʻiliʻi. ʻO Longs Kāneʻohe kāhi o kēia moʻolelo. Ma kekahi Lāpule, ua aloha mai kekahi hoa me ka pīhoihoi a ʻōlelo mai ʻo ia iaʻu penei, “Kumu, ua ʻōlelo Hawaiʻi kekahi kanaka “buff” iaʻu ma Longs!” A wehewehe ʻo ia iaʻu i nā lāliʻi o kāna ʻōlelo. A laila, ua ʻupu aʻe ka manaʻo e ʻike i kēia kanaka “buff” ma Longs Kāneʻohe. ʻAʻole au i lohe iki e pili ana i kekahi kuene hale kūʻai e ʻōlelo ana i ka ʻōlelo ʻōiwi a he ake ko‘u e hui me ia kanaka.

I ka Lāpule aʻe, ua hele huli au I ua kanaka ʻōlelo Hawaiʻi. Komo i loko o Longs, huli au, nānā, ʻaʻohe kanaka “buff”! Nolaila, ua oi hele kaʻu kūʻai ʻana i nā pono – ihoiho, kāleka, a pēlā aku. A laila, kū au ma ka laina a lauele ka manaʻo. ʻO ka hiki ʻana nō ia i mua ma ka mīkini ʻohi kālā, hoʻōho ke kuene wahine, “Aloha e Kumu Akana!” Kāhāhā! He haumana paha kēia naʻu ma mua? Nānā au ma kona lepili inoa a ua kākau ʻia ka inoa ʻo Jasmine. Auē, ʻO Jasmine Pīkake Lopez kā kēia! He haumana nō ʻo ia naʻu ma mua ma ke kula kaiapini ʻo Waiau. Hauʻoli au i ke kamaʻīlio ʻana me ia ma ka ʻōlelo ʻōiwi. Haʻi ʻo ia iaʻu e pili ana i kāna mau keiki. ʻO ka inoa o kēlā kanaka “buff” ʻo Nanea, he haumana kaiapuni i puka mai ke Kula ʻo Ānuenue.

I kekahi pule aʻe, komo au i Longs Pali. I ka hoʻi ʻana, ʻike au i kekahi wahine ma ka laina mīkini ʻohi kālā. ʻO Noe Arista, kekahi polopeka ma ke kula nui ma Mānoa, nō ia! Haʻi ʻo ia e pili ana i kekahi papahana haku mea pāʻani wikiō ma ka ʻōlelo Hawaiʻi. Kupanaha nō. Ma hope o kēnā hui ʻana, ua hui hou no māua ma Zippy’s a haʻi mai ʻo ia i kāna hui ʻana me kekahi kāne ma Bloomingdale’s. Ua hoʻolale ʻia kona maka i ka lēpili inoa ma ko ia ala kāne lakeke. ʻO Kualiʻi ka inoa. Noʻonoʻo au ʻo Kualiʻi Lum paha kēnā no ka mea ua hana ʻo ia ma Nā Mea Hawaiʻi ma mua, a ʻo ia iʻo nō. Mea mai ʻo Noelani, e hoʻomaka ana ʻo Bloomingdales e kāpili i hae Hawaiʻi ma luna o nā lēpili inoa o nā kānaka e hiki ke ʻōlelo Hawaiʻi. Maikaʻi nō kēlā!

Inā maopopo iā ʻoe i kekahi kanaka a i ʻole I kekahi ʻoihana e mālama ana i ka ʻōlelo Hawaiʻi ma ke kaiāulu e leka uila mai iā kalania@oha.org. E haʻi mai i kāu moʻolelo “Longs.”