ʻOiai kākou e hoʻohanohano ana i ka Mahina ʻŌlelo Hawaiʻi, e hiki aku paha kākou ma ʻō aku o ka hoʻolauleʻa a e ʻonipaʻa i mua o nā ālaina e ʻauʻa nei i ka holomua. I mea e ʻaeʻoia ai ka ʻōlelo Hawaiʻi i loko o ke kenekulia 21 e pono ana ka hana wiwoʻole, ke kūpaʻa ma hope o ka ʻōlelo, a me ke aukahi i ka wā e hiki mai ana.
Ma ka ʻaha kalana i hala iho nei i hoʻopiʻi aku ai kekahi haʻi manaʻo, ʻaʻole hoʻi i hiki iā ia nei ke hoʻomaopopo i ka manaʻo o kekahi mea ʻōlelo lā no ka mea ma ka ʻōlelo Hawaiʻi ia, a he “ʻōlelo make” nō hoʻi i ka noʻonoʻo o ka haʻi manaʻo. He mea kēia e hoʻomanaʻo ai kākou i nā hulikua naʻaupō e paio ana i kā kākou ʻōlelo. ʻAʻole ia he kuhihewa wale nō, akā ua hala iā lākou naʻaupō ka manaʻo ʻo ia hoʻi ua ola ka ʻōlelo Hawaiʻi e kū nei i ka welo o ko kākou lāhui. He kāhea kēia: e alu like mai kākou e hoʻonaʻauao a e paipai, i akāka leʻa ke kūlana o ka ʻōlelo Hawaiʻi ʻo ia nō ke kahua o ko kākou mau loina.
Ua piha nā kula kaiapuni a me nā papa- hana kaiapuni, a he keu hoʻi ka nui o nā ʻohana i hiki ʻole ke komo ma muli o ko lākou ʻāina e noho nei, a i ʻole no ke kumu kūʻai. Inā hoʻi he makakoho ka ʻōlelo Hawaiʻi no ko kākou lāhui, a laila e kohu ana nō hoʻi paha ke kālā, nā kumu waiwai, a me ka ʻōnaepuni i ia pahuhopu. Ma Ke Keʻena Kuleana Hawaiʻi (OHA) ua aukahi ka manaʻo i ko mākou papahana hoʻokele e kākoʻo ana i ka hoʻonaʻauao ʻana ma o nā kula kaiapuni like ʻole. He aha hou aku hoʻi ka hana?
E ola kā kākou ʻōlelo ma waho o ka lumi papa. E laha aku ma nā kahua hana, ma nā keʻena aupuni, a me nā kahua o ke kaiāulu. Ma o ka ʻike maka ʻana i ka ʻōlelo Hawaiʻi kuluma e ikaika aʻe ai ua ʻōlelo nei, a eia kekahi e pūlama mai ana ka manaʻo o nā hanauna e hiki mai ana e ʻimi ana hoʻi i ia ʻōlelo kekahi. I mea e kō ai kēia manaʻo, e hoʻololi ʻia nā kānāwai, a e hoʻoulu aku i ka hoi i loko o ko kākou mau luna e lilo ai ka ʻōlelo Hawaiʻi he mea ʻike ʻia a lohe ʻia hoʻi i kēlā lā me kēia lā.
I kēia Mahina ʻŌlelo Hawaiʻi e hoʻomanaʻo aʻe kākou: ʻo ke ola o ka ʻōlelo ke ke kuleana o kākou pākahi a pau. ʻAʻole ʻo ka mālama ʻōlelo wale nō; ʻo ka mālama mauli lāhui nō hoʻi ia. E ola ka ʻōlelo Hawaiʻi!