Aloha mai kākou,
He kuleana koʻikoʻi ko nā kahu waiwai o ke Keʻena Kuleana Hawaiʻi e mālama ai i ka Waihona Kālā no nā Hawaiʻi a pēlā pū ka hoʻoholomua ʻana i nā kuleana me nā pono o nā Hawaiʻi. Eia naʻe, ʻaʻole i hoʻonui ʻia ka uku o nā kahu waiwai mai ka makahiki 2018 ma muli o kā ke Kiaʻāina David Ige – ke kiaʻāina o ia wā – hoʻākoakoa ʻole ʻana i ke Kōmike Uku Hana no ke Keʻena Kuleana Hawaiʻi. Ma muli o kēia, ʻaʻole nō i lawa ka uku o nā kahu waiwai, a emi mai kā lākou uku hana ma lalo o ko lākou mau hoa hana kālaiʻāina ʻē aʻe o ka ʻAhaʻōlelo a me nā ʻaha kūkā o ke kūlana kauhale.
Ma lalo o ke Kānāwai Hawaiʻi (HRS) §10-9.5 i hoʻokumu ʻia ai ke Kōmike Uku Hana OHA. ʻO ko lākou kuleana ka nānā pono ʻana i nā uku hana o nā kahu waiwai o OHA a e hāpai i ko lākou manaʻo kuhikuhi i kēlā me kēia mau makahiki he ʻehā. He ʻehiku lālā ko kēia kōmike i koho ʻia e nā hui Hawaiʻi a i hoʻonoho ʻia e ke kiaʻāina. ʻAʻole uku ʻia nā lālā o kēia kōmike. Ua hala ʻeono makahiki a laila, ma ka mahina ʻo ʻOkakopa i ka makahiki 2024 i hoʻonoho ai ke Kiaʻāina Josh Green i mau lālā hou ma ke kōmike. ʻĀkoakoa mua maila ia kōmike ma Kekemapa 2024, i mea e hoʻomaka ai kā lākou hana nui.
He kuleana kālā koʻikoʻi ko nā kahu waiwai. Na lākou e mālama i nā waiwai no ka hoʻokāʻoi ʻana aʻe i ke ola o nā Hawaiʻi ʻoiai lākou e hoʻokele ʻana i loko o nā pohihihi, nā hihia, a me nā pilikia o ke aupuni. Inā ʻaʻole lawa ka uku no kēia mau kūlana hana, ʻaʻole e lawa ana ka mākaukau o nā kahu waiwai, ʻaʻole ana maikaʻi kā lākou hana no nā Hawaiʻi.
Ke manaʻo ʻia nei e puka ana ma ka hapa mua o Pepeluali 2025, ka palapala hōʻike uku hana a he manawa kūpono kēia e hoʻoponopono ʻia ai kēia kaulike ʻole. ʻO ka hoʻoponopono ʻana i ka uku o nā kahu waiwai me nā kānaka kālaiʻāina ʻē aʻe, he hana kūpono ia no ka hoʻohanohano ʻana i ko lākou ʻauamo ʻana i kēia kuleana, ka hoʻokaulike ʻana i ke aupuni, a e hōʻike ana i ke koʻikoʻi o kā lākou hana ʻana no nā Hawaiʻi. He mea kūpono kēia no OHA no ka wā e hiki mai ana – ʻaʻole ia he hoʻokaulike uku wale nō.
Me ka haʻahaʻa,
Stacy Kealohalani Ferreira
Ka Pouhana | Chief Executive Officer