Photo: Ka Na Aukake Amelika Sign
Ki‘i ma ka ‘ao‘ao Facebook a Kehau Watson Sproat #kaniwala – Ki‘i: Kehau Watson
Sproat

Ua lohe anei ‘oukou e pili ana i ke Kāniwala? Ua hiki mai ke Kāniwala (50th State Fair) i O‘ahu ma Iune o ke ahiahi o ka lā 29 a he kāniwala ‘ōlelo Hawai‘i nō ia. Inā ‘ōlelo Hawai‘i ‘oe ma ka ‘īpuka pā o ke Kāniwala, manuahi ke komo ‘ana. ‘Oiai‘o nō. Ma ke kahua kāniwala, aia nā ho‘olaha a me nā hō‘ailona a pau ma ka ‘ōlelo Hawai‘i. Ma nā holole‘a a ma nā pā‘ani, lohe ‘ia ka ‘ōlelo Hawai‘i. Wahi ā kekahi hoa ‘ōlelo Hawai‘i o‘u, he mea ho‘oniua pu‘uwai ka lohe ‘ana o ka ‘ōlelo Hawai‘i i‘ō a i ‘ane‘i a pā kona na‘au i ka le‘ale‘a o kāna mau keiki ma ke Kāniwala. Pëlā pū ka mana‘o o Ānuenue Punua ma FB, ‘ōlelo penei, “I ka ‘ike ‘ana i nā hō‘ailona a me nā kānaka ‘ōlelo Hawai‘i piha me ka ha’aheo, he nani nō.”

Photo: Kaniwala Ticket
Ki‘i ma ka ‘ao‘ao FB a Kehau Watson Sproat
#kaniwala – Ki‘i: Kehau Watson Sproat

Wahi a Donna Smith, kekahi luna me E.K. Fernandez Shows, ua kama‘ilio ‘o Trisha Kehaulani Watson-Sproat me Scott Fernandez e pili ana i kekahi noi a Kalehua Krug PhD, ka Laekahi Ho‘ona‘auao o ke Kula Kaiapauni o OHE (Office of Hawaiian Education) e mālama i kekahi hanana ‘ōlelo Hawai‘i. He ‘ohana Hawai‘i ka ‘ohana Fernandez a kaulana ko lākou kāko‘o i ka mo‘omeheu Hawai‘i. Ua ‘ae ‘o Fernandez mā a na Scott i ‘ae i ho‘okahi ahiahi o ka Fea no ke Kāniwala. No Laila, ua ho‘okō ‘ia ka moemoeā a Krug me ke kaiāulu ‘ōlelo Hawai‘i a me kona hoa Kumu Kāko‘o Kula Kaiapuni ‘o ‘Anela Iwane lāua ‘o Kamuela Yim. Mea mai ‘o Kalehua, ua makemake lākou e ho‘olaule‘a i ka piha makahiki he 30 o ka Papahana Kula Kaiapuni me kekahi hanana no nā ‘ohana a ‘i‘ini ‘ia kekahi ho‘olaule‘a ma kahi le‘ale‘a i ‘ike nā keiki, nā ‘ōpio, he ola nō ko ka ‘ōlelo ma nā wahi a pau, a ma nā wahi kūlohelohe like ‘ole. Ua komo pū kekahi ke‘ena o Ke Kula ‘o Kamehameha, ‘o Ke Ala Iwikuamo‘o ka inoa, i ka ho‘olālā ‘ana me ke alaka‘i ‘ana o Ryan “Gonzo” Gonzalez. Ua hana hakulau lākou i ka hō‘ailona lōkō a pa‘i nō lākou i nā likiki komo he 4,000 ‘oiai ua hiki mai ma kahi o 7,000 mau kānaka. Haku pū lākou i ka polokalamu (app) ‘ōlelo Hawai‘i no nā limahana. ‘O ka mea kupanaha iā Krug mā ka ‘ākoakoa ‘ana o ka po‘e ‘a‘a he 260 a ‘oi paha i loko o kekahi mau pule wale nō. He hō‘ike nō këlā i ke aloha palena ‘ole i ka ‘ōlelo Hawai‘i. Pehea ho‘i ka le‘ale‘a a me ka hau‘oli inā mālama ‘ia ke Kāniwala/Fea ‘ōlelo Hawai‘i ma nā mokupuni ‘ë aae? E ō mai!