Na Diane Peters-Nguyen, CEO, American Red Cross, Pacific Islands Region Unuhi ʻia e Manuwai Peters
I koʻu hānai ʻia ʻana, ua lohe pinepine ʻia e aʻu nā moʻolelo no koʻu kupuna wahine, ʻo Mollie Kananipauʻole Akana Peters – a me ka hoʻolauleʻa ʻia ʻana o kona lā hānau e ke Kuini ʻo Liliʻuokalani hoʻi. Ua noho ka ʻohana o koʻu kupuna wahine ma ka ʻāina o ke Kuini ma Waikīkī ma ka ʻāina i kapa ʻia ʻo Hamohamo. Ua ʻōlelo mau ʻia maila e koʻu makuakāne, i ka hānau ʻia o koʻu kupuna wahine ma ka lā ʻekolu o Kepākemapa (hoʻokahi lā ma hope o ko ke Kuini lā hānau), na ka ukali o ke Kuini, ʻo ia hoʻi ʻo “Big Tūtū” i haʻi pololei aku i ke Kuini, ua hānau ʻia mai kēia pēpē. ʻO ka makahiki 1905 nō ia. Mai ia manawa aku, ʻano pili ke Kuini i kēia pēpē, ʻo koʻu kupuna wahine hoʻi.
A i nā lā ʻekolu o Kepākemapa i kaʻa maila, ua hoʻokaʻawale ʻia aku kekahi noho paipai ma ka lānai o ka hale no ke Kuini i kona wā e kipa mai ai iā Kananipauʻole ma ia lā kūikawā no ia keiki. Ua kono pū mai ke Kuini iā Kananpauʻole e launa me ia ma ka lā ʻelua o Kepākemapa, ka lā hānau nō o Liliʻuokalani.
A hala nā makahiki, lilo koʻu makuakāne, ʻo David M. Peters i poʻokahu no ka hoʻoilina a ke Kuini, ʻo ia hoʻi ʻo Liliʻuokalani Trust (LT) ma kahi o kanakolu mau makahiki. He mea kūmau no nā kahu, nā lima hana, a me nā keiki o LT e hoʻohanohano i ke Kuini i kona lā hānau i nā makahiki a pau. A hala hou a’e nā makahiki a e noho ana au, ʻo au ka pelekikena no Hui Hānai, ua hiki iaʻu ke hoʻomau aku i kēia hana hoʻohanohano i ke Kuini a me kona hoʻoilina aloha ma o ka paʻi puke e like me Diaries of Queen Liliʻuokalani of Hawaiʻi, i loihape a hoʻonoho ʻia na David Forbes.
Ma mua o koʻu ʻae ʻana i koʻu kūlana nei ma Red Cross, ua aʻo mai au i ka hana a ke Kuini e hoʻokumu iā Hawaiʻi Red Cross. He kākoʻo nui ʻo ia ma muli o kona manaʻo paʻa i ka nuʻukia pili kanaka o Red Cross. I ka mahina ʻo Kepākemapa o ka makahiki 1917 ʻo kekahi o nā mea hope loa āna i hana ai ma mua o kona hala ʻana, ʻo ia nō ka hāʻawi manawaleʻa ʻana aku he hoʻokahi haneli kālā e lilo i lālā hou o Red Cross. Me ia makana i hoʻomaka ai kā mākou hoʻoulu lālā mua loa. I ua makahiki lā, ua ulu a 16,000 mau lālā hou – he nui nō i ia manawa ma Hawaiʻi.
Ma mua o kēia hoʻoulu lālā ʻana, na ke Kuini me nā kōkua i humuhumu i kekahi hae Red Cross nui i welo hoʻi ma luna o ka hale aliʻi ʻo ʻIolani i ka wā o ke Kaua Honua I. I ke Kuini i hāʻawi aku ai i ia hōʻailona i ka hui Red Cross i ka lā 14 o Kepākemapa o ka makahiki 1917, ua ʻōlelo akula ʻo ia “He hōʻailona kēia hae o kuʻu aloha minamina no ke kanaka.”
I koʻu lā hana mua loa ma Hawaiʻi Red Cross i ka mahina ʻo Iulai i ka makahiki 2020, hōʻea pīhoihoi aku au i ke keʻena nui ma Lēʻahi a noi pololei aku au e hōʻike mai iaʻu i kā ke Kuini Hae. Ua lawe ʻia au i ka lumi hālāwai o nā kahu, kahi e kau paʻa ai ia hae ma ka pahu aniani me ka lāʻau koa. Kāhāhā au i kona aloha. Pā mai iaʻu ka mana o ke Kuini i loko nō o nā kaula pākahi a pau i humuhumu ʻia ma ia hae. A i ia manawa nō i ʻike leʻa ai au, ua kohu pono koʻu kuleana a ʻo kēia kaʻu hana e pono ai ke kanaka.
