Hoʻomaʻemaʻe: He ʻAno Kuʻuna e Hemo ai nā Mea ʻAwahia o ke Kino

0
199

Read this article in English

He ʻoihana lapaʻau kuʻuna ka hoʻomaʻemaʻe nona ka inu ʻana i nā lāʻau hoʻomaʻemaʻe a me ka hoʻokē ʻana i nā mea ʻawahia e hoʻoponopono ʻia ai nā hemahema ma nā māhele ʻekolu o ke ola kānaka: ke ola pilikino, ke ola o ka noʻonoʻo, a me ke ola piliʻuhane. Ua manaʻo ʻia, ʻo kēia mau hemahema nō ke kumu o nā ʻano maʻi like ʻole he nui.

Ua pōmaikaʻi nō au e hana pū me kekahi hui i aʻoaʻo ʻia ma kēia ʻoihana lapaʻau e kekahi loea i kaulana a puni ka honua, ʻo ia hoʻi ʻo ʻAnakē Margaret Machado, he loea hoʻi ma kēia ʻoihana ʻoiai ua ili mai kēia ʻike ma kona ʻohana mai kekahi hanauna a i kekahi no nā hanauna he nui.

ʻAʻole he ʻoihana maʻalahi a wikiwiki ka hoʻomaʻemaʻe; a pono e noho paʻa no ka lawelawe ʻia a hala kekahi mau lā.

No ka hana ʻana i kēia ʻoihana, pono nō ka hoʻomaha pinepine ʻana, ka inu ʻana i nā lāʻau i nā manawa i hoʻolālā ʻia, a me nā ʻano hana hoʻopolapola like ʻole e like me ka lomilomi, ka hoʻoponopono, ka lāʻau lapaʻau, a pēlā aku. I nā ahiahi, mālama ʻia ka papa ʻai pono e aʻo ai nā kānaka i ka ʻike e pono ai ka hoʻomaʻemaʻe kino e mau ana i nā pule ma hope o ka haʻalele ʻana i ka polokolamu.

He lau a he huaʻai i hoʻomākaukau ʻole ʻia me ka ʻaila a me ke kōpaʻa wale nō ke ʻano o ka ʻai i hānai ʻia. Hoʻokē ʻia ka ʻai ʻana i nā ʻano ʻai ʻē aʻe a pau, ʻoiai ʻo ia nō kekahi mea e keʻakeʻa ana i ka hemo ʻana o nā mea ʻawahia o ke kino, e hoʻolohi ana i ka lapaʻau ʻana, a e paipai ana hoʻi i ka omo hou ʻia mai o nā mea ʻawahia i hemo ʻē akula.

ʻOiai ʻo ka mea ʻai Hawaiʻi kuʻuna ka hapa nui o kēlā me kēia papa ʻaina, hoʻokomo pū ʻia nō nā lau ʻai a me nā hua ʻai ʻē aʻe i mea e hōʻike ai i nā ʻano mea ʻai i hiki ke lilo i pani hakahaka no nā mea ʻai Hawaiʻi i nele. He mea nui kēia, ʻoiai no loko a no nā ʻāina ʻē mai hoʻi ka hapa nui o nā pūʻulu kānaka. Ma ka papa ʻaina maʻa mau, e loaʻa ana ka poi, ka ʻulu a ʻuala paha i pūlehu ʻia, ka laiki mākuʻe, ka lau ʻai, ke kupa, ka tōfū a pāpapa paha, a me kekahi mau lekapī ʻē aʻe me nā meaʻai lau nahele i pūlehu ʻia, i pālai kāwili ʻia, i hoʻoʻoma ʻia, a i waiho maka ʻia paha. Mikomiko iki ʻia ka ʻai me ka paʻakai Hawaiʻi, ke kinika, ke kālika, ka ʻōlena, ka limu, a me ka hū ʻaiaola. Hiki i ka poʻe hoihoi ke hoʻomaka ma o ka hahai ʻana i ia laʻana ma ka hale no nā pule he ʻelua.