Hoʻokō ʻia ka Palapala ʻAelike me ka DOI

0
453

Read this article in English

Ma ka ʻōlelo wehena o ka 2022 White House Tribal Nations Summit mai ka lā 30 o Nowemapa a i ka lā 1 o Kēkēmapa, kūkala akula ke Kuhina Kālaiʻāina ʻo Deb Haaland i kekahi mau hana e kākoʻo ana i ka hana maluō, ka hoʻonaʻauao, a me ka hoʻomohala waiwai i alakaʻi ʻia e nā lāhui ʻIlikini ma o ke keʻena hou ʻo ke Ke’ena Pilina Ka’akālai, ma lalo o ka ʻOihana Kālaiʻāina (DOI). ʻO ke kuleana o kēia keʻena, ʻo ia ka hoʻoulu ʻana i nā pilina, nā waiwai, a e kākoʻo i nā hopena hoʻokāʻoi no ka lāhui ʻIlikini.

ʻO ke keʻehina mua, ua hoʻokō ka DOI i ʻehā palapala ʻaelike me ka American Sustainable Business Network (ASBN) e kākoʻo ana i nā mea hoʻomaka ʻoihana; Enterprise Community Partners e kākoʻo ana i ka hoʻolako hale makepono; Native CDFI Network; a me Oweesta Corporation e hoʻomaʻalahi i ka loaʻa ʻana o ka waiwai me ka ʻaiʻē; Trust for Public Land e hoʻoulu ana i ka pilina ma waena o ka ʻāina me nā haʻawina hoʻonaʻauao me nā ʻōlelo ʻōiwi a me ka moʻomeheu.

Pākuʻi ʻia me koʻu kulana he alakaʻi no ka Sovereign Council of Hawaiian Homestead Associations (SCHHA), noho au ma ke kulana hope alakaʻi o Oweesta Corporation, he ʻoihana ʻōiwi e kākoʻo ana i ka poʻe ʻIlikini, ʻĀlaka, a me ka poʻe Hawaiʻi, a ma kēia kulana aʻu i hele ai i Wakinekona D.C., i ka ʻaha pūlima.

Aia nō ʻo Pete Upton ma laila kekahi, ʻo ia ke poʻo alakaʻi o ka Native CDFI Network (NCN), he hui o nā ʻoihana e kokua i ka poʻe ʻōiwi e holomua i loko naʻe o nā alaina, i loaʻa ma 27 o nā mokuʻāina. E hana pū ana ʻo Oweesta me NCN me ko ka DOI Keʻena Pilina Kaʻakālai e wehe i nā ala e loaʻa ai ka waiwai me ka ʻaiʻē no ka poʻe ʻŌiwi a puni ke aupuni.

“I kēia lā, ʻehā wale nō keneka o kēlā me kēia hoʻokahi haneli kālā i hāʻawi ʻia e nā hui lokomaikai, lilo i nā kaiāulu ʻōiwi,” wahi a ka Hope Kākauʻōlelo o ke Kōmike Kuleana ʻIlikini ʻo Brian Newland. “ʻO ka hoʻololi ʻana i kēlā, ʻo ia ke kuleana o ko mākou Keʻena Pilina Kaʻakālai.”