Pahu Hopu Hoʻoholo Makahiki Hou- Aʻo mai i ka ʻŌlelo Hawaiʻi

0
756

Read this article in English

Photo: Kalani Akana

He makahiki hou kēia a ua kau kou noʻonoʻo ma ka pahu hopu hoʻoholo e aʻo mai i ka ʻōlelo o kou mau kūpuna Hawaiʻi. Eia kā, ua kūpono nō ia pahu hopu no ka mea ʻo ka mahina ʻōlelo Hawaiʻi ʻo Pepeluali! ʻŌkē, ma hea anei ʻoe e aʻo ai? Ma ke kula nui? Auē, paʻakikī paha kēlā iā ʻoe. Pehea ʻoe e hoʻokō ai i kāu pahu hopu hou?

ʻEā, inā makemake ʻoe e aʻo mai i ka ʻōlelo Hawaiʻi e noʻonoʻo i ka hoʻonaʻauao ʻana ma o nā papahana pāpaho. Manuahi no ka hoʻoili ʻana ma ke kelulā a i ʻole ma ka lolouila. Eia kekahi, hiki iā ʻoe ke hoʻokonukonu i kou manawa me ka peki o ka holomua.

Eia ma lalo nei kekahi o kaʻu mau papahana aʻo a hoʻonanea punahele.

Duolingo. ʻŌlelo ʻia ma kēia papahana, ʻo ia nō “ka ʻoi loa o nā papahana aʻo ʻōlelo o ke ao nei.” ʻO kā lākou nuʻukia ke aʻo ʻana o ka ʻōlelo me ka leʻaleʻa a no ka manuahi. Hiki iā ʻoe ke aʻo mai i ka ʻōlelo Hawaiʻi a hoʻolohe i ka leo o kekahi kanaka e ʻōlelo ana a koho a i ʻole haku ʻoe i ka pane me ka loaʻa wawe i hāpane pololei/ʻaʻole pololei.

Instagram. He pāpaho hoʻopili kanaka kēia no ka mahele ʻana i kiʻi a i wikiō i ka lehulehu a hiki iā lākou ke waiho i manaʻo a e kaʻana aku i ko lākou mau hoa ma ka pūnaewele like.

ʻO Kumu Kahanu Solitario kekahi kumu aʻo ʻōlelo Hawaiʻi ma Instagram ma #ehoopilimai. ʻO kona makuahine ʻo Cappy kāna haumana helu ʻekahi. Ma nā lā a pau, aʻo mai ʻo Cappy i kekahi hua ʻōlelo hou a i ʻole i kekahi māmala ʻōlelo hou e like me, “Hauʻoli Makahiki Hou.” Hiki iā ʻoe ke hoʻonanea i ka hula ʻana a Cappy a i ʻole i ka hīmeni ʻana o Kahanu me kona mau hoa puʻukani. Hoʻokūʻike ʻia e ʻoe, aia ʻo Kahanu i loko o ka pūʻulu hui hīmeni ʻo Keauhou. Nanea wale kēia ʻano aʻo ʻana!

TikTok. He pāpaho hoʻopili kanaka kēia ʻo TikTok no ka mahele ʻana i wikiō pōkole – ʻekolu kekona a i ka ka hoʻokahi minuke ka lōʻihi. ʻO nā waeʻano maʻa mau o nā wikiō ka hulahula, ka hoʻomākeʻaka, a me ka hoʻonaʻauao ʻana.

Hoʻohana ʻia ʻo TikTok e @ka.alala, ʻo ia ʻo Maluhia States, no ke aʻo ʻana i ka ʻōlelo. ʻŌlelo ʻo ia, “I mea kēia papa hana e kōkua a kākoʻo ai i ka poʻe e aʻo nei i ka ʻōlelo Hawaiʻi. I mea nō hoʻi e hoʻokikina ai i ka poʻe i mākaukau e ʻōlelo me ka wiwo ʻole i maʻa ka lehulehu i ua ʻōlelo Hawaiʻi nei.”

Noʻeau kāna hana keaka ʻana no ka mea ʻo ia hoʻokahi nā hoa e kamaʻīlio ana kekahi i kekahi – ka hoa i ka hoa, ka makua i ke keiki, ke kumu i ka haumana a pēlā aku. Pēlā ʻo ia e hōʻike ana i ka hoʻohana ʻana o ka ʻōlelo i loko o ke ola maʻa mau.

Hiki i ka mea hoihoi ke hoʻolohe i kona leo ʻoluʻolu a waipahūma Spotify me Apple. He mau pūʻololeo kēia.

Drops. Inā hoihoi ʻoe e hoʻokāʻoi i kāu ʻōlelo, pono e hoʻonui i kāu huina ʻōlelo. Maikaʻi kēia papahana ʻo Drops no ka hoʻonui ʻana i ka waihona hua ʻōlelo. ʻO ka ʻōlelo Hawaiʻi kekahi o nā ʻōlelo ma kēia papahana. Hāʻawi manawaleʻa ʻia ʻelima mīnuke o ka lā pākahi.