Ke Aʻo Auwaea

0
338

Read in English

Photo: Kalani Akana

Ma kēia wā pōpilikia o ka maʻi ahulau COVID-19, ke hopohopo nei ka lehulehu i ka palekana o nā keiki ināe hāmama ana ke kula. A inā e hāmama ana, e ʻokoʻa ana ke ʻano o ka hoʻonohonoho ʻana o la lumi papa ma muli o nā palekana alakaʻi o ka CDC, ʻo ia hoʻi, ke kōwā ʻeono kapuaʻi ma waena o nā haumʻna. Inā pēlā, pono ʻeono i ka ʻeono kapuaʻi kuea no nā haumana pākahi. No 20 mau haumāna, he 720 kapuaʻi kuea kēlā. ʻAʻole paha e hiki i loko o ka lumi papa maʻa mau.

No laila, ʻo ia e kumu o ka noʻonoʻo ʻana o nā alakaʻi mokuʻāina ma Hawaiʻi e hoʻohapa i ke kula a hele mai hoʻokahi hapa ma kekahi hapa o ka pule a hoʻokahi hapa ma ka hapa aʻe. I ka manawa o ka hele ʻole ʻana i ke kula, e noho ana lākou ma ka hale a aʻo ʻia i o ka pūnaewele ma Zoom paha a i ʻole kekahi polokalamu a’o auwaea like.

I kuʻu aʻo ʻana i ka hula ma ia wā o ka ahulau, hoʻohana au i ka papahana Zoom no ke aʻo ʻana kūʻānō (live). A laila, pono ka haumana e paʻi wikiō iā ia iho e hula ana ma ka polokalamu Flipgrid. Mahalo au i kēia polokalamu no ka mea ua hiki ke kumu ke nānā i nā haumāna pākahi a e paʻi wikiō i kekahi manaʻo no ka haumana a e haʻawi i manaʻo kikoʻī iā ia. Hiki i nā haumāna aʻe ke nānā a e hāʻawi i manaʻo paipai kekahi. Hiki i ke kumu ke kūkulu i kekahi makaʻaha loiloi a e hoʻouna i ke kaha i o Google Classroom (GC). ʻO Google Classroom kahi aʻu i hoʻohana ai no ka hoʻolaha, ka haʻawina pilihome, a me ka hoʻāhu ʻana i nā makelia – nā mele, nā moʻolelo a pēlā aku – mau mea e kākoʻo ʻia ai ka haumana. Maikaʻi ka GC no ke kaʻa ʻike a me ka mālama ʻana i nā kaha. Hiki i nā kumu ke hana like ma GC a hiki i ke kumu ke mālama i kekahi mau papa ma GC me Flipgrid.

Screenshot of a hula class on Flipgrid
Screenshot of a hula class on Flipgrid. Students can watch the video, record themselves dancing, and then the teacher can provide feedback and evaluate the student’s dance. – Photo: Courtesy

Inā pono i kekahi mau kumu a i ʻole i nā kime haumana e kūkulu i ka haʻawina, hiki iā lākou ke hoʻohana i ka polokalamu Padlet. Ua wehewehe ʻo Malia Nobrega-Oliveira i kēia polokalamu ma “Lei Ānuenue: Helu ʻElima.” Inā hoihoi nā ʻoe e huli ma YouTube. Ua hoʻahu ʻia nā polokalamu he nui ma laila.

ʻO Seesaw kekahi polokalamu maikaʻi no nā haumāna, nā kumu, a me nā makua. Hiki i ke haumana ke paʻi kiʻi, kaha kiʻi, paʻi wikiō, a kākau a waiho i loko o kāna waihona pili haʻawina. ʻOiai ʻaʻole au i hoʻohana i kēia, ua nānā au iā Kumu Kalei Kanīʻaupiʻo Crozier ma “Lei Ānuenue: Helu 19” e wehewehe ana e pili ana i kāna hoʻohana ʻana iā Seesaw. Ma muli o kāna hōʻike ʻēleu, hauʻoli, a me kona hoihoi ua hoʻoulu ʻia au e ʻimi a nānā pono i kēia hana. He kōkua nui kēia polokalamu.

Nui koʻu mahalo i kuʻu haumana hula ʻo Kūkahoʻomalu Souza, he kumu ma ʻIolani, i kāna kōkua nui i ka papa hula me GC, Flipgrid, me Zoom. ʻAʻole i maʻa mākou, nā kumu a me nā haumāna, i ua mau ʻenehana. No laila, lilo ʻo ia ʻo ia ke kanaka “IT.” Noʻonoʻo au, inā hoʻohana ke kumu i ia mau ʻenehana no nā haumāna, e pono ana kekahi mau kānaka IT e kōkua i ke kumu, ka haumana, a me kona ʻohana. Pono e aʻo mai i ia mau ʻenehana a he mea hoihoi nō kēlā. ʻO kēia ka wā o ke aʻo auwaea.