Ka Hala

0
88

Read this article in English

No ka lā hope o ka makahiki, ua lei ʻia nā Hawaiʻi i ka lei hala i mea e hōʻike ai i ka hala ʻana o ka makahiki kahiko. ‘Ōlelo ʻia e nā kūpuna, e lei i ka lei hala a hala aʻe nō hoʻi nā maikaʻi ʻole o kēlā makahiki. No laila, he hōʻailona a he pale ka lei hala i ka ʻino a me nā maikaʻi ʻole o ka makahiki i hala iho nei a he mea ia e hoʻomaka pono ai ka makahiki hou.

ʻŌlino māʻamaʻama ka nani ke nānā aku i ka hala ʻula, ka hala melemele, a me ka hala lihilihi ʻula. Ua ʻōlelo ʻia e nā kūpuna, “ʻAʻohe hala ʻula i ka pō.” Inā pala ka hua o ka hala a waiho wale ʻia i luna ʻaʻole ʻike ʻia ka nani a hiki i kona kahiko a heleleʻi ʻana. E aho e kiʻi a wāwahi i ka hua a hana i lei.

ʻO ia ka hana punahele a Kaʻahumanu wahi a Bīnamu. Ma ko Kaʻahumanu kipa ʻana aku iā Kauaʻi ua hoʻohanohano ʻia ʻo ia me kekahi mele e haʻi ana e pili ana i ko Kaʻahumanu aloha i ke kui lei hala ʻana. Ua oli ka mea hula i kēia lālani ma ka mele inoa nona: “E pua ana ka makani i nā hala o Mālelewaʻa.” Kaulana nō hoʻi ka ulu hala o Naue ma Kauaʻi, Kekele ma Oʻahu, Weke ma Hāna, Nīhoa ma Kalaupapa, a ma “Puna paia ʻala i ka hala.”

Wahi a nā kānaka hulikoehana, ua lana mai kekahi hua hala i Hawaiʻi ma kahi o 1.2 miliona makahiki aku nei me ke kōkua ʻole o ke kanaka. Aia nā mōʻalihaku o ia mau hua hala ma Kauaʻi. Akā, wahi a ka ʻohana Pele, ‘o Pele ka mea nāna i hoʻokumu i ka hala ma Hawaiʻi.

Penei ka moʻolelo. Mahope aku o kona haʻalele ʻana mai Polapola i Kahiki, ua kū a ʻapa kona waʻa i kekahi moku e lana ana ma ka moana. Paʻa ka ʻāina o ia moku lana ma nā aʻa o kekahi pū hala nui ʻo ʻOhiʻohikupua kona inoa. Ua paʻa ʻia ka waʻa ona ʻo Pele e ia pū hala, ma nā kukū loulou. ʻAʻole hiki i ka waʻa ʻo Honuaiākea ke ʻoni iki. No laila ua piʻi ka inaina o Pele a ua nahaehae ʻia e ia nā lau, nā ule hala, nā hua a pēlā aku. ʻO kekahi o ia mau ʻāpana o ka hala ua lele ā hiki i Hawaiʻi a ʻo ia nō nā kūpuna o nā hala ma Hawaiʻi. ʻO ia paha nā mōʻalihaku i loaʻa ma Kauaʻi. ʻAʻole pakele naʻe ka waʻa ma kā Pele hana huhū ʻana no laila ua ukuhi wale iho ʻo Kāne i ka wai maoli ma nā kukū a ua kuʻu ʻia ka waʻa a holo hou mai ʻo Pele mā i Hawaiʻi.

He mau loina no ka lei ʻana i ka hala. Kūpono ka lei ʻana ma ka pau ʻana o kekahi hana e like me ka puka ʻana mai ke kula, ma hope o ka ʻūniki, a ma ka piha makahiki o kekahi kanaka, kekahi hanana.

ʻAʻole kūpono ka hāʻawi ʻana i ka lei hala no ka hoʻomaka ʻana o kekahi hana e like me ka hoʻolaʻa ʻana i ka hale. ʻAʻole hoʻopāpahi ʻia nā ʻōlapa i ka hala ma kekahi mau hālau hula ma muli o ka manaʻo o “hala” o hala ka ʻike o nā kānaka hula. Eia kekahi moʻolelo hoihoi ma loko o “Aspects of the Word Lei” na Pukuʻi Wahine o ka hāʻawi kūpono ʻole ʻana i ka lei hala. Ma kekahi hālāwai kālaiʻāina hōʻeuʻeu ua hāʻawi ʻia kekahi moho politika i ka lei hala. Auē, ʻaʻole holo kūpono kāna hana. Ua hala kona manawa kūpono.

Hoʻopuka manaʻo ka loea hula ʻo Kahaʻi Topolinski, inā hāʻawi ʻia ʻoe i lei hala ma ka manawa kūpono ʻole, e hoʻopaʻa i ua lei nei ma ka lima ʻākau, mālama, a lei ma ka wā kūpono.

Mai poina nō naʻe i ka ʻōlelo noʻeau, “ʻAʻohe hala ʻula i ka pō.” E lei hou kākou i ka lei hala a e lei hou me ka ʻike a me ka mahalo o nā kūpuna i ua lei nani nei. Nani wale nā hala, ʻea ʻeā.