Waiho ʻia e Kanaeokana a me ke Council for Native Hawaiian Advancement
I ka lā ʻekahi o Pepeluali nei, ua wehea he paena punaewele hou i kapa ʻia ʻo Papa Kuhikuhi Poʻe Unuhi. He wahi ia me ka papa inoa o nā mea unuhi ʻōlelo Pelekānia a i ka ʻōlelo Hawaiʻi me ka unuhi hoʻi ʻo ka ʻōlelo Hawaiʻi a i ka Pelekānia. Nui ʻino ka ʻimi ʻana i ka unuhi ʻōlelo Hawaiʻi i kēia mau lā no laila, he kōkua ia paena no ka lehulehu.
Ma o nei papa kuhikuhi, na ka mea hoʻohana e ʻimi a loaʻa me ka wikiwiki i nā loea a po’e mākaukau i ka unuhi no nā pāhana like ʻole. Wahi a ke kānāwai Mokuna 321C HRS he mea pono ka unuhi i kekahi mau palapala kūhelu o ke aupuni no laila, he kōkua kēia no ke aupuni i ka huli ʻana i poʻe unuhi. He kālena like ʻole ko ua poʻe unuhi lā i hiki ke kōkua aku i ka mea hoʻohana me nā mea pili i ke aʻo a hoʻonaʻauao hoʻi, nā lepili/hōʻailona/papa hoʻolaha me nā mea pāpaho pāheona ho’i.
ʻO ka pahuhopu o nei papa kuhikuhi ʻo ia ke kākoʻo ʻana i ka ulu ʻana o ka ʻōlelo Hawaiʻi ma ka paeʻāina. Ma muli o ka ulu ʻana aʻe o ka heluna o ka poʻe ʻōlelo Hawaiʻi, ua ulu pū aʻela ka pono e laha ka ʻōlelo Hawaiʻi ma kēia nohona o ke au nei. ʻO ia hoʻi ka hoʻokuluma ʻōlelo Hawaiʻi. Na CNHA i ʻike maka i ka nui o nā noi a ke aupuni me nā pā’oihana i ka poʻe unuhi i kēia mau makahiki aku nei. No laila, ‘o ka Papa Kuhikuhi Poʻe Unuhi kekahi ala e kōkua i ko kākou kaiāulu.
Na ke mea hoʻohana e ʻimi pono i ka poʻe unuhi kūpono no kāna pāhana. He kālena kikoʻī ko ka poʻe unuhi a pau a na ka mea hoʻohana e kūkākūkā pololei me ka poʻe unuhi e ʻike pono i ia kālena me ka hōʻoia ʻana inā hoʻokō ʻia nō ka makemake no kā ia ala pāhana. Aia ka ʻike kaʻa launa no kēlā me kēia mea unuhi ma ka papa kuhikuhi.
He pāhana ʻo Papa Kuhikuhi Poʻe Unuhi na CNHA lāua ʻo Kanaeokana. Na lāua e mālama i ka paena punaewele no ke kaiāulu. Inā he nīnau kāu, e leka uila iā advocacy@kanaeokana.net a e kipa i ka Papa Kuhikuhi Poʻe Unuhi ma poeunuhi.net/.
