Ua Ola Ka ʻĪ a Puni Hawaiʻi!

0
62

Read this article in English

Welina e nā kini makamaka e noho maila mai nā kukuna o ka lā i Haʻehaʻe a ka lā kōwelo i ka ʻilikai o ka mole ʻolu o Lehua a pēlā pū i nā kihi ʻehā o ka honua nei. Aloha nui!

ʻO Pepeluali ka Mahina ʻŌlelo Hawaiʻi he wā e hoʻomaikaʻi, hoʻoikaika a hoʻopaipai ai i ka ʻōlelo kupa o ka lāhui ʻo ia ka ʻōlelo makuahine na ke kanaka Hawaiʻi. Me ka mahalo iā Kiaʻāina Neil Abercrombie i kona kākoʻo ma o ka pūlima ʻana i Act 28 i ka makahiki 2013.

I kēia makahiki e mālama ʻia ana ʻehiku mau papahana i kapa ʻia ʻo Ola Ka ʻĪ ma ʻehā mokupuni ʻo Oʻahu, ʻo Hawaiʻi, ʻo Maui, a ʻo Kauaʻi. ʻO ka pahuhopu nui o nei papahana ʻo ia nō ke ola mau o kā kākou ʻōlelo makuahine a lohe pepeiao ʻia ka ʻōlelo i aloha nui ʻia ma nā kihi a pau o ke kaiāulu mai ke kuaʻau a i ke kualono. Eia nā lā ʻo kēlā me kēia hanana:

  • Pepeluali 1: Ola Ka ʻĪ Koʻolau ma Windward Mall (Oʻahu)
  • Pepeluali 8: Ola Ka ʻĪ Hilo ma Prince Kūhiō Plaza (Hawaiʻi) a me Ola Ka ʻĪ Honolulu ma Kahala Mall (Oʻahu)
  • Pepeluali 15: Ola Ka ʻĪ Maui Nui ma Queen Kaʻahumanu Center (Maui)
  • Pepeluali 22: Ola Ka ʻĪ ʻEwa ma Ka Makana Aliʻi (Oʻahu)
  • Malaki 1: Ola Ka ʻĪ Kona ma Keauhou Shopping Center (Hawaiʻi) a me Ola Ka ʻĪ Kauaʻi me Niʻihau ma Kukui Grove Center (Kauaʻi)

ʻO ka manaʻo ʻo Ola Ka ʻĪ ʻo ia hoʻi ʻo ka “Hawaiian Language Thrives.” Mahalo nui ʻia ka ʻohana keiki ma Ke Kula Kaiapuni ʻo S.M. Kamakau no ke kōkua me kēia inoa papahana i makana ʻoluʻolu ʻia iā kākou ma ka makahiki 2020.

E piha ana kēlā me kēia kihi o nā kikowaena kūʻai me nā hoa ʻōlelo Hawaiʻi, nā kula kaiapuni me nā kula kaiaʻōlelo, nā mele Hawaiʻi, nā ʻano pāʻani me nā makana like ʻole, a pēlā wale aku.

Pīhoihoi kākou e launa pū ma o ka ʻōlelo Hawaiʻi. ʻO kekahi mau mea hou a kupaianaha nō hoʻi ʻo ia ka mālama ʻana i ka hoʻokūkū kōnane ma Kauaʻi, ka heʻe hōlua ma Kona, a me ka papa moʻolelo hōʻike’ike hou e hoʻohanohano ana i Ke Aliʻi Wahine ‘o Ruta Keʻelikōlani.

Eō e Keʻelikōlani!

Ua kūpaʻa ke kamāliʻi wahine ʻo Ruth Keanolani Kanāhoahoa Keʻelikōlani ma ka moʻomeheu Hawaiʻi i manaʻo ʻia e ka nui o nā haole a me ka poʻe Hawaiʻi i hoʻokolonaio ʻia he kahiko, he halapohe a ʻaʻohe waiwai no ke aupuni hou o ke au haole.

He kaiāulu nui kona i kākoʻo ʻia aku ma kona mau ʻāina ākea, a ua kaulana ʻo ia i kona mālama pono ʻana i nā ʻelemākule Hawaiʻi. ʻOiai ua hele ʻo ia i ke kula a ka poʻe misionari a mākaukau loa i ka ʻōlelo Pelekānia, hōʻole ʻo ia i ka ʻōlelo ma kona ʻano he makua ponoʻī. He kūpaʻa nō kona ʻano. Ua ʻōlelo ʻo ia i ka ʻōlelo Hawaiʻi a koi aku i ka poʻe hiki ʻole ke ʻōlelo e hoʻohana i ka unuhi ʻōlelo inā makemake lākou e kamaʻilio me ia.

E kū ana nei papa hōʻikeʻike ma kēlā me kēia Ola Ka ʻĪ no ka lehulehu e komo piha ma o ka hoʻoili ʻana i nā QR codes like ʻole kahi e hoʻolohe i nā kani a e hoʻokaʻa like aku i manaʻo ma ka hoʻolohe a heluhelu. E kono like ʻia ana ka lehulehu e moʻolelo like mai i ka huakaʻi ʻōlelo Hawaiʻi ponoʻī a i kona manaʻo i hea kahi kūpono e noho ai ka ʻōlelo Hawaiʻi ma kona ola ponoʻī.

Ma ka hopena, e komo ʻokoʻa ana nā kānaka i nā pāʻani ʻōlelo Hawaiʻi a Kamehameha Publishing. E hoʻomau ʻia ana nā pāʻani i pāʻani mua ʻia eia naʻe, nui loa maila ka pīhoihoi e hoʻokaʻa aku i ʻelua pāʻani hou, ʻo Nā ʻOno o Ke Kai lāua ʻo Pāʻani Pilina.

ʻO ʻoe anei kekahi i komo mua i ka hana ma nā hoʻolauleʻa ʻo Ola Ka ʻĪ ma ka mahina ʻōlelo Hawaiʻi i nā makahiki i hala? Inā ʻaʻole, e naue mai a e komo koke, ʻoiai, e nui ana ka leʻaleʻa ma Ola Ka ʻĪ!

Mahalo nui i kēia mau hoa i ke kākoʻo ʻana iā Ola Ka ʻĪ: ʻAhahui ʻŌlelo Hawaiʻi, Hawaiʻinuiākea School of Hawaiian Knowledge, Kanaeokana, KS Kaiāulu, Hawaiʻi Tourism Authority, Kauaʻi Council of the Association of Hawaiian Civic Clubs.


E huli i nā lāliʻi a me ka papainoa o nā kokua o nā hanana ʻōlelo Hawaiʻi a pau ma https://www.mahinaolelohawaii.org/