Na Pōlani Kahakalau
I ka makahiki 2015, ua hui pū kekahi mau poʻe ʻimi naʻauao a ʻiʻimi ʻike ma Pokukala e kaʻana i ka ʻike, nā pilina a me nā noʻonoʻo like ʻole a e hoʻolālā i nā ala hou o ka hoʻonaʻauao muli kula kiʻekiʻe. Kapa ʻia kēia hui ʻo Ecoversities Alliance, a ʻo kekahi o nā lālā ʻo ia ka mea nāna i hoʻokumu iā EA Ecoversity ʻoia hoʻi ʻo Kauka Kū Kahakalau a me kāna kaikamahine ʻo ʻIʻini.
“ʻO ka hui ʻana me ia mau poʻe hoʻololi kūlike ʻole me nā mea maʻamau, mai ka honua holoʻokoʻa, i hoʻoikaika iā mākou e hoʻokumu iā EA Ecoversity,” wahi a Kahakalau. “Ua maʻa mākou i ka hoʻololi nui ʻana i ke aʻo ʻana maʻamau ma muli o ka hoʻomaka ʻana iā Kanu o ka ʻĀina, ke kula hoʻāmana moʻomeheu Hawaiʻi mua loa. Na kēia kula, e hoʻolauleʻa ana i kona makahiki he 25 i kēia makahiki. ʻO ka mea nui aʻe, ua ʻike nui mākou i ka pono o ka hoʻonaʻauao ʻana muli kula kiʻekiʻe e kōkua aku i nā ʻōpio maoli e noho ma Hawaiʻi.”
Mai ia manawa mai, ua kōkua nā ʻelele o EA Ecoversity i ka hui ʻo Ecoversity ma nā wahi hoʻonaʻauao kūikawā ma Costa Rica, Mexico a me India. Ua mālama hoʻi ʻo EA Ecoversity i ʻelua mau Hālāwai Pākīpika, me ke kolu o ia hālāwai e hoʻolālā ʻia nei i Kahiki ma ka makahiki 2027.
Eia kekahi, ua kōkua ʻo EA Ecoversity i nā ʻaha kūkā pūnaewele, nā papahana like ʻole a me ka paʻiʻ ana i nā puke e hoʻoulu ana i nā kānaka a me ke kaiaola a e hoʻololi hoʻi i nā mea pono ʻole nui hewahewa ma ka honua nei.
I ka makahiki 2022, ua lilo ʻo EA Ecoversity i hui kaʻina hana pono. Kū ʻo EA no Education with Aloha, akā, ʻo ka manaʻo o ea, ʻoia hoʻi ʻo sovereignty nō hoʻi. Ua koho ʻia kēia inoa no ka mea ʻo kekahi o nā pahuhopu o EA Ecoversity, ʻo ia ka hoʻihoʻi ʻana i ko mākou mau kaʻina aʻo Hawaiʻi ponoʻī a me kā mākou hana ponoʻī no ka hoʻomau ʻana i ka ʻike kūpuna.
Ua paʻa kēia pono e ka Paukū 14.1 o ka UNDRIP (United Nations Declaration on the Rights of Indigenous Peoples) e ʻōlelo ana, “He kuleana ko ka poʻe ʻōiwi e hoʻokumu a hoʻomalu i kā lākou mau ʻōnaehana hoʻonaʻauao a me nā kula e hoʻolako ana i ka hoʻonaʻauao ma kā lākou ʻōlelo ponoʻī, ma ke ʻano kūpono i ko lākou moʻomeheu o ke aʻo mai a me ke aʻo ʻana aku.”
Kūʻokoʻa ʻo EA Ecoversity, ʻaʻole like me nā kula nui a me nā papahana hoʻonaʻauao muli kula kiʻekiʻe ʻē aʻe, ma muli o ka mālama ʻana i ka moʻomeheu kanaka. Na ke aloha e alakaʻi mai i nā papahana a mahalo ʻia a mālama ʻia nā haumāna a pau iā lākou e hoʻomaʻamaʻa ʻoihana a ʻimi i ka palapala kikohoʻe. ʻO ke ʻano o ke aʻo ʻana ʻo ia hoʻi: ma ka hana ka ʻike, nānā ka maka, hana ka lima, a pēlā aku. Mālama ʻia nā papa ma ka pūnaewele a ma ke kaiāulu ma ke aʻo alo a he alo. Eia kekahi, he papahana manuahi no nā ʻōpio kanaka maoli a uku hoʻi ʻia nā haumāna no kā lākou hana huʻeaʻo.
I ke kau hāʻulelau 2024, ua hoʻokumu ʻo EA Ecoversity iā Kanaka Culinary Arts, he papahana hoʻonaʻauao ʻelua makahiki manuahi. Na ia papahana e hoʻomaʻamaʻa ana i nā ʻōpio Hawaiʻi e komo i ka ʻoihana meaʻai Hawaiʻi me nā mākau i ka hoʻomākaukau ʻana i nā meaʻai Hawaiʻi. Hoʻonui pū kēia papahana i ka ʻike kūpuna kuʻuna a hoʻōla hou i ka moʻomeheu kanaka a me ke kaiaola.
ʻO kekahi hana hou aʻe a EA Ecoversity ʻo ia hoʻi ka hoʻonui ʻana i ka ʻike kuʻuna o nā kānaka maoli kaiāulu. I Nowemapa 2024, ua mālama ʻo EA Ecoversity i ka hanana ʻo Kanaka Culinary Explosion. Na 200 mau ʻohana Hawaiʻi i hele mai e aʻo e pili ana i ka hoʻohui ʻana i nā meaʻai Hawaiʻi i loko o nā pāʻina lā nui, a me ka hoʻonui ʻana i ka ʻike e pili ana i ka Lā Kūʻokoʻa.
No ka ʻike aku e pili ana i nā papahana a me nā hanana a EA Ecoversity, nā hana manawaleʻa ma ke ʻano he kumu aʻo, a iʻole he mea hoʻolako hana, a me ka hui pū me ko mākou ʻohana ma ke ʻano he limahana a i ʻole he mea komo, e leka uila iā Pōlani Kahakalau: pōlani@kuakanaka.com. E hahai pū iā EA Ecoversity ma FB and IG @kuakanaka (kā mākou kākoʻo kālā) no kā mākou mau hanana hou loa, nā papa a me nā papahana, a i ʻole e kau inoa i kā mākou papa inoa leka uila ma www.kuakanaka.com.
