Kākau ʻia na Robert Stauffer a unuhi ʻia na Kamalani Johnson
ʻO ka Waihona Puke Uila Hawaiʻi ʻo ka Ulukau kekahi o nā kahuapaʻa ʻōlelo ʻōiwi kele nui loa ʻia o ka poepoe honua e ʻeʻe ai ka poʻe mai Hawaiʻi, nā mokuʻāina he 50 pau pū me ka ʻĀpana ʻo Kolumepia, a me ka 122 kaumokuʻāina ma ka liʻiliʻi loa. E ʻoliʻoli nō paha ka naʻau o ka mea ʻōlelo Hawaiʻi a puni ka poepoe honua ke lohe aʻe i ke kele ʻia o ka Ulukau he 50,000 manawa o ka lā, e kokoke ana i ka 400 miliona kele ʻana mai kona hoʻokumu mua ʻia i ka makahiki 2002. He manuahi ka Ulukau mai kinohi mai i holo ma luna o ka lāʻī lūlū ʻia mai na nā lālā a hui kākoʻo o ke kaiaulu.
Kaʻa hope akula he 20 makahiki mai kona hoʻokumu mua ʻia ʻana, ke hōʻano hou makamua ʻia nei ka Ulukau. Inā e kele aku i ulukau.org i kēia lā, ma laila e ʻike ʻia ai he kiʻi nani a me nā koho a ala hou e ʻike ʻia ai kona mau ʻohina he 20, nā puke ma nā haneli, a me nā ʻaoʻao nūpepa ma nā kaukani.
Hiki pū ke kele i wehewehe.org, kahi kele nui ʻia o ka Ulukau e ʻike ʻia ai kona kiʻi nani hou a me kona kino paʻa e huli huaʻōlelo ai (ʻŌlelo Hawaiʻi-ʻōlelo Pelekānia a mai ka ʻōlelo Pelekānia-ʻŌlelo Hawaiʻi).
ʻO kekahi holomua nui ka hōʻano hou ʻia o ka ʻohina puke (puke.ulukau.org). E kele aku i kēia māhele o ka waihona puke a me kona lau hou. ʻĀnō, hiki ke nānā ʻia ka puke ma nā ala hou, ma ke kamepiula, ke kamepiula lawe lima, ka papa uila, a kelepona pū.
Ma ka holo o nā māhina e hiki mai auaneʻi, e hōʻano hou pū ʻia nā ʻohina hou aku o ka Ulukau. He pūʻolo hoʻi kēia e hāpai ʻia aʻe nei na kēia waihona puke uila aloha nui ʻia i nā mea ʻōlelo Hawaiʻi a puni ka poepoe honua. Ma kēia piha makahiki 20, ke pāhola aku nei nā hui hoʻokumu o ka Ulukau – ke koleke ʻōlelo Hawaiʻi ʻo Ka Haka ʻUla o Keʻelikōlani ma ke Kulanui o Hawaiʻi ma Hilo a me Alu Like – i ka mahalo i ke kākoʻo o ke kaiaulu a me nā hoa kākoʻo ma nā makahiki he 20 i kaʻa hope akula ʻoiai e kūlia ana i ka hoʻōla a hoʻoholomua i nā ala ʻōlelo a ʻike Hawaiʻi no ka wā e hiki mai ana.
