He Kanikau no
Frances Māhealani Kekai Camp
(May 16, 1946 – Feb. 27, 2023)
Kuʻu makuahine mai ka ua popo kapa
Ka ua nihi aʻe ma uka o Papakōlea
A me nā kualono o Iluko ā Hāmākua
Neʻepapa ka helu a ke kūmākena
Aia la i hea i hele iho nei
Aia paha i ke ao lewa lani maliē
Lele ke aho i kuʻu manaʻo i noho nei
Weliweli ka manaʻo i ka lohe ana
I ka lohe ana aku i kou leo ʻaleʻa
A me ke kani o kou kīkā
Kini nā holoholo kaʻa i ka pō
He uwe helu mai nā moʻo lau
I ke aka o nā pali nienie o ke Koʻolau
Ke anu ʻiniki hōʻeha o ka moe a Niolopua
Ke uwe helu nei au i kuʻu makua
Kuʻu māmā o ke aloha mau loa
Kuʻu kaumaha luʻuluʻu kō aloha
Kuʻu minamina pau ʻole iā ʻoe
Noho mākou me ka ʻū iā ʻoe
Pau ka pili kaua, ua hele ʻoe
Hele hoʻokahi ʻoe i kou huakaʻi
I ka waʻa o nā kūpuna o ka ʻĪ
Noho ke aloha me ʻoe me ka hoʻomanaʻo
