Na John Aeto / Unihi ʻia e kō OHA Paia Kāne
ʻO ka heluna kānaka o ka “Poʻe Hawaiʻi a me nā lāhui ʻē aʻe o ka Pākīpika” ka pūʻulu wikiwiki loa o ka ulu ʻana, a ua helu ʻia he 1.2 miliona kānaka ma ʻAmelika Hui Pū ʻIa ma ka Helu Kanaka 2010. ʻO ia kekahi o nā lauana e nānā ʻia ana ma hope o ka Helu Kanaka 2020 e hoʻomaka ana i kēia makahiki.
ʻO ka Poʻe Hawaiʻi ka heluna kānaka nui loa o nā lāhui Pākīpika e noho ana ma ʻAmelika Hui Pū ʻIa. ʻOiai e haʻalele nui ana nā Hawaiʻi i ka paeʻāina no nā hana a me nā hale emi, e hōʻike ʻia paha kekahi hōʻailona nui e ka Helu Kanaka 2020. Ke kuhi ʻia nei e hōʻike ana ka Helu Kanaka 2020 i ka noho ʻana o ka hapa nui o nā kānaka Hawaiʻi ma ka ʻāina haole.
ʻOiai he mea hou ia i ka Hawaiʻi, ʻaʻole ʻo lākou ka poʻe Polenesia mua i neʻe aku mai ko lākou kulāiwi. Ua kokoke nō e pā hā ka heluna kānaka Kāmoa e noho nei ma ʻAmelika Hui Pū ʻIa ma mua o ka heluna e noho nei ma Kāmoa ʻAmelika. Ua hoʻomaka ka pukaneʻe ʻana maiā Hawaiʻi, ka Paeʻāina Mariana, a me Kāmoa ʻAmelika ma ka hoʻomaka ʻana o ke kenekulia iwakālua, a ua hoʻonui ʻia ma hope o ke Kaua Honua II. ʻO ka pipiʻi o ka nohona a me ka piʻi ʻana o ke kai a me ka wela kekahi mau kumu o ka neʻe ʻana.
E hōʻike ana nō ka Helu Kanaka 2020 i ka ʻikepili koʻikoʻi o ka māhuahuaʻana o ka “Poʻe Hawaiʻi a me nā lāhui ka Pākīpika” ma ʻAmelika Hui Pū ʻIa a i hiki ke hoʻohana ʻia i ua ʻikepili e pono ai ka heluna kānaka holoʻokoʻa ma kekahi mau ʻano nui like ʻole.
“He mana kō ka poʻe Pākīpika e hoʻokino mai i ko kākou pahuhopu no kēia mua aku a e kōkua i ke aukahi,” wahi a ka ʻālihikūlele NFL ʻo Marcus Mariota. “Ma ke ʻano he poʻe o ka Pākīpika, ʻo ia kō kākou pono, ʻo ka helu ʻia ma ka Helu Kanaka 2020.”
E palapala ana ka Helu Kanaka 2020 i ka neʻe ʻana o ka poʻe Pākīpika a e hoʻoholo ana hoʻi i ka hoʻolilo kālā ākea he mau biliona ma nā makahiki he ʻumi e hiki mai ana. He kōkua ka hualoaʻa Heluna Kanaka i nā kaiāulu āu e noho nei. Hoʻohana ʻia ke kālā ākea e kākoʻo i nā kula a me ke aʻo ʻana, a me nā hale maʻi iki a me nā hale maʻi nui. Hoʻohana pū ʻia no ka hoʻopāhono i nū alanui a me nā ala loa, a no ka ʻoihana kīnai ahi a me ka poʻe kōkua i ka pilikia kūhewa.
He kōkua pū kēia kālā i nā ʻahahui i kākoʻo ʻia e ke aupuni a me nā polokamu e kākoʻo pono nei i nā kaiāulu o ka “Poʻe Hawaiʻi a me nā lāhui Pākīpika ʻē aʻe”. E hāʻawi ʻia paha ke kālā i nā hui ʻauhau ʻole e kākoʻo ai i nā nele o ka “Poʻe Hawaiʻi a me nā Lāhui Pākīpika ʻē aʻe” a e kōkua pū i ke ola kino, ka mauli ola, ka mālama keiki, a me ka papahana ʻimi noiʻi.
ʻAʻole ana e loaʻa kēia mau pōmaikaʻi i ke kaiaulu inā ʻaʻole helu ʻia ka heluna kānaka a hōʻike ʻia ka pono o ia kālā. ʻO ia ke kumu i koʻikoʻi ai ka hana ʻana o ka poʻe a pau i ka Helu Kanaka.
E maʻakala i kāu leka e noi nei iā ʻoe e komo pū ma ka Helu Kanaka 2020 aia ana ma ka pahu leka ma mua o ka lā 1 o ʻApelila. 2020census.gov
