Ola ka ‘Ōlelo Hawaiʻi i ka Pā Hula

0
512

Read this article in English

Aloha e nā hoa o ka ʻōlelo Hawaiʻi. E ‘ae ‘oluʻolu mai iaʻu e kāʻana i kekahi mau moʻolelo e pili ana i ka ʻōlelo Hawaiʻi.

I kuʻu kula ʻana ma ke Kula ʻo Kamehameha ua hoʻokomo hewa ʻia au i loko o ka papa ʻōlelo Hawaiʻi e kekahi lolouila no kaʻu keleki ‘ōlelo. ʻO ka ʻōlelo Palani kaʻu koho. Akā maikaʻi kēlā koho hewa no ka mea ua loli koʻu ola mai kēlā wā ā hiki i kēia manawa.

ʻO kekahi o koʻu hoa papa ʻōlelo Hawaiʻi ʻo Palani Kahala. I kekahi lā, iā māua e kakali ana iā Kumu Quick (Sarah ʻIlialoha Keahi), ua nīnau ʻo Palani iaʻu inā makemake au e aʻo mai i ka hula. Hōʻole koke au. Pane ʻo ia, “ʻEā e Kalani, inā makemake ʻoe e hoʻokāʻoi i kāu ʻōlelo na ka hula e kōkua iā ʻoe.”

ʻOiaʻi ua kaʻukaʻu kaʻu pane ʻana, ua ʻae a komo au i ka hui hula ā Palani i hoʻomaka ai. Ua pololei koʻu hoahānau ʻo Palani. Na ka hula nō i hoʻomālama- lama i kuʻu maopopo i ka ʻōlelo Hawaiʻi.

Ma hope o kaʻu puka ‘ana mai ke kula kiʻekiʻe, ua huli au i kekahi hālau hula a ua loaʻa mai ka inoa ʻo Ka Pā Hula Hawaiʻi. ʻO loea Kahaʻi Topolinski ke kumu hula a ʻo kēia ka piha makahiki he 50 o kāna aʻo ʻana i ka hula. Hoʻomaikaʻi e Loea Kahaʻi me Ka Pā Hula Hawaiʻi!

Koe wale ka ʻōlelo Hawaiʻi ā Kahaʻi i lohe ai mai kona makuahine a me kona ʻohana, ʻaʻole ʻo ia i poeko a ʻaʻole wali kona ʻōlelo Hawaiʻi i kēlā manawa. Akā, ma muli o ka hoʻokaiapuni ʻana i nā mele like o ka hula a me ke oli ua paʻa ka ʻōlelo Hawaiʻi iā ia.

I kēlā mau makahiki, aia au ma ke Kula Nui ma Mānoa ke paʻu nei i ke aʻo ʻōlelo Hawaiʻi ʻana, no laila, ua huli ʻo Kahaʻi iaʻu me koʻu kaikuaʻana hula ʻo Keoni DuPont e paka i nā mele āna i haku ai. Ua nomineka ʻia kekahi mele, ʻo ia hoʻi ʻo Lei ʻo Kohala, no Nā Hōkū Hanohano. He mea kōkua nui kēia nānā ʻana i kāna mau mele iaʻu kekahi.

Ua hoʻokumu ʻo Kahaʻi i ka papa ʻōlelo Hawaiʻi i ka hālau. Pēlā ka hana ma nā hālau like ʻole. Nui hoʻi nā haumāna ʻōlelo Hawaiʻi i komo i ka hālau hula like ʻole a ua hoʻi kekahi mau kumu hula i ke kula nui e aʻo i ka ʻōlelo. Ua ʻaʻā ka puʻu o ke kanaka e inu i ka wai ola o ka ʻōlelo Hawaiʻi. Pēia e ola nei ka ʻōlelo Hawaiʻi i ka pā hula.