ʻO Alice Kamokilaikawai Campbell kekahi kumu hoʻohālike o ke kanaka ʻimi kaulike. ʻO kona makuahine, ʻo Abigail Kuaihelani Maʻipinepine Campbell, kona kumu hoʻohālike. Ua alakaʻi kona makuahine i ka Hui Aloha ʻĀina o nā Wahine, ka hui nāna i hōʻiliʻili i nā hapapūlima o nā kānaka e kūʻē ana i ka Hoʻohui ʻĀina ʻo Hawaiʻi iā Amelika.
Photo: Courtesy
Na Kamokila Campbell i kūʻē i ke komo ʻana o ka Panalāʻau o Hawaiʻi i loko o Amelika Hui Pū ʻia. ʻOiai ua makeʻe nui ka ʻAhahuina ʻElima Nui i ke komo ʻana, ua kūʻē ʻo ia, ʻo ia wale nō, me ka ʻōlelo ʻana penei (he unuhi mai ka ʻōlelo Pelekania):
ʻAʻole nā kuʻu naʻau i ka hoʻokuʻu ʻana i nā kuleana a me nā pono kuʻuna o nā ʻōiwi o nei pae mokupuni no kekahi komo humuhumu o nā koho pāloka ma Wakinekona, e kaʻihuluhulu i nā aloha ʻāina me nā kamaʻāina e mōlia i ko mākou mana no ka ʻānunu o nā poʻe ʻē e noho ana ma Hawaiʻi Nei, a e hoʻokō i ko lākou maka leho i ka lima ikaika ma luna o nā ʻoihana, nā mahi kō, nā poʻe kalaiʻāina, nā poʻe hoʻomeamea he hoa nō lākou o Hawaiʻi Nei ʻoiai ke nāna nei ko lākou maka kuko ma ka pahoa o nā luna poʻe ʻē ma luna o ka lehulelehu o Hawaiʻi.
Ua ʻōlelo ʻo Kamokila no kona poʻe lāhui a no nā kanaka i makaʻu i ka ʻAhahuina ʻElima Nui o lawe a lilo kā lākou hana hoʻolako ʻohana.
Ua neʻepapa mai nei nā hū o ka ʻāina. Ua ʻuā mai nei ka pihe o nā kupa o ʻAmelika Hui Pū ʻia a me nā kupa a puni ka honua no ke kaulike ʻole o ka ʻōnaehana e ʻae mau ana nō i kekahi mau kānaka lawelawe o ke aupuni e hana ʻino i ke kanaka ʻili pāʻele, ʻili kou. He hōʻike ia mau kūʻē i ka ʻiʻini o ke kanaka i ke kaulike a me ka pono kaulike o ke kānāwai a me nā kulekele o ke aupuni pono.
ʻO ke koho paloka ke ala e hoʻokuʻikahi ai i kēia mau mea kaulike ʻole. No laila, e hū ʻia mai ka lani me ka honua me kāu koho pāloka hiwahiwa.
